༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༧ སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཧར་པ་པུར་སཾ་བྷོ་ཊ་ཉིན་སློབ་ཏུ་འཚམས་གཟིགས་སུ་ཕེབས་ཡོད་པ་དང་། སྐབས་དེར་སློབ་གྲྭའི་སློབ་སྤྱི་བསོད་ནམས་དཔལ་སྐྱིད་ལགས་གཙོས་པའི་དགེ་ལས་སློབ་ཕྲུག་རྣམས་ནས་ཕེབས་བསུ་ཞུས་ཤིང་། དེ་རྗེས་དཔལ་ལྡན་སྲིད་སྐྱོང་མཆོག་གིས་སློབ་གྲྭའི་འཛིན་ཁང་དང་སྡེ་ཚན་ཁག་ཏུ་གཟིགས་སྐོར་གནང་ཡོད། གཟིགས་སྐོར་གྲུབ་མཚམས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སློབ་གྲྭའི་དགེ་ལས་སློབ་ཕྲུག་རྣམས་ལ་འཕགས་བོད་བར་གྱི་ཆོས་རིག་གི་འབྲེལ་བ་དང་། བོད་མཐོ་སྒང་གི་གལ་གནད་སོགས་ཀྱི་སྐོར་གསུང་བཤད་གནང་ཡོད། དེ་ཡང་དཔལ་ལྡན་སྲིད་སྐྱོང་མཆོག་གིས་དེར་དུས་བོད་རིགས་དང་རྒྱ་གར་བ་དགེ་ལས་སློབ་ཕྲུག་རྣམས་ལ་རྒྱབ་ལྗོངས་མི་འདྲ་བའི་མི་རིགས་གཉིས་སློབ་གྲྭའི་ཁོར་ཡུག་གཅིག་ནང་འཆམ་མཐུན་མཉམ་གནས་ཀྱིས་སློབ་གཉེར་གནང་བཞིན་པ་ནི་མཐུན་སྒྲིལ་གྱི་དཔེ་མཚོན་ཞིག་ཡིན་པས། སློབ་གྲྭའི་དགེ་ལས་སློབ་ཕྲུག་རྣམས་རྗེས་སུ་ཡི་རང་དང་བཅས་བསྔགས་བརྗོད་གནང་བ་མ་ཟད། སླད་མར་སློབ་གྲྭ་དེ་ཉིད་མུ་མཐུད་ཡར་རྒྱས་གོང་འཕེལ་དུ་འགྲོ་བའི་རེ་བ་ཡོད་ཅེས་གསུངས་ཡོད།
དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་བོད་མི་རྣམས་རྒྱ་གར་དུ་བཙན་བྱོལ་དུ་འབྱོར་ཏེ་ལོ་ངོ་ ༦༥ ལྷག་འགྲོ་བཞིན་ཡོད་ནའང་། རྒྱ་གར་མང་ཚོགས་ཁྲོད་བོད་ཀྱི་གནད་དོན་སྐོར་གོ་རྟོགས་ཧ་ཅང་ཞན་པོ་ཡོད་པས། རྒྱ་གར་མང་ཚོགས་སྤྱི་དང་། ཁྱད་པར་དུ་གཞོན་སྐྱེས་རྣམས་ལ་བོད་ཀྱི་གནད་དོན་སྐོར་གོ་རྟོགས་སྤེལ་རྒྱུ་གལ་ཆེར་གཟིགས་ཏེ། རྒྱ་གར་གྱི་མཐོ་སློབ་མཚོན་པའི་སློབ་གྲྭ་ཁག་ཏུ་བོད་དོན་སྐོར་གསུང་བཤད་གནང་གི་ཡོད་པ་ལྟར། ཧར་པ་པུར་སཾ་བྷོ་ཊའི་ཉིན་སློབ་ནང་དུའང་ས་གནས་རྒྱ་གར་ཡུལ་མིའི་སློབ་ཕྲུག་མང་དག་ཅིག་སློབ་གཉེར་གནང་གི་ཡོད་སྟབས། བོད་དོན་སྐོར་གསུང་བཤད་གནང་རྒྱུ་གལ་ཆེར་གཟིགས་ཀྱི་ཡོད་ཅེས་གསུངས་དོན་ལྟར། དེར་འདུས་དགེ་ལས་སློབ་གཉེར་བ་རྣམས་ལ་བོད་དང་རྒྱ་གར་བར་གྱི་ཆོས་རིག་གི་འབྲེལ་བ་དང་བོད་ཀྱི་གལ་གནད་སྐོར་ངོ་སྤྲོད་གནང་།
