༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༢ ཉིན་ཀརནཱ་ཊཀ་མངའ་སྡེའི་སོ་ནམ་ཞིང་ལས་ཀྱི་ཟུང་སྦྲེལ་དྲུང་ཆེ་ལྕམ་སྐུ་དི་པ་ཇཱ་ལགས་སྦེལ་ཀོབ་བོད་མིའི་གཞིས་ཆགས་སུ་ཆགས་པའི་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་དུ་ཆེད་ཕེབས་གནང་ཡོད།
སྐབས་དེར་ལུགས་བསམ་ས་གནས་འགོ་འཛིན་དགེ་ལེགས་འབྱུང་གནས་ལགས་དང་། བདེ་སླར་ས་གནས་འགོ་འཛིན་འཆི་མེད་རྡོ་རྗེ་ལགས་དང་མཇལ་མོལ་གྱིས་ཐན་པའི་དཀའ་ངལ་བྱུང་བར་གུན་གསབ་གནང་ཕྱོགས་དང་། འབྱུང་འགྱུར་གཞིས་ཆགས་སུ་མངའ་གཞུང་ནས་སོ་ནམ་ཞིང་ལས་ཐོག་རོགས་སྐྱོར་གནང་ཐབས་སྐོར་ཞུ་སྐུལ་གནང་བར་ཟུང་དྲུང་ལྕམ་སྐུ་དི་པ་ཇཱ་ལགས་ཀྱིས་རྒྱབ་སྐྱོར་གནང་རྒྱུའི་ཞལ་བཞེས་གནང་།
དེ་བཞིན་སོ་ནམ་ཉམས་ཞིབ་དང་སྦྱོང་བརྡར་ཁང་ནས་མངའ་སྡེའི་ནང་གམ་བུ་རའི་རིགས་ཀྱི་ཤིང་འབྲས་ཚོང་སྒྱུར་ལ་དཀའ་ངལ་ཡོད་སྐོར་སྙན་སེང་ཞུས་པར་ཤིང་འབྲས་དེ་རིགས་ཀརནཱ་ཊཀ་མངའ་གཞུང་ནས་ངོས་འཛིན་གནང་མེད་སྟབས། ཕྱིར་ཚོང་བརྒྱབ་རྒྱུ་ལས་ཐབས་མེད་པ་གསུངས་པའི་ཐོག ཁོང་གིས་སྐྱེ་ལྡན་སོ་ནམ་ཉམས་ཞིབ་སྦྱོང་བརྡར་ཁང་ནས་ཡོང་བབ་ཆེད་མཛེས་སྤྱོད་ཤིང་སྣ་རིགས་འདེབས་ཚོང་གནང་ཐུབ་ན་དགེ་མཚན་ཆེ་བ་ཡོད་པའི་ལམ་སྟོན་གནང་ཡོད་པ་བཅས།། 
