༄༅། །བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བཀོད་ཁྱབ་དགོངས་དོན། ཕྱི་ལོ་ ༢༠༢༤ ཟླ་བ་ ༠༨ ཚེས་ ༠༨ ཉིན་སིམ་ལ་སྐྱབས་བཅོལ་བོད་མིའི་ལག་ཤེས་བཟོ་གྲྭའི་འཛིན་སྐྱོང་འགན་དབང་ཡོངས་རྫོགས་སིམ་སྤྱི་ལས་ཁུངས་ནས་ལག་ཤེས་བཟོ་གྲྭའི་འཛིན་སྐྱོང་འགན་འཛིན་ཚབ་གསར་ཤ་བོ་དོན་གྲུབ་ལགས་སུ་རྩིས་སྤྲོད་གནང་ཡོད། སྐབས་དེར་སིམ་ལ་ས་གནས་འཐུས་ཚོགས་ཀྱི་ཚོགས་གཙོ་བསྟན་འཛིན་ལགས་ཀྱིས་སྤྲོད་དཔང་གནང་ཡོད་པ་རེད།
དེ་ཡང་ཕྱི་ལོ་ ༡༩༨༡ ལོར་སིམ་ལ་ལག་ཤེས་བཟོ་གྲྭ་ཚོགས་པའི་ངོས་ནས་དང་བླངས་ཀྱིས་གྲོས་ཆོད་གཏན་འབེབས་ཀྱིས་ལག་ཤེས་བཟོ་གྲྭའི་འཛིན་སྐྱོང་འགན་དབང་ཡོངས་རྫོགས་བོད་མིའི་སྒྲིག་འཛུགས་ནང་སྲིད་ལས་ཁུངས་སུ་རྩིས་འབུལ་ཞུས་ཡོད་ནའང་། ད་ལམ་བོད་མིའི་ལག་ཤེས་བཟོ་གྲྭ་དང་། མཉམ་ལས་གཞན་ལྟར་རང་སྐྱོང་གཅིག་མཚུངས་ཡོང་སླད། སིམ་ལ་ལག་ཤེས་བཟོ་གྲྭའི་འཛིན་སྐྱོང་འགན་དབང་ཡོངས་རྫོགས་ནང་སྲིད་ལས་ཁུངས་ནས་སིམ་ལ་ལག་ཤེས་བཟོ་གྲྭར་རྩིས་འབུལ་གནང་ཡོད།
རྩིས་སྤྲོད་རྩིས་ལེན་གྱི་མཛད་སྒོའི་ཐོག་མར་ལག་ཤེས་བཟོ་གྲྭའི་ལས་ཁུངས་གསར་པ་དབུ་འབྱེད་དང་འབྲེལ། སིམ་སྤྱི་ཚེ་དབང་ཕུན་ཚོགས་ལགས་ཀྱིས་ལག་ཤེས་བཟོ་གྲྭའི་ཡིག་སྣོད་དང་། ཐམ་ཀ ཡིག་ཆས་སོགས་རྩིས་སྤྲོད་གནང་གྲུབ་བསྟུན། ལག་ཤེས་བཟོ་གྲྭའི་འགན་འཛིན་གསར་རྙིང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་གནང་སྟེ། ཞབས་སྟེགས་རྩིས་ལེན་གནང་ཡོད་པ་རེད།
སྐབས་དེར་རྡོ་རྗེ་བྲག་དགོན་པ་དང་། ཇོ་ནང་དགོན་པ། ས་གནས་བུད་མེད་ཚོགས་པ། ས་གནས་གཞོན་ནུ་ལྷན་ཚོགས་སོགས་གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། ས་གནས་མི་མང་བཅས་ལྷན་ཞུགས་ཀྱིས་ལག་ཤེས་བཟོ་གྲྭའི་འགན་འཛིན་གསར་རྙིང་ལ་འཚམས་འདྲིའི་མཇལ་དར་ཕུལ་ཡོད། མཛད་སྒོའི་ཐོག་ལག་ཤེས་བཟོ་གྲྭའི་འགན་འཛིན་ལྷན་ཚོགས་ཀྱི་ཚོགས་གཙོ་དཀོན་མཆོག་ཚེ་རིང་ལགས་ཀྱིས་ལག་ཤེས་བཟོ་གྲྭའི་རྒྱབ་ལྗོངས་ལོ་རྒྱུས་དང་། འཛིན་སྐྱོང་འགན་དབང་རྩིས་འབུལ་ཞུ་རིམ་སོགས་ངོ་སྤྲོད་དང་། སིམ་སྤྱི་དང་ལག་ཤེས་བཟོ་གྲྭའི་འགན་འཛིན་ཟུར་པ་ཚེ་དབང་ཕུན་ཚོགས་ལགས་ཀྱིས་བཟོ་གྲྭའི་འཛིན་སྐྱོང་འགན་དབང་རྩིས་འབུལ་ཞུ་རྒྱུའི་དམིགས་ཡུལ་གསལ་བཤད་དང་སྦྲགས། བཟོ་གྲྭའི་ལས་དོན་ཚགས་ཚུད་ཡོང་སླད་མང་ཚོགས་ནས་འགན་འཛིན་གསར་པར་རྒྱབ་སྐྱོར་གནང་དགོས་པའི་འབོད་སྐུལ་ཞུས་ཡོད་པ་བཅས།། 
