༄༅། །ཕྱི་ལོ་ ༢༠༢༤ ཟླ་བ་ ༨ ཚེས་ ༣ དང་ ༤ ཉིན་ཨོ་གླིང་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་སིཌ་ཎིའི་རིག་གནས་སྐྱེད་ཚལ་ཁང་གཟའ་མཇུག་བོད་ཡིག་སློབ་གྲྭར་ཨོ་གླིང་གནས་འཁོད་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་དྲུང་ཆེ་གཙོས་པའི་ས་གནས་བོད་རིགས་མཐུན་ཚོགས་ཁག་གི་ཚོགས་གཙོ་དང་རྒྱུན་ལས་འཐུས་མི། ཨོ་གླིང་བོད་དོན་ལྷན་ཚོགས་ (Australia Tibet Counci) ཀྱི་འགན་ལྷན་འཐུས་ཚབ།  ཨོ་གླིང་བོད་དོན་ཞུ་གཏུག་ལས་འགུལ་ཚོགས་པའི་ (Australia V-TAG) འབྲེལ་མཐུད་པ་བཅས་ལྷན་འཛོམས་ཀྱིས་ཕྱི་ལོ་ ༢༠༢༥ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་སྐབས་༸སྐུའི་གོ་སྟོན་གོ་སྒྲིག་ཞུ་ཕྱོགས་དང་འབྲེལ་བའི་ཐོག་སྔོན་འགྲོའི་གྲ་སྒྲིག་གི་ཚོགས་འདུ་ཞིག་བསྐོང་ཚོགས་གནང་ཡོད།

དེ་ཡང་ཚོགས་འདུའི་ཉིན་དང་པོར་སྐུ་ཚབ་དོན་གཅོད་ཀརྨ་སེང་གེ་ལགས་ནས་དཔལ་ལྡན་བཀའ་ཤག་གིས་འདི་ལོའི་༸སྐུའི་འཁྲུངས་སྐར་ཉིན་གསལ་བསྒྲགས་བསྐྱངས་དོན་ལྟར། རྗེས་ལོ་༢༠༢༥ ལོར་༸གོང་ས་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་སྐབས་རྒྱལ་སྤྱིའི་ཁྱོན་ལ་ལོ་འཁོར་ཧྲིལ་པོར་བྱམས་བརྩེའི་ལོ་ཞེས་གཞུང་འབྲེལ་གོ་སྟོན་གོ་སྒྲིག་ཞུ་གཏན་ཁེལ་བ་བཞིན། ཨོ་གླིང་ཁུལ་དུ་༸སྐུའི་གོ་སྟོན་སྲུང་བརྩི་གོ་སྒྲིག་ཞུ་ཕྱོགས་ཇི་དགེ་གོ་བསྡུར་ཞུ་སླད་ཚོགས་འདུ་འདི་བསྐོང་ཚོགས་གནང་ཡིན་སྐོར་གསལ་བཤད་དང་འབྲེལ། ལམ་སྟོན་གནང་སྒོ་ཁག་གནང་གྲུབ་རྗེས་ཚོགས་བཅར་བ་རྣམས་ནས་ཚོགས་འདུའི་གྲོས་གཞི་དགོངས་དོན་༸སྐུའི་གོ་སྟོན་དང་བསྟུན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་གཙོས་མཛད་འཕྲིན་ཁག་ངོ་སྤྲོད་ཁྱབ་སྤེལ་གནང་ཕྱོགས་དང་། ཨོ་གླིང་དབུས་སའི་གྲོས་ཚོགས་ཁག་ནང་༸གོང་ས་མཆོག་གི་སྐྱེ་འགྲོ་སྤྱི་དང་། འཛམ་གླིང་ཞི་བདེ་ལ་སྨན་པའི་རླབས་ཆེན་གྱི་མཛད་པ་འཕྲིན་ལས་ལ་ཆེ་བསྟོད་ཀྱི་གྲོས་ཆོད་དང་བསྒྲགས་གཏམ་སོགས་གཏན་འབེབས་ཡོང་ཐབས། ༸གོང་ས་མཆོག་གི་མཛད་འཕྲིན་དང་འབྲེལ་བའི་གློག་བརྙན་དང་། པར་རིས་འགྲེམས་སྟོན། གཏམ་བཤད་སོགས་ལས་རིམ་གོ་སྒྲིག་ཞུ་ཕྱོགས། དེ་བཞིན་ཨོ་གླིང་ནང་རྒྱལ་ཡོངས་རང་བཞིན་ལྡན་པའི་༸སྐུའི་གོ་སྟོན་གཟབ་རྒྱས་ཤིག་སྲུང་བརྩི་གོ་སྒྲིག་ཞུ་ཕྱོགས་བཅས་ཀྱི་སྐོར་གོ་བསྡུར་གནང་ཡོད། 

མཇུག་ཏུ་སྐུ་ཚབ་དོན་གཅོད་ཀྱི་སྣེ་ཁྲིད་འོག་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་དྲུང་ཆེ། ཨོ་གླིང་བོད་དོན་ལྷན་ཚོགས་ཀྱི་འཐུས་མི་གཅིག ཨོ་གླིང་དང་བླངས་བོད་དོན་ཞུ་གཏུག་ལས་འགུལ་ཚོགས་པའི་འབྲེལ་མཐུད་པ་བཅས་ཚོགས་མི་ལྔ་ལས་གྲུབ་པའི་ཨོ་གླིང་རྒྱལ་ཡོངས་གོ་སྟོན་གོ་སྒྲིག་ཚོགས་ཆུང་ཞིག་ཟུར་འཛུགས་འོག ས་གནས་སོ་སོར་ས་གནས་བོད་རིགས་མཐུན་ཚོགས་ཁག་གི་ཚོགས་གཙོ་དང་རྒྱུན་ལས་རྣམ་པས་འགན་ཁུར་གྱིས་གོ་སྟོན་གྱི་ལས་རིམ་འཆར་སྒྲིག་ཁག་ལག་བསྟར་གནང་རྒྱུའི་གྲོས་ཆོད་བཞག་གནང་ཡོད་པ་བཅས། །