༄༅། །བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་བར་གཞིགས་ན། རྭ་རྒྱ་ཤེས་རིག་ནོར་བུའི་སློབ་གླིང་གི་སློབ་ཟུར་ཚེ་བརྟན་ཞེས་པ་ཞིག་གི་སྤུན་མཆེད་བུ་མོ་འཛོམས་སྐྱིད་ལགས་ཀྱིས་སློབ་གླིང་གི་སྐོར་ལ་དཀྲོག་གཏམ་སྤེལ་བའི་ཉེས་མིང་གཡོགས་ཏེ་འཛིན་བཟུང་བཙན་འཁྲིད་བྱས་འདུག
འདི་ལོའི་ཕྱི་ཟླ་ ༧ ཚེས་ ༡༤ ཉིན་རྒྱ་ནག་དམར་གཞུང་གིས་རྭ་རྒྱ་ཤེས་རིག་ནོར་བུའི་སློབ་གླིང་བཙན་གྱིས་སྒོ་བརྒྱབ་པར་བརྟེན། བོད་ཕྱི་ནང་གཉིས་ཀྱིས་བློ་ཕམ་ཆེན་པོས་གླེང་སློང་ཤུགས་ཆེན་བྱས་ཡོད་པ་དང་། ཤེས་རིག་ནོར་གླིང་གི་སློབ་ཟུར་ཚེ་བརྟན་ཞེས་པ་ཞིག་གི་སྤུན་མཆེད་བུ་མོ་འཛོམས་སྐྱིད་ཀྱིས་སྤྱི་ཚོགས་དྲ་ལམ་དུ་ཤེས་རིག་ནོར་གླིང་སྐོར་ལ་སྤྱི་ཚོགས་དྲ་ལམ་དུ་དཀྲོག་གཏམ་སྤེལ་ཡོད་པའི་ཉེས་མིང་འོག ནག་ཆུ་རྫོང་ཉེན་རྟོག་པས་བཙན་འཁྲིད་བྱས་ཏེ་གོ་ཐོས་མེད་པར་གྱུར་ཡོད་འདུག
འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། རྭ་རྒྱ་ཤེས་རིག་སློབ་གླིང་སྒོ་མ་བརྒྱབ་པའི་བདུན་ཕྲག་གཅིག་ཙམ་གྱི་གོང་དུ། བུ་མོ་འཛོམས་སྐྱིད་ཀྱིས་ས་གནས་སྲིད་གཞུང་གི་མི་སྣར་ཁ་རྩོད་བརྒྱབ་པའི་ཉེས་མིང་འོག་ཉིན་ཤས་རིང་བཀག་ཉར་བྱས་ཡོད་པ་མ་ཟད། འདི་ལོའི་ཕྱི་ཟླ་ ༦ ཚེས་ ༡༤ ཉིན་ས་གནས་ཉེན་རྟོག་ཁང་གིས་མོ་ལ་ཁ་པར་ཡོང་ནས་ཡར་མར་གང་བྱུང་འགྲོ་མི་ཆོག་པའི་བཀའ་རྒྱ་ཡང་འབྱོར་ཡོད་སྐོར་དང་། དུས་རྒྱུན་འཛོམས་སྐྱིད་ཀྱིས་ཆབ་སྲིད་སློབ་གསོར་འདོད་མོས་མེད་པའི་རྣམ་འགྱུར་སྟོན་གྱི་ཡོད་སྐོར་བརྗོད་བྱུང་།
བུ་མོ་འཛོམས་སྐྱིད་ལགས་ཀྱི་སྤུན་མཆེད་ཚེ་བརྟན་ལགས་ནི་བོད་ནག་ཆུ་རྫོང་ཁོངས་ནས་ཡིན་ཞིང་། རྭ་རྒྱ་ཤེས་རིག་ནོར་གླིང་དུ་བསླེབས་ནས་ལོ་ ༢ ལྷག་ལས་ཕྱིན་མེད་འདུག
