༄༅། །འདི་གར་ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༩ ཚེས་ ༡༡ རེས་གཟའ་ལྷག་པའི་ཉིན་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་གོ་སྒྲིག་འོག ཐའེ་ཝན་གྱི་རྒྱལ་ས་ཐའེ་པེ་རུ་བོད་བརྒྱུད་ནང་བསྟན་དང་རྒྱ་བརྒྱུད་ནང་བསྟན། ལྷོ་བརྒྱུད་ནང་བསྟན་གྱི་བླ་ཆེན་སོགས་གནད་ཡོད་མི་སྣ་ཁག་དང་། བོད་བརྒྱུད་དགེ་འདུན་པ་ལྷན་འཛོམས་ཀྱིས་དྷརྨོའི་གཞུང་ཆེན་བཞི་བོད་བསྒྱུར་དེབ་གསར་འགྲེམས་སྤེལ་དང་། ནང་བསྟན་དར་སྤེལ་བགྲོ་གླེང་སྐབས་བཅུ་གཉིས་པ་བསྐོང་ཚོགས་གནང་བའི་དབུ་འབྱེད་མཛད་སྒོར་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་དང་། ཐའེ་ཝན་སྐུ་ཚབ་དོན་གཅོད་སྐུ་མགྲོན་གཙོ་བོར་གདན་ཞུས་ལྟར་མཉམ་བཅར་ཞུས་ཡོད་པ་མ་ཟད། ཚོགས་ཐོག་ཏུ་གསུང་བཤད་ཀྱང་གནང་ཡོད་པ་རེད།
དེ་ཡང་མཛད་སྒོའི་ཐོག་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་རྫོང་སར་མཁན་པོ་ཚེ་དབང་རིག་འཛིན་ལགས་ནས་ཚོགས་འདུ་དབུ་འབྱེད་ཀྱི་གསུང་བཤད་ནང་། ཚོགས་འདུར་ཆེད་ཕེབས་སྐུ་མགྲོན་རྣམས་ཀྱི་མཚན་འབོད་དགའ་བསུའི་འཚམས་འདྲི་ཞུས་པ་དང་ཆབས་ཅིག ཞིབ་འཇུག་ཚོགས་པའི་དམིགས་ཡུལ་དང་ལས་དོན་ཇི་སྤེལ། ལོ་མང་སྔོན་ནས་འགོ་འཛུགས་ཀྱིས་ཐེ་ཝན་ས་གནས་སུ་རྒྱ་བརྒྱུད་ནང་བསྟན་དང་ལྷོ་བརྒྱུད་ནང་བསྟན། བོད་བརྒྱུད་ནང་བསྟན་བཅས་བརྒྱུད་པ་གསུམ་མཉམ་ལས་དང་། ཕན་ཚུན་གོ་རྟོགས་སྤེལ་རེས། དེའང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་བཞིན་ཆོས་ལུགས་ཡོངས་རྫོགས་མཉམ་འདྲེན་བྱེད་ཐུབ་ན་རབ་དང་། མ་མཐའ་ཡང་སྟོན་པ་གཅིག་གི་རྗེས་འཇུག་ཚང་མས་ནུས་པ་མཉམ་སྤུང་བྱེད་རྒྱུ་དེ་ཧ་ཅང་གལ་ཆེན་པོ་མཐོང་བས་བརྒྱུད་གསུམ་བགྲོ་གླེང་དང་སྟོན་པའི་འཁྲུངས་སྐར་གཅིག་གྱུར་སྲུང་བརྩི་ཞུ་ཐབས་ལས་དོན་འགོ་འཛུགས་ཟིན་པ་དང་། གྲུབ་འབྲས་ཀྱང་ཧ་ཅང་ཆེན་པོ་ཐོན་ཡོད་པའི་སྐོར་ངོ་སྤྲོད་དང་འབྲེལ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་རྒྱ་བརྒྱུད་ནང་བསྟན་དང་། ལྷག་པར་བསམ་གཏན་ཆོས་ལུགས་ལ་ཧ་ཅང་ཤུགས་རྐྱེན་ཆེ་བའི་སློབ་དཔོན་ཆེན་པོ་བྷོ་དྷི་དྷརྨོའི་གཞུང་ཆེན་ཁག་བཞི་བོད་བསྒྱུར་གནང་རྒྱུ་དེ་ཧ་ཅང་གལ་ཆེན་པོ་མཐོང་སྟེ་ལོ་སྔོན་མར་ཞིབ་འཇུག་ཚོགས་པའི་ཚོགས་མི་ལོ་ཙཱ་བ་མཁན་པོ་རྫ་ཚེ་རིང་བཀྲ་ཤིས་ལགས་ལ་འབོད་སྐུལ་ཞུས