༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༢༠ ཉིན་བཞུགས་སྒར་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་རིག་པའི་ཞིབ་འཇུག་ཐབས་ལམ་ཞེས་པའི་བརྗོད་གཞི་ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་ཟུང་སྦྲེལ་གྱིས་གོ་སྒྲིག་གནང་བའི་ས་རཱ་བོད་རིག་པའི་བགྲོ་གླེང་ཐེངས་བཅུ་བདུན་པ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་དུ་ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སྨྲ་བ་འབུམ་རམས་པ་བྱམས་པ་བསམ་གཏན་ལགས། དབུས་གཞོན་ནུ་ཚོགས་གཙོ་མགོན་པོ་དོན་གྲུབ་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། དེ་བཞིན་ཕྱོགས་མཐའ་ཁག་ནས་ཕེབས་པའི་གསུང་བཤད་པ་དང་ཚོགས་བཅར་བ་བཅས་ཚང་འཛོམས་ཀྱིས་ཐོག་མར་ཚང་མས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བླངས་གྲུབ་མཚམས་གསོལ་ཇ་དང་འབྲས་སིལ་བཅས་འདེགས་འབུལ་ཞུས་ཏེ་དབུ་འབྱེད་མཛད་སྒོ་དབུ་འཛུགས་གནང་སོང་།
སྐབས་དེར་ས་རཱ་བོད་ཀྱི་བོད་ནུ་ཚོགས་པའི་ཚོགས་གཙོ་ཀརྨ་ཐུབ་བསྟན་ལགས་ནས་ཐེངས་འདིའི་བགྲོ་གླེང་དང་འབྲེལ་བའི་ངོ་སྤྲོད་གནང་བ་དང་འབྲེལ། བགྲོ་གླེང་དེ་བཞིན་བོད་ཀྱི་སྐད་ཡིག་དང་རྩ་དོན་མི་ཉམས་རྒྱུན་འཛིན། བོད་པའི་སློབ་ཕྲུག་ཁྲོད་བོད་ཀྱི་ལོ་རྒྱུས་དང་ནང་དོན་རིག་པ། རྩོམ་རིག བརྡ་སྤྲོད་གང་ཅིའི་ཐད་ནས་གོང་འཕེལ་སླད་གོ་སྒྲིག་ཞུ་མུས་ཡིན་པའི་སྐོར་འགྲེལ་བརྗོད་གནང་སོང་། དེ་རྗེས་དམིགས་བསལ་སྐུ་མགྲོན་ལོ་རྒྱུས་སྨྲ་བ་འབུམ་རམས་པ་བྱམས་པ་བསམ་གཏན་ལགས་ཀྱིས་བོད་དང་ཧི་མ་ལ་ཡའི་རིག་གཞུང་ཐོག་སློབ་གཉེར་ཞིབ་འཇུག་གི་ལས་གཞི་ཞེས་པའི་བརྗོད་གཞི་དང་འབྲེལ་ཕྱི་རྒྱལ་མི་རིགས་རྣམས་ཀྱིས་བོད་དང་ཧི་མ་ལ་ཡའི་ཆོས་དང་རིག་གཞུང་། སྐད་ཡིག་ཐོག་ཞིབ་འཇུག་དང་སློབ་གཉེར་བྱས་པའི་བརྒྱུད་རིམ་དང་། བཙན་བྱོལ་དུ་ཡོད་པའི་བོད་པའི་གཞོན་སྐྱེས་རྣམས་ནས་རང་ཉིད་ཀྱི་ཆོས་དང་རིག་གཞུང་། སྐད་ཡིག ཡུལ་སྲོལ་གོམས་གཤིས་སོགས་དར་ཁྱབ་དང་རྒྱུན་འཛིན་བྱེད་དགོས་གལ་སྐོར་སོགས་གསུངས།
དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གསུང་བཤད་པ་རྣམ་པས་བགྲོ་གླེང་འདི་གལ་ཆེན་དོན་ཆེན་བརྩིས་ཏེ་ཕེབས་པར་བསྔགས་བརྗོད་གནང་བ་དང་སྦྲགས། བགྲོ་གླེང་འདིར་ཆོས་རིག་ལས་ཁུངས་ཀྱིས་ལས་གཞི་ཞིག་གི་འོག་ནས་མཐུན་འགྱུར་དང་ཕྱག་རོགས་གནང་བཞིན་ཡོད་པས་ཚོགས་བཅར་རྣམས་ནས་ཚོགས་འདུའི་དགོས་དམིགས་དྲན་དགོས་པ་དང་། མཐུན་རྐྱེན་དེ་དག་ཆུད་ཟོས་སུ་མ་གཏང་བར་གོ་སྐབས་དམ་འཛིན་བྱེད་དགོས་ཚུལ་སྐོར་གསུངས། དེ་བཞིན་ཁོང་གིས་ཆོས་རིག་ལས་ཁུངས་ཀྱི་གྲངས་འཛིན་དཔེ་མཛོད་ཀྱི་ལས་གཞི་དང་འབྲེལ་བོད་བརྒྱུད་ནང་བསྟན་གྱི་ཡིག་ཆ་ཁག་ཉར་ཚགས་བྱ་རྒྱུའི་ལས་གཞི་སྐོར་འགྲེལ་བརྗོད་གནང་སོང་།
མཐར་ས་རཱ་གཞོན་ནུའི་ཚོགས་གཞོན་ཀུན་བཟང་ལགས་ཀྱིས་ཐུགས་རྗེ་ཆེ་ཞུའི་གཏམ་བཤད་གནང་སྟེ་དབུ་འབྱེད་མཛད་སྒོ་མཇུག་སྒྲིལ་ཡོད། ཐེངས་འདིའི་ས་རཱ་བོད་རིག་པའི་བགྲོ་གླེང་དེ་བཞིན་ཨ་རིའི་རོགས་ཚོགས་ (USAID) མཐུན་འགྱུར་འོག་ཆོས་རིག་ལས་ཁུངས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་ཟུང་སྦྲེལ་གྱིས་གོ་སྒྲིག་གནང་ཡོད་པ་བཅས།།
