༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༢༦ ཉིན་བཞུགས་སྒར་རྡ་རམ་ས་ལའི་ཉེ་འདབས་སུ་ཆགས་པའི་ཨེ་ཤི་ཡ་ཧེལ་ཏི་སོ་རོཏ་ (Asia Health Resorts) གསོལ་མགྲོན་ཁང་དུ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་ནུས་པ་གོང་སྤེལ་གཏོང་ཕྱོགས་ཀྱི་ཟབ་སྦྱོང་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་དང་ཕྱེད་ཀའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་ཚེ་རིང་མཆོག་དང་། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། རྡ་ས་གནས་འཁོད་ཨ་རིའི་རྒྱལ་ཡོངས་མང་གཙོ་ལྟེ་གནས་ཁང་གི་འགན་འཛིན་གཞོན་པ་དཔལ་ལྡན་ཕུན་ཚོགས་ལགས། བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་ཚེ་རིང་སྟོབས་རྒྱལ་ལགས། ནང་སྲིད་དྲུང་འཕར་བསྟན་འཛིན་ནོར་བུ་ལགས། ནང་སྲིད་དྲུང་འཕར་བཀྲ་ཤིས་བདེ་སྐྱིད་ལགས། ལྷོ་སྤྱི། སིམ་སྤྱི། བྱང་ཤར་སྤྱི་ཁྱབ་པ། ལ་སྤྱི་ལས་ཚབ། ས་གནས་ཁག་ནས་ཕེབས་པའི་ས་གནས་འགོ་འཛིན་རྣམ་པ་དང་། ས་གནས་འགོ་འཛིན་ལས་ཚབ་ལས་དྲུང་བཅས་ཚང་འཛོམས་ཐོག་ས་གནས་འགོ་འཛིན་རྣམས་ཀྱི་ནུས་པ་གོང་སྤེལ་གཏོང་ཕྱོགས་ཀྱི་ཟབ་སྦྱོང་གི་དབུ་འབྱེད་མཛད་སྒོ་འཚོགས་ཡོད།
ཟབ་སྦྱོང་གི་ཐོག་མར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ནས་ཕེབས་བསུ་དང་སྦྲགས། ཐེངས་འདིའི་ཟབ་སྦྱོང་དེ་བཞིན་བོད་མིའི་སྒྲིག་འཛུགས་ནང་སྲིད་ལས་ཁུངས་དང་། ཨ་རིའི་རྒྱལ་ཡོངས་མང་གཙོ་ལྟེ་གནས་ཁང་ཟུང་སྦྲེལ་ཐོག་གོ་སྒྲིག་ཞུ་དགོས་པའི་རྒྱུ་མཚན་གལ་གནད་གསལ་བཤད་དང་། ལྷག་པར་ས་གནས་འགོ་འཛིན་གསར་པ་རྣམས་ལ་ཁྲིམས་སྒྲིག་ངོ་སྤྲོད་གནང་རྒྱུ་གལ་གནད་ཆེན་པོ་ཡིན་ཞིང་། དེ་ལྟར་ཁྲིམས་སྒྲིག་ལ་གོ་རྟོགས་ཡག་པོ་ཡོད་ན། ས་གནས་སུ་ལས་དོན་སྤེལ་རྒྱུ་དང་། དབུས་ནང་སྲིད་ལས་ཁུངས་སུ་ལས་གཞི་འཆར་འབུལ་ཞུ་ཕྱོགས་སོགས་ལ་ཕན་ཐོགས་ཆེན་པོ་ཡོང་ངེས་པ་གསུངས་ཡོད།