། ཁོང་ནི་བོད་ཀྱི་ཕྱི་ནང་གི་ཤེས་ཡོན་ཙམ་མིན་པ་སྟེགས་མདོ་སོགས་སྐད་ཡིག་གཞན་དུ་ཡོད་པ་ཁག་གཅིག་བོད་ཡིག་བསྒྱུར་བའི་ལོ་ཙ་བའི་ཉམས་མྱོང་ཡང་ཕུན་སུམ་ཚོགས་པ་ཡོད་པ་མ་ཟད། ཁོང་གིས་ཀྱང་དགའ་སྤྲོ་ཆེན་པོའི་དང་ལེན་གནང་ནས་དེ་རིང་ལས་དོན་ཡོངས་སུ་གྲུབ་སྟེ། ཕྱག་དེབ་དངོས་སུ་དབུ་འབྱེད་ཐུབ་པའི་སྐལ་བ་བཟང་པོ་བྱུང་ཡོད་པས། ཁོང་ལ་དམིགས་བསལ་བཀའ་དྲིན་ཆེ་ཞུ་རྒྱུ་ཡིན་བཅས་གསུངས།
དེ་ནས་ཚོགས་བཞུགས་སྐུ་མགྲོན་ཐའེ་ཝན་རྒྱ་བརྒྱུད་ནང་པའི་གནས་བརྟན་རྒན་པ་མིན་བཀྭང་ཧྥ་ཧྲི་ལགས་དང་། ཐའེ་ཝན་སྤྱི་ཚོགས་ལ་སྙན་གྲགས་དང་ཤུགས་རྐྱེན་ཆེ་བའི་རྒྱའི་སློབ་དཔོན་ཧྭ་ཙང་ལགས་སོགས་མཁན་པོ་ཁག་ཅིག་ནས་གསུང་བཤད་གནང་རྗེས། སྐུ་མགྲོན་གཙོ་བོ་སྐུ་ཚབ་དོན་གཅོད་འབའ་བ་བསྐལ་བཟང་རྒྱལ་མཚན་ལགས་ནས་ཉེ་བའི་ལོ་ཤས་རིང་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་འདས་པའོ་ལོ་ཤས་རིང་ཆོས་ལུགས་ཕན་ཚུན་བར་མཐུན་ལམ་དང་ནུས་པ་མཉམ་སྤུངས་ཐོག་སྟོན་པའི་འཁྲུངས་སྐར་སྲུང་བརྩི་ཞུ་ཐབས་སོགས་སྐོར་ཕྱག་ལས་རྒྱ་ཆེ་གནང་བར་རྗེས་སུ་ཡི་རང་དང་བསྔགས་བརྗོད་ཞུས་པ་མ་ཟད། དམིགས་བསལ་རྒྱ་ལུགས་གསུང་རབ་བོད་བསྒྱུར་གྱི་གལ་ཆེའི་རང་བཞིན་དང་། ལས་གཞི་འདི་ཉིད་བརྒྱུད་ནས་ཐའེ་ཝན་གྱི་ས་གནས་ཀྱི་ནང་པ་དང་བོད་བརྒྱུད་ནང་བསྟན་གྱི་བར་ལ་ཕན་ཚུན་གོ་རྟོགས་སྤེལ་རེས་དང་མཐུན་ལམ་གོང་འཕེལ་སོགས་ཀྱི་ཐད་གལ་ཆེའི་ནུས་པ་ཐོན་ངེས་ཡིན་པས། དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་བཞེད་དགོངས་གཉིས་པ་ལག་ལེན་དངོས་སུ་བསྟར་བ་ཞིག་ཡིན་སྟབས། ལས་དོན་དེ་དག་གི་སྐོར་སྐུ་ཚབ་དོན་གཅོད་ལས་ཁུངས་ནས་རྒྱབ་སྐྱོར་བརྒྱ་ཆ་བརྒྱ་ཐམ་པ་ཡོད་ལ། མཐུན་འགྱུར་གང་ཐུབ་ཞུ་རྒྱུ་ཡིན་པའི་གདེངས་འཇོག་གི་གསུང་བཤད་གནང་ཡོད་པ་རེད།
དེ་རྗེས་དམིགས་བསལ་སྐུ་མགྲོན་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་ནས་གལ་ཆེའི་བླང་དོར་བཀའ་སློབ་གནང་གྲུབ་མཚམས། སྐུ་ཚབ་དོན་གཅོད་སོགས་སྐུ་མགྲོན་རྣམ་པ་ཐུན་མོང་ནས་དེབ་གསར་དབུ་འབྱེད་མཛད་པ་དང་། དྷརྨོའི་རྒྱ་ལུང་རྣམ་བཞིའི་བོད་བསྒྱུར་གྱི་ལོ་ཙཱ་བ་རྫ་ཚེ་རིང་བཀྲ་ཤིས་ལགས་དང་ཞོན་ཙང་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཀྲའོ་ཧུས་ཧྥ་ཧྲི་ལགས་གཉིས་ཀྱིས་དེབ་གསར་གྱི་ནང་དོན་དང་འབྲེལ་བའི་བགྲོ་གླེང་གནང་གྲུབ་རྗེས། ཞིབ་འཇུག་ཚོགས་པའི་འགན་འཛིན་རྒྱུན་ལས་བླ་མ་ཡོན་ཏན་རིན་པོ་ཆེ་མཆོག་གིས་ཐུགས་རྗེ་ཆེ་ཞུའི་གཏམ་བཤད་བཅས་གནང་མཐར་སྔ་དྲོའི་ལས་རིམ་རྒྱལ་ཁའི་ངང་གྲོལ་ཡོད་པ་རེད།
