༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༡༥ ཉིན་རྒྱ་གར་གཙོས་པའི་འཛམ་གླིང་ཡུལ་གྲུ་གང་སར་རྒྱ་གར་རང་བཙན་ཉིན་མོའི་དུས་ཆེན་སྲུང་བརྩི་ཞུ་གི་ཡོད་པ་ལྟར། སྦེལ་ཇམ་གནས་འཁོད་རྒྱ་གར་གཞུང་ཚབ་ཁང་གི་རྒྱ་གར་རང་བཙན་ཉིན་མོའི་མཛད་སྒོར་སྦེལ་ཇམ་སྐུ་ཚབ་དོན་ཁང་གི་ཡོ་རོབ་བོད་དོན་ཞུ་གཏུག་འབྲེལ་མཐུད་པ་དྲུང་ལས་བསྟན་འཛིན་ཕུན་ཚོགས་ལགས་མཉམ་ཞུགས་གནང་ཡོད།
དེ་ཡང་སྦེལ་ཇམ་སྐུ་ཚབ་དོན་ཁང་གི་ཡོ་རོབ་བོད་དོན་ཞུ་གཏུག་འབྲེལ་མཐུད་པ་བསྟན་འཛིན་ཕུན་ཚོགས་ལགས་ནས་སྦེལ་ཇམ་སྐུ་ཚབ་དོན་ཁང་གི་སྐུ་ཚབ་ངོ་བོའི་ཐོག་མཛད་སྒོར་ལྷན་ཞུགས་ཀྱིས་རྒྱ་གར་གཞུང་དམངས་གཉིས་ནས་བོད་དང་བོད་མིར་རྒྱབ་སྐྱོར་ཕན་གྲོགས་གནང་བར་བཀའ་དྲིན་རྗེས་དྲན་ཞུས་པ་དང་སྦྲགས། གཞུང་ཚབ་ཆེན་མོ་སྐུ་ཞབས་སྭོ་རབ་ཀུ་མཱར་ལགས་སུ་རྒྱ་གར་རང་བཙན་ཉིན་མོར་འཚམས་འདྲིའི་མཇལ་དར་ཕུལ་ཡོད།
གཞུང་ཚབ་ཆེན་མོ་མཆོག་གིས་སྦེལ་ཇམ་སྐུ་ཚབ་དོན་ཁང་དུས་ཆེན་མཛད་སྒོར་མཉམ་ཞུགས་གནང་བར་དགའ་ཚོར་ཆེན་པོ་བྱུང་ཚུལ་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་གྱི་མཛད་སྒོར་རྒྱ་གར་གཞུང་ཚབ་ཁང་གི་དྲུང་ཡིག་ས་ར་བ་ནམ་བ་ལ་སུབ་ར་མ་ནིན་ལགས་མཉམ་ཞུགས་གནང་ཡོད་པ་དྲན་གསོ་གནང་བ་མ་ཟད། འབྱུང་འགྱུར་ཕྱོགས་གཉིར་བར་མཉམ་ལས་གནང་འཆར་སོགས་ཀྱི་སྐོར་གསུངས་ཡོད།
གཞན་ཡང་འབྲེལ་ལས་བསྟན་འཛིན་ཕུན་ཚོགས་ལགས་ཀྱིས་རྒྱ་གར་གཞུང་ཚབ་ཁང་གི་འབྲེལ་ཡོད་མི་སྣ་སྐུ་ཞབས་ར་ཇེཤ་ཀུ་མཱར་ལགས་གཙོས་པའི་གཞུང་ཚབ་ཁང་གི་ལས་བྱེད་ལྷན་མཇལ་འཕྲད་ཀྱིས་དུས་ཆེན་ལ་འཚམས་འདྲི་ཞུས་ཡོད། མཛད་སྒོའི་ཐོག་གཞུང་ཚབ་ཆེན་མོས་རྒྱ་གར་གྱི་སྲིད་འཛིན་མཆོག་གི་གསུང་འཕྲིན་སྒྲོགས་སྦྱང་དང་། རྒྱ་གར་གྱི་རིག་གཞུང་གཞས་སྣ་ཁག་ཅིག་གཟིགས་འབུལ་ཞུས་ཡོད་པ་བཅས།། 