དེ་ཡང་ཁོང་གིས་བོད་ཀྱི་བཙན་པོ་དང་པོ་རྒྱ་གར་ནས་བྱུང་བར་གྲགས་པའི་ལྷ་སྒྲུང་ནས་འགོ་འཛུགས་ཀྱིས་བོད་ཀྱི་བཙན་པོ་རིམ་བྱོན་སྐབས་རྒྱ་གར་ནས་ནང་པ་སངས་རྒྱས་པའི་བསྟན་པ་རྒྱ་གར་སྐད་ནས་བོད་སྐད་དུ་བསྒྱུར་རིམ་བཞིན་བོད་ནང་དུ་ནང་བསྟན་དར་འཕེལ་འབྱུང་རིམ་དང་། ལྷག་པར་ཆོས་རྒྱལ་སྲོང་བཙན་སྒམ་པོའི་སྐབས་སུ་རྒྱ་གར་གྱི་ཡི་གེའི་གཟུགས་ལ་དཔེ་བལྟས་ཏེ་བོད་ཀྱི་ཡིག་གཟུགས་གསར་བཟོ་གཏན་འབེབས་གནང་རིམ་སོགས་ངོ་སྤྲོད་གནང་ཡོད། དེ་དང་འབྲེལ་ཏེ་ཁོང་གིས་རྒྱ་ནག་གཞུང་གིས་བོད་ས་བཙན་བཟུང་བྱས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་མི་ཁྲི་ཕྲག་འགའ་ཤས་རྒྱ་གར་དུ་སྐྱབས་བཅོལ་དུ་ཕེབས་ཡོད་པ་དང་། སྐབས་དེར་རྒྱ་གར་གཞུང་ནས་རྒྱབ་སྐྱོར་ཕན་གྲོགས་གནང་ཡོད་པ་མ་ཟད། དུས་ད་ལྟ་བར་དུ་རྒྱ་གར་གཞུང་དམངས་གཉིས་ནས་བོད་མི་རྣམས་ལ་སྤྱི་ཚོགས་བདེ་དོན་ཐོག་རྒྱབ་སྐྱོར་གཡོ་མེད་གནང་ཡོད་པ་གསུངས།
དེ་མཚུངས་དཔལ་ལྡན་སྲིད་སྐྱོང་མཆོག་གིས་བོད་མཐོ་སྒང་ནི་འཛམ་གླིང་གི་ཡང་རྩེའམ། འཛམ་གླིང་གི་སྣེ་གསུམ་པ། ཡང་ན། ཨེ་ཤི་ཡའི་ཆུ་མཛོད་ཅེས་གྲགས་པ་ལྟར་བོད་མཐོ་སྒང་གི་ཁོར་ཡུག་དེ་འཛམ་གླིང་སྤྱི་དང་། བྱེ་བྲག་ཏུ་ཨེ་ཤི་ཡར་ཧ་ཅང་གལ་གནད་ཆེན་པོ་ཆགས་ཡོད་ཅིང་། ལྷག་པར་བོད་ནས་ཐོན་པའི་གཙང་ཆུ་དེ་དག་ནི་ཨེ་ཤི་ཡའི་མི་མང་འབུམ་ཕྲག་མང་པོའི་འཚོ་རྟེན་དུ་གྱུར་ཡོད་པ་མ་ཟད། འཛམ་གླིང་གི་དཔལ་ཡོན་རྙིང་གྲས་སེངྒེ་གཙང་པོའི་དཔལ་ཡོན་དང་། རྒྱ་ནག་གི་དཔལ་ཡོན་གཉིས་ཀྱང་བོད་ཀྱི་གཙང་ཆུར་རྟེན་ཡོད་པ་གསལ་སྟོན་གནང་བའི་ཐོག ད་ལྟའི་ཆར་རྒྱ་ནག་དམར་ཤོག་གཞུང་གིས་བོད་ནང་གི་གཙང་ཆུ་དེ་དག་ལ་ཆུ་མཛོད་ཚད་ལས་འགལ་བ་རྒྱག་གི་ཡོད་ལ། ལྷག་པར་ཡར་ཀླུང་གཙང་པོར་འཛམ་གླིང་གི་ཆུ་མཛོད་ཆེ་ཤོས་དེ་རྒྱག་གི་ཡོད་ཅིང་། ས་འགུལ་རྒྱག་སླ་བའི་ས་གནས་དེ་ལྟ་བུ་ཞིག་ཏུ་ཆུ་མཛོད་ཆེན་པོ་བརྒྱབ་པ་ནི། གཤམ་འོག་མི་མང་པོའི་བདེ་འཇགས་ལ་ཉེན་ཁ་བཟོ་གི་ཡོད་པ་གསལ་སྟོན་གནང་ཡོད། །