ཕྱི་དྲོ་མུ་མཐུད་ཞིབ་འཇུག་ཚོགས་པའི་སྐབས་བཅུ་གཉིས་པའི་བོད་བརྒྱུད་ནང་བསྟན་དར་སྤེལ་བགྲོ་གླེང་ཚོགས་འདུའི་བརྗོད་གཞི་དང་འབྲེལ་བའི་གསུང་བཤད་གནང་མཁན་ཞིབ་འཇུག་ཚོགས་པའི་འགན་འཛིན་གཞོན་པ་སེར་བྱེས་དགེ་བཤེས་སྣང་སྣང་ལགས་ཀྱིས་སྟོན་པའི་འཁྲུངས་སྐར་དང་གུ་རུའི་འབུམ་ཚོགས་སོགས་ཐའེ་ཝན་བོད་བརྒྱུད་ནང་བསྟན་རྗེས་འཇུག་པ་ཐུན་མོང་གི་མཛད་སྒོ་ཁག་དང་འབྲེལ་བའི་གསུང་བཤད་གནང་བ་དང་། ཞིབ་འཇུག་ཚོགས་པའི་ཚོགས་གཞོན་རྫོང་སར་མཁན་པོ་ངག་དབང་མཁས་གྲུབ་ལགས་ཀྱིས་ཐའེ་བཞུགས་དགེ་འདུན་པ་དག་གི་ཡིག་ཆ་མཐོང་མཆན་ཞུ་ཕྱོགས་དང་། ས་གནས་འདིར་ཕེབས་ཟིན་པ་དག་གིས་རྒྱུན་གྱི་སྤྱོད་ལམ་ཁུར་སྟངས་དང་ས་གནས་ཀྱི་རིག་གནས་གོམས་གཤིས་སོགས་དང་འབྲེལ་བའི་གསུང་བཤད་གནང་བར་ཚོགས་ཞུགས་པ་རྣམས་ཀྱིས་དེའི་ཐོག་ལ་དྲི་བ་དྲིས་ལན་གྱི་བགྲོ་གླེང་ལྷུག་པོར་གནང་ཡོད།
ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་ལོ་མང་རིང་བརྒྱུད་གསུམ་བགྲོ་གླེང་ཚོགས་འདུ་དང་། བོད་བརྒྱུད་ནང་བསྟན་དར་སྤེལ་གྱི་བགྲོ་གླེང་ཚོགས་འདུ་སོགས་འཚོགས་བཞིན་ཡོད་པ་དང་། དེའི་དམིགས་ཡུལ་གཙོ་བོ་ཡང་སྤྱིར་ལྷོ་བརྒྱུད་རྒྱ་བརྒྱུད་བོད་བརྒྱུད་དེ་ནང་བསྟན་བརྒྱུད་པ་གསུམ་གྱི་ཆོས་གྲོགས་ཕན་ཚུན་བར་སྔར་ལས་ལྷག་པའི་ཤེས་རྟོགས་དང་། གོ་རྟོགས་སྤེལ་རེས། མཉམ་འབྲེལ་མཉམ་ལས་སོགས་ཡོང་བ་འབའ་ཞིག་གི་ཆེད་དུ་ཡིན་འདུག་པ་དང་། དེ་ལས་ཀྱང་ཚོགས་པ་འདི་ཐའེ་ཝན་དུ་རྟེན་གཞི་བྱེད་པ་ཞིག་ཡིན་པའི་ངོས་ནས་ཐའེ་ཝན་དུ་ཡོད་པའི་རྒྱ་བརྒྱུད་ནང་བསྟན་གྱི་ཆོས་གྲོགས་དག་དང་མཉམ་དུ་འབྲེལ་ལམ་འཛིན་རྒྱུ་དང་། ཕན་ཚུན་གུས་བཀུར་དང་བརྩི་མཐོང་སློབ་སྦྱོང་བཅས་བྱ་རྒྱུ་ནི་ཧ་ཅང་གནད་འགག་ཆེན་པོར་བརྩི་མཁན་གྱི་ཚོགས་པ་ཆགས་ཡོད།
ད་ཐེངས་ཀྱི་གླེང་སྟེགས་དེར་ད་དུང་རྒྱ་གར་པཎ་གྲུབ་བཅུ་བདུན་གྱི་གསུང་འབུམ་དེང་དུས་ཚན་རྩལ་ལག་རྩལ་ལ་བརྟེན་ནས་སྐད་ཡིག་བཅུ་བདུན་ཙམ་སྐོར་འགྲེལ་པ་ཞིབ་ཕྲ་ཡོད་པའི་ལས་འཆར་སྐོར་ལའང་བགྲོ་གླེང་གནང་ཡོད་པ་བཅས། བགྲོ་གླེང་ཚོགས་འདུ་དེ་བཞིན་དོན་དམ་ལྡན་པ་ཞིག་བྱུང་འདུག །
