༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༩ ཉིན་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ས་སྐྱ་ཆོས་སྒར་དུ་གནས་གཟིགས་སུ་ཕེབས་ཡོད་པ་དང་། སྐབས་དེར་བོད་མི་མང་སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས་དང་། ས་སྐྱ་ཆོས་སྒར་གྱི་དབུ་འཛིན། ངོར་མ་དགོན་གྱི་དབུ་འཛིན། གོང་དཀར་ཆོས་སྡེའི་དབུ་འཛིན། ཚར་པའི་གདན་སའི་དབུ་འཛིན། ས་སྐྱ་མཐོ་སློབ་ཀྱི་སློབ་སྤྱི། བཙུན་དགོན་གྱི་དབུ་འཛིན་བཅས་ནས་ཕེབས་བསུ་ཞུས་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དཔལ་ས་སྐྱ་གོང་མ་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་དང་། དཔལ་ས་སྐྱ་གོང་མ་ཁྲི་འཛིན་ཞེ་གསུམ་པ་ཛྙན་བཛྲ་རིན་པོ་ཆེ་མཆོག་གཉིས་ལ་མཇལ་བཅར་གནང་། 
དེ་རྗེས་དཔལ་ལྡན་སྲིད་སྐྱོང་མཆོག་རཱཇ་པུར་བོད་ཀྱི་བུད་མེད་མཉམ་ལས་བཟོ་གྲྭར་འཚམས་གཟིགས་སུ་ཕེབས་ཏེ་ཐོག་མར་བཟོ་གྲྭའི་སྡེ་ཁག་སོ་སོར་གཟིགས་སྐོར་དང་། དེ་རྗེས་ཚོགས་ཁང་དུ་མང་ཚོགས་ཚང་འཛོམས་ཐོག བཟོ་འགོ་ཨུ་རྒྱན་ཆོས་སྒྲོན་ལགས་ནས་བཟོ་གྲྭའི་ལས་བསྡོམས་སྙན་སྒྲོན་ཞུས་གྲུབ་བསྟུན་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་། སྐབས་དེར་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བཙན་བྱོལ་བོད་མི་རྣམས་འཛམ་བུ་གླིང་གི་སྐྱབས་བཅོལ་བའི་སྤྱི་ཚོགས་འདྲ་འདྲའི་ནང་ནས་མི་འདྲ་བ་ཞིག་ཏུ་གྱུར་ཡོད་པ་མངོན་གསལ་ཡིན་པས། བོད་མི་རྣམས་ནས་མགོན་པོ་མཆོག་གི་ཐུགས་རྗེ་བཀའ་དྲིན་རྗེས་སུ་དྲན་དགོས་ཤིང་། གལ་ཏེ་༸གོང་ས་མཆོག་ལྟ་བུའི་དབུ་ཁྲིད་ཅིག་བོད་མིར་བྱུང་མེད་ཚེ་བོད་མིའི་འཐབ་རྩོད་དང་། བཙན་བྱོལ་ནང་དུ་རུབ་སྡོད་སྤྱི་ཚོགས་འདི་ལྟ་བུ་ཚགས་ཚུད་པོ་ཞིག་བྱུང་ཁག་པོ་ཡིན་པ་་གསུངས།
དེ་བཞིན་ཁོང་གིས་མི་རབས་རྒན་པ་རྣམས་ནས་བོད་ཀྱི་འཐབ་རྩོད་གསོན་གནས་རྒྱུན་འཛིན་སླད་སྐུ་ལས་ཚད་མེད་སྐྱོན་ཡོད་པས་མི་རབས་གཞོན་པ་རྣམས་ནས་རྒན་རབས་པ་རྣམས་ཀྱི་བཀའ་དྲིན་རྗེས་སུ་དྲན་དགོས་པ་ལྟར། དཔལ་ལྡན་སྲིད་སྐྱོང་སྐུ་ཉིད་ནས་ཀྱང་ས་གནས་གང་དུ་ཕེབས་ཀྱང་རྒས་གསོ་ཁང་ཁག་ཏུ་ཕེབས་ཏེ་རྒན་རྒོན་རྣམས་དང་མཇལ་འཕྲད་ཀྱིས་ཐུགས་རྗེ་ཆེ་ཞུ་གི་ཡོད་པ་གསལ་བཤད་གནང་རྗེས་ཚོགས་བཅར་བ་རྣམས་ལ་བོད་ཀྱི་ཆོས་དང་རིག་གཞུང་གི་གལ་གནད་དང་། རིན་ཐང་། འཕེལ་རིམ་སོགས་ངོ་སྤྲོད་དང་། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་སློབ་ཁྲིད་བྱ་ཡུལ་བསྟི་གནས་ཁང་རྣམས་བཙན་ཤེད་ཀྱིས་སྒོ་བརྒྱབ་ཏུ་བཅུག་སྟེ། བོད་མིའི་རིག་གཞུང་ངོ་བོ་དང་བཅས་པ་རྩ་མེད་གཏོང་ཐབས་རྩོམ་གྱི་ཡོད་པ་མ་ཟད། གཞོན་སྐྱེས་རྣམས་ཀྱི་དྲན་ཡུལ་ནས་བོད་ཅེས་པ་མེད་པ་བཟོ་རྒྱུའི་ངན་བྱུས་འདིང་གི་ཡོད་ཅེས་གསུངས་ཡོད།
དེ་ལས་འཕྲོས་ཏེ་ཁོང་གིས་བོད་ནང་རྒྱ་ནག་གཞུང་གིས་དེ་ལྟ་བུའི་བོད་ཀྱི་ཆོས་དང་རིག་གཞུང་ལ་སྡང་པོ་བྱེད་བཞིན་པའི་དུས་སུ་བཙན་བྱོལ་རང་དབང་ལུང་པའི་ནང་གནས་སྡོད་བོད་མི་རྣམས་ནས་འགན་ཁུར་ལྡན་པའི་ཐོག་གཞོན་སྐྱེས་ཕྲུ་གུ་རྣམས་ལ་བོད་ཀྱི་སྐད་ཡིག་དང་། རིག་གཞུང་སློབ་ཁྲིད་བྱ་རྒྱུར་སྐུལ་དེད་གཏོང་དགོས་པའི་རེ་སྐུལ་གནང་བ་དང་ཆབས་ཅིག བཀའ་ཤག་སྐབས་བཅུ་དྲུག་པའི་ངོས་ནས་གཞིས་ཆགས་སྲ་བརྟན་དང་འབྲེལ་བའི་ལས་གཞི་སྤེལ་བཞིན་པའི་སྐོར་ངོ་སྤྲོད་གྲུབ་མཚམས་གཞིས་མི་ཁག་ཅིག་གི་དྲི་བར་ལན་འདེབས་གསལ་བཤད་གནང་ཡོད། །
