༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༡༧ ཉིན་སུད་སི་ཨར་གོ་ས་གནས་བོད་རིགས་ཚོགས་པའི་གོ་སྒྲིག་འོག་ཨ་རིའི་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་ཐུགས་རྗེ་ཆེ་ཞུའི་མཛད་སྒོ་ཚོགས་ཡོད།
སྐབས་དེར་སྐུ་མགྲོན་གཙོ་བོར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། སུད་སི་དོན་ཁང་གི་ལས་བྱེད་བསྟན་འཛིན་ཆོས་བཟང་ལགས། ཨར་གོ་ས་གནས་བོད་རིགས་ཚོགས་པའི་ཚོགས་མི་བཅས་ཕེབས་ཞུགས་གནང་ཡོད།
དེ་ཡང་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་སྐབས་ཨར་གོ་གཟའ་འཇུག་སློབ་གྲྭའི་དགེ་རྒན་དང་། ཕྲུ་གུའི་ཕ་མ་རྣམས་ཀྱིས་བོད་ཀྱི་སྐད་ཡིག་དང་རིག་གཞུང་ཐོག་ལྷག་བསམ་ངང་ནས་ལས་འགུལ་ཁག་སྤེལ་བར་བསྔགས་བརྗོད་དང་། མ་འོངས་པར་མུ་མཐུད་དེ་ལྟར་གནང་བའི་འབོད་སྐུལ་ཞུས་ཡོད།
དེ་བཞིན་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཨ་རིའི་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་ཐུགས་རྗེ་ཆེ་ཞུས་པ་དང་འབྲེལ་ཁྲིམས་ཡིག་དེའི་གལ་གནད་སྐོར་འགྲེལ་བརྗོད་གནང་ཡོད། མཛད་སྒོའི་སྐབས་རིག་གཞུང་འཁྲབ་སྟོན། རྩེད་རིགས་ཁག་གོ་སྒྲིག་ཞུས་ཡོད་པ་བཅས།།
