༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༧ ཉིན་རྒྱབ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཧར་པ་པུར་འདོད་རྒུ་གཡུལ་རྒྱལ་གླིང་གི་རྒས་གསོ་ཁང་དང་། ས་གནས་འགོ་འཛིན་ལས་ཁུངས། ས་གནས་འཐུས་ཚོགས་ཀྱི་ལས་ཁུངས། ས་གནས་རང་བདེན་ཚོགས་ཆུང་གི་ལས་ཁུངས། ས་གནས་མཉམ་འབྲེལ་ལས་ཁུངས། ས་གནས་བུད་མེད་དང་གཞོན་ནུ་ལྷན་ཚོགས་ཀྱི་ལས་ཁུངས། ས་གནས་འཕྲོད་བསྟེན་སྨན་ཁང་བཅས་སུ་གཟིགས་སྐོར་གནང་རྗེས་མི་མང་ཚོགས་ཁང་དུ་ཧར་པ་པུར་འདོད་རྒུ་གཡུལ་རྒྱལ་གླིང་ཁྱབ་ཁོངས་གཞིས་མི་མང་ཚོགས་ལ་གསུང་བཤད་གནང་ཡོད། 
སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྐབས་བཅུ་དྲུག་པའི་བཀའ་ཤག་གི་ལས་ཡུན་རིང་བོད་མིའི་སྒྲིག་འཛུགས་དང་མི་མང་བར་འབྲེལ་བ་དམ་ཟབ་གཏང་རྒྱུ་དང་། མི་མང་གི་དགོས་མཁོ་རྟོག་ཞིབ་སླད་ས་གནས་སོ་སོར་ཐེངས་གཉིས་གཟིགས་སྐོར་དུ་ཕེབས་ཀྱི་ཡོད་སྐོར་འགྲེལ་བརྗོད་གནང་བའི་ཁར། བཀའ་ཤག་ངོས་ནས་སྤྱི་སྙོམ་དྲང་བདེན་ལྡན་པའི་ཐོག་ནས་མི་མང་གི་དགོས་མཁོ་གཞིར་བཟུང་སྤྱི་ཚོགས་བདེ་དོན་ལྟ་སྐྱོང་གནང་གི་ཡོད་པ་གསུངས།
དེ་ལྟར་དེང་སྐབས་བོད་མི་མང་དག་ཅིག་ནུབ་ཕྱོགས་རྒྱལ་ཁབ་ཁག་ཏུ་གནས་སྤོས་ཏེ། གཞིས་ཆགས་སྲ་བརྟན་གྱི་དཀའ་ངལ་ཡོད་པ་གང་ཞིག བོད་ནས་རྗེས་འབྱོར་བ་དང་མཐའ་མཚམས་ས་ཁུལ་གནས་སྡོད་བོད་མི་ཁག་ཅིག་ལ་སྡོད་ཁང་མེད་པའི་དཀའ་ངལ་ཡོད་པ་གཉིས་ཁ་སྡུམ་སྟེ། གཞིས་ཆགས་སྲ་བརྟན་ཡོང་སླད་རྗེས་འབྱོར་བོད་མི་སྡོད་ཁང་མེད་མཁན་རིགས་ལ་བོད་མིའི་སྒྲིག་འཛུགས་ནས་གཞིས་ཆགས་ཁག་ཏུ་སྡོད་ཁང་མཐུན་རྐྱེན་སྐྲུན་གྱི་ཡོད་པ་གསལ་བཤད་གནང་།
དེ་བཞིན་དཔལ་ལྡན་སྲིད་སྐྱོང་མཆོག་གིས་གཞིས་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་སྐྱབས་བཅོལ་དུ་ཕེབས་རྗེས་དུས་རབས་དང་བསྟུན་ནས་རྒྱ་གར་ནང་དུ་མང་གཙོའི་ཆ་ལག་ཡོངས་སུ་ཚང་བའི་སྒྲིག་འཛུགས་བསྐྱར་འཛུགས་གནང་བ་ཟད། བོད་མི་རིགས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་པ་མི་ཉམས་རྒྱུན་འཛིན་ཡོང་སླད། སློབ་གྲྭ་དང་གཞིས་ཆགས་ལོགས་སུ་ཟུར་འཛུགས་བཀའ་དྲིན་བསྐྱངས་ཚུལ་རྗེས་དྲན་གནང་ཡོད།
གཞན་ཡང་སྲིད་སྐྱོང་མཆོག་ནས་བཙན་བྱོལ་བོད་མིའི་སྤྱི་ཚོགས་ཡུན་གནས་ཐུབ་རྒྱུ་དང་། འབྱུང་འགྱུར་ཁྲིམས་ཀྱི་དཀའ་ངལ་མི་འཕྲད་པའི་ཆེད་བཅའ་ཁྲིམས་དགོངས་དོན་ལྟར། བོད་མི་རྣམས་ནས་གནས་ཡུལ་གྱི་ཁྲིམས་ལ་བརྩི་སྲུང་གིས་ཚོགས་པ་ཁག་ཁྲིམས་མཐུན་དེབ་སྐྱེལ་དང་། གཞིས་ཆགས་སོ་སོའི་ས་ཆ་བདག་སྲུང་། ཕྱི་དངུལ་ལེན་ཕྱོགས་ཀྱི་ཁྲིམས་སོགས་ཐེ་བའི་གནས་ཡུལ་གྱི་ཁྲིམས་སྒྲིག་ཁག་ལ་གོ་རྟོགས་བརྩི་སྲུང་དགོས་རྒྱུ་གལ་ཆེན་པོ་ཡིན་པ་ནན་བརྗོད་གནང་རྗེས་མི་མང་ཁག་ཅིག་གི་དོགས་དྲིར་ལན་འདེབས་གནང་ཡོད་པ་བཅས།།
