༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༦ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནས་སྤུ་རུ་ཝ་ལ་བོད་མིའི་གཞིས་ཆགས་སུ་ཆུ་རུད་ཀྱི་ཉེན་ཁར་རྟོག་ཞིབ་གནང་རྗེས་སེ་ལ་ཀུའི་བོད་ཁྱིམ་སློབ་གྲྭ་དང་། བོད་ཁྱིམ་བཟོ་རིག་སྒྱུ་རྩལ་སློབ་གཉེར་བསྟི་གནས་ཁང་ལ་འཚམས་གཟིགས་སུ་ཕེབས་སྐབས་སེ་ལ་ཀུའི་བོད་ཁྱིམ་སློབ་གྲྭའི་སློབ་སྤྱི་ཚུལ་ཁྲིམས་སྐལ་བཟང་ལགས་དང་། བཟོ་རིག་སྒྱུ་རྩལ་བསྟི་གནས་ཁང་གི་ངེས་སྟོན་པ་བསྟན་འཛིན་ཆོས་བཟང་ལགས་གཙོས་པའི་དགེ་ལས་སློབ་ཕྲུག་རྣམས་ནས་ཕེབས་བསུ་ཞུས་རྗེས་དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད།
དེ་ཡང་སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སློབ་ཕྲུག་ཁག་ཅིག་གི་དོགས་དྲིར་ལན་འདེབས་དང་འབྲེལ་རྒྱ་ནག་གཞུང་གིས་བོད་ནང་བོད་ཀྱི་ཆོས་དང་རིག་གཞུང་སློབ་གཉེར་བྱ་རྒྱུར་དམ་བསྒྲགས་སྔར་ལྷག་བྱས་ཏེ། བོད་ཀྱི་ཆོས་དང་རིག་གཞུང་མེད་པ་བཟོ་ཐབས་ཀྱི་བྱུས་ངན་འདིང་བཞིན་པའི་དུས་སྐབས་སུ་ཕྱི་ཡུལ་རང་དབང་ལུང་པའི་ནང་ཡོད་པའི་བོད་མི་རྣམས་ནས་བོད་ཀྱི་ཆོས་དང་རིག་གཞུང་། སྐད་ཡིག་ལ་དོ་སྣང་གིས་སློབ་སྦྱོང་བྱ་རྒྱུ་དེ་ཧ་ཅང་གལ་ཆེན་པོ་ཡིན་པ་ནན་བརྗོད་གནང་བ་མ་ཟད། བོད་ཀྱི་གནད་དོན་འཛམ་བུ་གླིང་ལ་ཞུ་གཏུག་བྱ་བར་བོད་མི་རང་གིས་བོད་ཀྱི་ལོ་རྒྱུས་ཤེས་རྟོགས་དགོས་རྒྱུ་གལ་འགངས་ཆེན་པོ་ཡིན་དུས། སློབ་གཉེར་བ་རྣམས་ནས་བོད་ཀྱི་འདས་པའི་བྱུང་རབས་ལ་དོ་སྣང་གནང་དགོས་པའི་སྐུལ་མ་གནང་། དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་གིས་བོད་ཀྱི་འདས་པའི་ལོ་རྒྱུས་ཀྱི་འཕེལ་རིམ་མདོ་ཙམ་ངོ་སྤྲོད་གནང་རྗེས་དེང་གི་འཛམ་གླིང་སྤྱི་དང་། བྱེ་བྲག་རྒྱ་ནག་གི་ཆབ་སྲིད་ཀྱི་གནས་བབ་ཁྲོད་བོད་ཀྱི་རྩ་དོན་ལ་གོ་སྐབས་དང་གདོང་ལེན་བྱ་དགོས་ཇི་ཡོད་རྟོག་ཞིབ་དགོས་པའི་ལམ་སྟོན་གནང་ཡོད་པ་རེད།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་རྒྱ་འབྲེལ་མོལ་གྱི་འཕེལ་རིམ་ངོ་སྤྲོད་དང་། ཕྱི་ལོ་ ༢༠༡༠ ནས་བཟུང་བོད་རྒྱ་གཉིས་བར་འབྲེལ་མོལ་བྱུང་མེད་ནའང་། རྒྱ་ནག་ལྷན་དུ་སྒོ་རྒྱབ་ཀྱི་འབྲེལ་བ་ཞིག་ཡོད་པ་གསལ་སྟོན་གནང་ཡོད་ལ། འོན་ཀྱང་འབྲེལ་བ་དེ་ལ་བརྟེན་ནས་འཕྲལ་དུ་གྲུབ་འབྲས་སོན་པའི་རེ་བ་མེད་པ་གསུངས། དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་ནས་བོད་མཐོ་སྒང་གི་ཁོར་ཡུག་གི་གལ་གནད་སྤྱི་དང་། བྱེ་བྲག་ཏུ་བོད་ནས་ཐོན་པའི་གཙང་ཆུ་ཆེ་ཁག་དེ་དག་ནི་ཨེ་ཤི་ཡའི་མི་མང་འབུམ་ཕྲག་མང་པོའི་འཚོ་རྟེན་དུ་གྱུར་ཡོད་ལ། ད་ལྟའི་ཆར་རྒྱ་ནག་གཞུང་གིས་གཙང་ཆུ་དེ་དག་ལ་ཆུ་མཛོད་ཚད་ལས་འགལ་བ་བརྒྱབ་སྟེ། གཤམ་དུ་གནས་པའི་ཡུལ་ལུང་ཚོར་ཆུ་ལོག་གི་ཉེན་ཁ་བཟོ་གི་ཡོད་པ་མ་ཟད། གཙང་ཆུ་དེ་དག་ཆབ་སྲིད་ཀྱི་ལག་ཆར་ཡང་བེད་སྤྱོད་བྱེད་ཀྱི་ཡོད་པ་སོགས་གསུངས་གྲུབ་མཚམས་སློབ་གྲྭ་དང་བཟོ་རིག་སྒྱུ་རྩལ་ཁང་སོ་སོར་གཟིགས་སྐོར་གནང་ཡོད།
ཉིན་རྒྱབ་སྲིད་སྐྱོང་མཆོག་ནས་ཁེ་ར་འདོད་རྒུ་གླིང་དུ་འཚམས་གཟིགས་དང་གོང་དཀར་ཆོས་སྡེར་གནས་གཟིགས་གནང་རྗེས་བྷ་ལུ་ཝ་ལར་ཕེབས་ཏེ་གཞིས་མི་མང་ཚོགས་ཐུག་འཕྲད་གནང་བ་མ་ཟད། ཕྱི་དྲོ་ལ་ཁན་ཝ་ལར་ཆེད་ཕེབས་གནང་གྲུབ་མཚམས་ཧར་པ་སྤུར་ཁྱབ་ཁོངས་གཞིས་མི་རྣམས་ནས་ཕེབས་བསུའི་གཞས་སྣ་གཟིགས་འབུལ་ཞུས་ཡོད། དཔལ་ལྡན་སྲིད་སྐྱོང་མཆོག་ཧར་པ་སྤུར་ཁུལ་དུ་ཆེད་ཕེབས་གནང་སྐབས་ཧར་པ་སྤུར་ས་གནས་འགོ་འཛིན་སྒྲོལ་མ་ཚེ་རིང་ལགས་དང་། ས་འཐུས་ཚོགས་གཙོ་བསྟན་འཛིན་གསུང་རབ་ལགས། རང་བདེན་ཚོགས་ཆུང་གི་ཚོགས་གཙོ་ཐུབ་བསྟན་རྒྱལ་མཚན་ལགས་ནས་ཕེབས་བསུ་ཞུས་ཡོད།
དཔལ་ལྡན་སྲིད་སྐྱོང་མཆོག་ལྷན་དུ་ནང་སྲིད་དྲུང་འཕར་བཀྲ་ཤིས་བདེ་སྐྱིད་ལགས་དང་། འཕྲོད་བསྟེན་ལས་ཁུངས་ཀྱི་འབྲེལ་ལས་པདྨ་གཡུ་སྒྲོན་ལགས། དཔལ་འབྱོར་སྤྱི་ཚོགས་ཡར་རྒྱས་ཐེབས་རྩའི་འབྲེལ་ལས་ཐུབ་བསྟན་རིག་འཛིན་ལགས་ལྷན་བཅར་ཞུས་ཡོད་པ་བཅས།།
