༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༡༤ ཉིན་ཉི་འོང་དུ་བོད་སོག་གི་འབྲེལ་བ་དང་། ཕྱི་ལོ་ ༡༩༡༣ ལོར་བོད་སོག་བར་ཆིངས་ཡིག་བཞག་སྟེ་ལོ་ངོ་ ༡༡༠ འཁོར་བའི་དུས་དྲན་སྲུང་བརྩིའི་ཚོགས་འདུའི་ཐོག་སྒྲོགས་སྦྱང་གནང་བའི་དཔྱད་རྩོམ་ཕྱོགས་སྒྲིག་ཞུས་པའི་དུས་དེབ་དབུ་འབྱེད་གནང་ཡོད།
དུས་དེབ་དབུ་འབྱེད་མཛད་སྒོའི་ཐོག་ཉི་འོང་གི་མཁས་པ་མི་ཨུ་ར་ཀོ་ཏ་རོ་ལགས་ཀྱིས་ཚོགས་འདུའི་ཚོགས་མི་དང་མཉམ་ཞུགས་པ་རྣམས་ལ་ཕེབས་བསུ་ཞུས་ཐོག་བགྲོ་གླེང་ཚོགས་འདུ་གཙོ་སྐྱོང་གནང་ཡོད་པ་དང་། ན་ཀ་ནོའི་ས་གནས་འཐུས་ཚོགས་ཀྱི་འཐུས་མི་ཡོ་ཤི་ད་ཀོ་ཨི་ཆི་རོ་ལགས་ཀྱིས་མཉམ་ཞུགས་པ་རྣམས་ལ་འཚམས་འདྲི་དང་སྦྲགས། ད་ལྟ་བར་དུ་སྣང་མེད་དུ་ལུས་པའི་སོག་པོ་དང་བོད་ཀྱི་རང་བཙན་གྱི་གནད་དོན་སྐོར་གྱི་ལོ་རྒྱུས་ཀྱི་ཡིག་ཆ་གལ་ཆེན་ཞིག་པར་སྐྲུན་གནང་བར་གོ་སྒྲིག་པ་རྣམས་ལ་བསྔགས་བརྗོད་ཞུས་པའི་ཐོག བོད་དང་ལྷོ་སོག་གི་དྲང་བདེན་དང་རང་དབང་འཐབ་རྩོད་ལ་རྒྱབ་སྐྱོར་ཡོད་པ་གསུངས།
ཉི་འོང་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་ཀྱིས་གོ་སྒྲིག་པ་རྣམས་ནས་ཁོང་མགྲོན་འབོད་གནང་བར་ཐུགས་རྗེ་ཆེ་ཞུས་པ་དང་འབྲེལ། ལོ་རྒྱུས་དང་། རིག་གཞུང་། སྐད་ཡིག་བཅས་ཀྱི་གལ་གནད་སྐོར་དང་། རྒྱ་ནག་དམར་ཤོག་གཞུང་གིས་སོག་པོ་དང་བོད་མིའི་ངོ་བོ་རྩ་མེད་བཟོ་ཐབས་བྱེད་ཀྱི་ཡོད་པ་མ་ཟད། རྒྱ་ནག་གི་ཆབ་སྲིད་ཀྱི་དགོས་མཁོར་བསྟུན་ཏེ་ལོ་རྒྱུས་འཁྱོག་བཤད་ལོག་འགྲེལ་བྱེད་ཀྱི་ཡོད་པ་གསུངས། དེ་བཞིན་ཁོང་གིས་ཡོན་རྒྱལ་རབས་དང་ཆིང་རྒྱལ་རབས་སྐབས་ཀྱི་དབང་སྒྱུར་ལ་གཞི་བཅོལ་ནས་རྒྱ་ནག་གིས་སོག་པོ་དང་བོད་ལ་བདག་དབང་ཡོད་ཚུལ་བཤད་པ་དེ་གཞི་རྩ་མེད་པ་དང་། ལོ་རྒྱུས་ཀྱི་དངོས་དོན་དང་མཐུན་གྱི་མེད་པ་གསུངས་པའི་ཐོག བོད་སོག་བར་གྱི་ཕྱི་ལོ་ ༡༩༡༣ ལོའི་ཆིངས་ཡིག་གི་ཁྲིམས་མཐུན་རང་བཞིན་སྐོར་འགྲེལ་བརྗོད་གནང་རྗེས་ཉི་འོང་སྐད་ཐོག་པར་སྐྲུན་ཞུས་པའི་དུས་དེབ་དེ་ཉིད་ཨིན་ཡིག་ཐོག་ཕབ་སྒྱུར་དཔར་སྐྲུན་ཞུ་རྒྱུའི་ཞལ་བཞེས་གནང་ཡོད་པ་རེད།