དེ་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ས་གནས་འགོ་འཛིན་རྣམས་ལ་ད་ལྟའི་དུས་སྐབས་སུ་བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ནའི་བབ་ཀྱིས་མཛད་པ་འཕྲིན་ལས་རྒྱ་ཆེན་པོ་སྤེལ་རྒྱུར་མཛད་དཀའ་ཡོད་པས། ས་གནས་འགོ་འཛིན་རྣམས་ནས་རང་འགན་རང་ཁུར་གྱིས་བོད་དོན་འཐབ་རྩོད་སྤྱི་དང་། ཁྱད་པར་དུ་རང་གི་ཁྱབ་ཁོངས་བོད་མི་ཚོའི་བདེ་དོན་ལྟ་སྐྱོང་ལ་འཐུས་ཤོར་མེད་པའི་ཐོག་འབད་འབུངས་ཧུར་སྐྱེད་གནང་དགོས་ཤིང་། དེ་ནི་༸རྒྱལ་བའི་བཀའ་དགོངས་སྒྲུབ་པ་ཡིན་ཞེས་གསུངས།
དེ་བཞིན་ཁོང་གིས་མུ་མཐུད་ས་གནས་འགོ་འཛིན་རྣམས་ནས་ས་གནས་སོ་སོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་སྐོར་ལ་གྲོས་ཆོད་གཏན་འབེབས་གནང་རྒྱུའི་གལ་གནད་དང་འབྲེལ་ཏེ་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་དང་འབྲེལ་ཏེ་བོད་མིའི་སྒྲིག་འཛུགས་ནས་དོན་ཚན་དྲུག་ཅན་གྱི་ཡིག་ཆ་ཞིག་འགྲེམས་སྤེལ་ཞུས་ཡོད། དེའི་དོན་ཚན་དྲུག་པ་དེ་ཡང་སྲིད་རྩད་གཅོད་དང་འབྲེལ་བ་ཡོད་པ་རེད། དེ་ཡང་ཡང་སྲིད་རྩད་གཅོད་དེ་དགའ་ལྡན་ཕོ་བྲང་རང་ནས་ཐག་གཅད་རྒྱུ་ལས་དེར་གཞུང་དང་སྒྲིག་འཛུགས་གཞན་སུས་ཀྱང་ཐེ་བྱུས་བྱེད་མི་ཆོག་ཅེས་གསལ་ཡོད། དེ་དག་ས་གནས་སོ་སོའི་དཔོན་རིགས་ཚོར་འགྲེལ་བརྗོད་བྱེད་དགོས། ད་ལྟའི་དུས་སུ་ཆབ་སྲིད་ཀྱི་གནད་འགག་ཐོག་ནས་བལྟས་པ་ཡིན་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་འཚོ་བཞུགས་སྐབས་རྒྱ་ནག་གཞུང་གིས་གང་ཡང་བྱེད་མི་ཐུབ། ཁོ་ཚོས་གྲ་སྒྲིག་ལོ་ཉི་ཤུ་ཙམ་གྱི་སྔོན་ནས་བྱེད་བསྡད་ཡོད་པ་རེད། དེ་མཚུངས་ང་ཚོ་བོད་མིའི་སྤྱི་ཚོགས་ནང་ནས་ཀྱང་ད་ལྟའི་ཆར་སྐུའི་ཡང་སྲིད་དང་འབྲེལ་བའི་ཡིག་ཆ་གཅིག་ཡོད་པ་དེ་ཕྱི་ལོ་ ༢༠༡༡ ཟླ་བ་ ༠༩ ནང་གི་ཡིག་ཆ་དེ་རེད། དེ་ཚོ་ལའང་གཟིགས། ཡིག་ཆ་དེའི་ནང་དུ་༸གོང་ས་མཆོག་དགུང་ལོ་ ༩༠ ཕེབས་པའི་སྐབས་སུ་ཡང་སྲིད་དང་འབྲེལ་བའི་བཀའ་མོལ་གནང་གི་རེད་ཅེས་གསལ་ཡོད། དེ་ཡིན་དུས་༸རྒྱལ་བ་རིན་པོ་ཆེ་དགུང་ལོ་ ༩༠ མ་ཕེབས་པའི་སྔོན་ལ་ས་གནས་འགོ་འཛིན་སོ་སོའི་ཁྱབ་ཁོངས་ཀྱི་དགོན་པ་དང་། སྒྲིག་འཛུགས་ཁག་ནས་མགོན་པོ་མཆོག་གི་ཡང་སྲིད་དང་འབྲེལ་བའི་གྲོས་ཆོད་གཏན་འབེབས་གནང་ན། བོད་བརྒྱུད་ནང་བསྟན་གྱི་རྗེས་འཇུག་པ་ཐུན་མོང་གི་ལངས་ཕྱོགས་གཅིག་གྱུར་ཡོང་ཐུབ་ལ། གྲོས་ཆོད་ཡིག་ཆ་དེ་དག་ཆོས་རིག་ལས་ཁུངས་ནས་ཕྱོགས་བསྒྲིགས་ཞུ་གི་རེད། ཅེས་གསལ་བཤད་དང་སྦྲགས། དེ་ལྟར་རྒྱལ་སྤྱིའི་ནང་པའི་སྤྱི་ཚོགས་དང་། རྒྱལ་སྤྱིའི་སྲིད་གཞུང་ཁག་ནས་གྲོས་ཆོད་གཏན་འབེབས་གནང་ཐུབ་ན། ༸རྒྱལ་བའི་ཡང་སྲིད་ཐོག་བོད་མིའི་ཕྱོགས་ནས་ཐབས་བྱུས་ལྡན་པའི་ཐོག་ནས་གྲ་སྒྲིག་ཞུ་ཐུབ་རྒྱུ་ཡིན་པ་ནན་བརྗོད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་ཕྱི་ལོ་ ༢༠༢༥ ཟླ་བ་ ༠༧ ཚེས་ ༠༦ ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་ལོ་ ༩༠ ལ་ཕེབས་པའི་༸སྐུའི་གོ་སྟོན་ལོ་སྲུང་བརྩི་ཞུ་རྒྱུ་དང་། ལོ་འཁོར་མོ་བྱམས་བརྩེ་ལོ་ཞེས་༸རྒྱལ་བའི་གསང་གསུམ་གྱི་མཛད་པ་འཕྲིན་ལས་དང་འབྲེལ་བའི་ལས་གཞི་སྣ་མང་སྤེལ་འཆར་ཡོད་པ་དང་། ས་གནས་སོ་སོའི་ངོས་ནས་ཀྱང་གོ་སྒྲིག་ཚོགས་ཆུང་བསྐོ་འཛུགས་ཐོག་༸སྐུའི་གོ་སྟོན་སྲུང་བརྩི་ཞུ་ཕྱོགས་ཐད་ལམ་སྟོན་གནང་ཡོད།
ཕྱོགས་མཚུངས་ཁོང་གིས་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པའི་ངོས་ནས་འདོན་སྤེལ་གནང་བའི་མ་འོངས་བོད་ཀྱི་འགན་སྲུང་ཞེས་པའི་ཕུགས་དམིགས་ཡིག་ཆའི་གལ་གནད་དང་། དེའི་སྐོར་ས་གནས་མང་ཚོགས་ལ་ངོ་སྤྲོད་ཀྱིས་བཀའ་ཤག་གི་དགོངས་པ་བཞེས་ཕྱོགས་ཇི་ཡིན་གསལ་བཤད་གནང་དགོས་པའི་ལམ་སྟོན་དང་འབྲེལ། འབྱུང་འགྱུར་ཕུགས་དམིགས་ཡིག་ཆའི་ནང་དུས་བསྟུན་དགོས་ངེས་བསྐྱར་ཞིབ་གནང་རྒྱུ་ཡིན་པ་གསུངས་ཡོད།
སྤྱིར་ཐེངས་འདིའི་ཉིན་གྲངས་གསུམ་རིང་གི་ཟབ་སྦྱོང་ནང་ས་གནས་འགོ་འཛིན་རྣམ་པར་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིན་ཆ་ངོ་སྤྲོད་དང་། ས་གནས་འགོ་འཛིན་ལས་ཁུངས་ཀྱི་རྩིས་སྤྲོད་རྩིས་ལེན་བྱེད་ཕྱོགས། གཞིས་ཆགས་ཁག་ཏུ་ལས་གཞིར་བསྐྱར་ཞིབ་བྱེད་ཕྱོགས། བོད་མིའི་སྒྲིག་འཛུགས་ཀྱི་ས་ཁང་སྒྲིག་གཞི་ངོ་སྤྲོད་སོགས་ཀྱི་ལས་རིམ་ཡོད་པ་རེད། ཐེངས་འདིའི་ཟབ་སྦྱོང་ནང་བོད་མིའི་སྒྲིག་འཛུགས་ནང་སྲིད་ལས་ཁུངས་ཁྱབ་ཁོངས་རྒྱ་བལ་འབྲུག་གསུམ་གྱི་ས་གནས་འགོ་འཛིན་ལས་ཚབ་དང་བཅས་པ་ ༤༠ ལྷག་མཉམ་ཞུགས་གནང་ཡོད་པ་བཅས།། 
