༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༨ རེས་གཟའ་ཉི་མ་ཉིན་ཉི་འོང་དོན་གཅོད་ཁང་ནས་བོད་ཀྱི་མང་གཙོ་དུས་ཆེན་ཐེངས་ ༦༤ སྲུང་བརྩི་ཞུས་ཡོད། སྐབས་དེར་ (Tokyo) གནས་སྡོད་བོད་མི་རྣམས་དངོས་སུ་མཉམ་ཞུགས་དང་། ཀོ་རི་ཡར་གནས་སྡོད་བོད་མི་རྣམས་ནས་དྲ་ཐོག་མཉམ་ཞུགས་གནང་ཡོད།
དེ་ཡང་ཕྱི་ལོ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཆིབས་བསྒྱུར་བསྐྱངས་མ་ཐག་བོད་མིའི་འཛིན་སྐྱོང་དེ་བཞིན་མང་གཙོའི་ལམ་ལུགས་ལྟར་དགོས་རྒྱུའི་དགོངས་བཞེས་གནང་ཡོད་པ་དང་། འདི་ལོར་མང་གཙོ་དབུ་བརྙེས་ཏེ་ལོ་ངོ་ ༦༤ འཁོར་གྱི་ཡོད་པ་རེད།
ཉི་འོང་དོན་ཁང་གི་ལས་བྱེད་བཀྲ་ཤིས་དབྱངས་འཛོམས་ལགས་ཀྱིས་ཐོག་མར་འཚམས་འདྲི་དང་སྦྲགས་མཛད་སྒོ་གཙོ་སྐྱོང་གནང་ཡོད་པ་དང་། ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་། ཉི་འོང་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་ཤེས་རབ་ལགས་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཇལ་དར་ཕུལ་རྗེས་ཚོགས་བཅར་བ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་དང་། མང་གཙོ་གསར་གཞས་བཅས་དབྱངས་སུ་གྱེར།
དེ་ནས་ཨརྱ་ཚེ་དབང་རྒྱལ་པོ་ལགས་ཀྱིས་བཀའ་ཤག་སྐབས་བཅུ་དྲུག་པ་དང་། བོད་མི་མང་སྤྱི་འཐུས་ལྷན་ཚོགས་སྐབས་བཅུ་བདུན་པའི་གསུང་བཤད་ངོ་སྤྲོད་མདོར་བསྡུས་གནང་བ་དང་ཆབས་ཅིག མང་གཙོ་ཉིན་མོའི་གལ་གནད་དང་། མང་གཙོའི་སྒྲིག་འཛུགས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ལ་སྩལ་བའི་ཕྱག་རྟགས་ཡིན་པའི་སྐོར་གསུངས། དེ་བཞིན་ཁོང་གིས་ཚོགས་བཅར་བ་རྣམས་ནས་མང་གཙོའི་ལམ་ལུགས་ཤེས་དགོས་གལ་དང་། མི་མང་རྣམས་ནས་དེར་མཇུག་སྐྱོང་བྱ་རྒྱུ་ལས་ལྷག་པའི་ཕྱག་རྟགས་ཡག་ཤོས་ཤིག་མེད་ཅེས་གསུངས། མ་ཟད་ཁོང་གིས་ཉེ་ལམ་ཨ་རིའི་སྲིད་གཞུང་གིས་བོད་རྒྱའི་དཀའ་རྙོག་གི་ཁྲིམས་ཡིག་གཏན་འབེབས་གནང་བའི་སྐོར་དང་། ལྷོ་ཀོ་རི་ཡའི་སྐོར་བསྐྱོད་སོགས་ཀྱི་སྐོར་འགྲེལ་བརྗོད་གནང་།
དེ་རྗེས་ཉི་འོང་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་ཤེས་རབ་ལགས་དང་། ཀོ་རི་ཡའི་བོད་ཁང་གི་དགེ་བཤེས་ནམ་མཁའ་ལགས། ལྷོ་ཀོ་རི་ཡའི་བོད་རིགས་མཐུན་ཚོགས་ཀྱི་དགེ་བཤེས་བསྟན་འཛིན་བཟང་པོ་ལགས་བཅས་ནས་རིམ་བཞིན་མང་གཙོའི་གལ་གནད་དང་། སོ་སོའི་གནས་སྡོད་ས་གནས་སུ་ལས་འགུལ་སྤེལ་བ་ཁག་གི་སྐོར་ངོ་སྤྲོད་གནང་།
སྐབས་དེར་ཚོགས་བཅར་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གོ་སྟོན་སྲུང་བརྩི་ཞུ་རྒྱུའི་སྐོར་དང་། ཚོགས་མི་གསར་པའི་འོས་བསྡུ། དེ་བཞིན་བོད་མི་རྣམས་ནས་ཉི་འོང་དང་རྒྱལ་ཁབ་གཞན་པའི་མི་རིགས་དང་ལྷན་འབྲེལ་གཏུག་དང་། རིག་གཞུང་འདུ་འཛོམས་སོགས་གོ་སྒྲིག་གནང་རྒྱུ་སྐོར་གྲོས་བསྡུར་གནང་ཡོད་པ་བཅས།།