དེ་མཚུངས་སོག་པོའི་རིག་གནས་ཐོག་མཁས་པ་འབུམ་རམས་པ་མི་ཡ་ཝ་ཀི་ཇུན་ཀོ་ལགས་ཀྱིས་མང་ཚོགས་ལ་དོན་དངོས་སུ་རྒྱ་ནག་རྒྱལ་ཁབ་ཀྱི་གྲུབ་ཆ་དང་། བོད་དང་སོག་པོ་ལྟ་བུའི་ས་ཁུལ་སོགས་བཙན་བཟུང་བྱས་པའི་མངའ་ཁོངས་ཡིན་ཚུལ་སྐོར་གསལ་བཤད་གནང་བ་མ་ཟད། རྒྱ་ནག་གཞུང་གིས་ཇིང་གིར་རྒྱལ་པོ་དང་ཁོང་གི་རྒྱལ་བརྒྱུད་རྒྱ་མི་ཡིན་ཚུལ་བཤད་པ་ནི་ལོ་རྒྱུས་ལ་ལོག་འགྲེལ་བྱས་པ་མ་ཟད། རྒྱལ་སྤྱིའི་སྤྱི་ཚོགས་ལ་བསླུ་བྲིད་བཏང་བ་ཡིན་ཞེས་སྐྱོན་བརྗོད་གནང་ཡོད།
ལྷོ་སོག་གྲོས་ཚོགས་ཀྱི་ཚོགས་གཞོན་ཨོལ་ཧོ་ནུད་ད་ཡི་ཆིན་ལགས་ཀྱིས་བོད་སོག་འབྲེལ་ལམ་ཚོགས་འདུའི་དཔྱད་རྩོམ་པར་སྐྲུན་གནང་མཁན་འབྲེལ་ཡོད་རྣམས་ལ་ཐུགས་རྗེ་ཆེ་ཞུས་པ་དང་ཆབས་ཅིག བོད་སོག་བར་གྱི་ཕྱི་ལོ་ ༡༩༡༣ ལོའི་ཆིངས་ཡིག་དེ་ད་དུང་ཡང་ཁྲིམས་མཐུན་ཡིན་པ་དང་། མཁས་པ་རྣམས་ཀྱིས་དེར་ངོས་འཛིན་གནང་དགོས་པའི་གསུང་བཤད་གནང་། དེ་མ་ཟད་ཁོང་གིས་བོད་དང་སོག་པོའི་དབར་གྱི་ལོ་རྒྱུས་ཀྱི་འབྲེལ་བ་དེ་རྒྱ་ནག་ལས་གཏིང་ཟབ་པ་ཡོད་པ་དང་། རྒྱ་ནག་ལ་ཡོན་རྒྱལ་རབས་ཀྱི་བདག་དབང་ཡོད་ཚུལ་བཤད་པ་དེ་རྫུན་མ་དང་བསླུ་བྲིད་ཡིན་པ་གསུངས་ཡོད།
ཀོ་བེ་གཙུག་ལག་སློབ་གཉེར་ཁང་ (Kobe University) གི་སློབ་དཔོན་གོབ་རུད་ཨར་ཆ་ལགས་དང་། ཐོ་ཨིན་གཙུག་ལག་སློབ་གཉེར་ཁང་(Toin University) གི་སློབ་དཔོན་ཨེ་སི་བོ་ཡན་ཊི་ལགས་གཉིས་ཀྱིས་རྒྱ་ནག་གིས་ལྷོ་སོག་པོ་ཇི་ལྟར་བཙན་བཟུང་བྱས་པ་དང་། ས་གནས་དང་མང་ཚོགས་རྒྱ་རིགས་སུ་བསྒྱུར་ཆེད་བཙན་དབང་གི་སྲིད་བྱུས་ལག་བསྟར་བྱེད་ཚུལ་འགྲེལ་བརྗོད་གནང་བའི་ཁར། རྒྱ་རིགས་མང་པོ་ས་ཁུལ་དེར་གནས་སྤོས་བྱས་པས་སོག་པོ་རྣམས་རང་ཡུལ་དུ་གྲངས་ཉུང་མི་རིགས་སུ་གྱུར་ཡོད་པ་དང་། ཁོང་ཚོའི་རང་དབང་གི་འཐབ་རྩོད་ལ་རྒྱལ་སྤྱིའི་སྤྱི་ཚོགས་ཀྱི་རྒྱབ་སྐྱོར་དགོས་པའི་འབོད་སྐུལ་ཞུས་རྗེས་ཚོགས་བཅར་བ་རྣམས་ཀྱི་དོགས་དྲི་ཁག་ལ་གསུང་བཤད་པ་རྣམས་ནས་ལན་འདེབས་གསལ་བཤད་གནང་ཡོད་པ་བཅས།། 
