༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༡༡ ཉིན་འཕགས་བོད་འབྲེལ་མཐུད་ལས་ཁང་གི་གོ་སྒྲིག་འོག ལྡི་ལི་སྐུ་ཚབ་དོན་ཁང་དུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མས་བོད་དོན་དང་འབྲེལ་བའི་ལས་དོན་བརྩམས་ཕྱོགས་ཀྱི་ཚོགས་འདུ་བསྐོང་ཚོགས་གནང་ཡོད།
དེ་ཡང་ཚོགས་འདུའི་ཐོག་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཙོ་རིན་ཆེན་མཁའ་འགྲོ་ལགས་དང་། ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས། ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཞོན་བླ་མ་ཆོས་འཕེལ་བཟོད་པ་ལགས། དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་འབྲེལ་མཐུད་པ་སུ་རེནྡྲ་སིངྷ་ལགས། ཨར་བིནྟ་ནི་ཀོ་སི་ལགས། པཾཀཇ་གོ་ཡལ་ལགས། འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཕེབས་ཞུགས་གནང་ཡོད།
ཚོགས་འདུའི་ཐོག་མར་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཀྱིས་ཕེབས་བསུའི་གསུང་བཤད་གནང་རྗེས་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཙོ་རིན་ཆེན་མཁའ་འགྲོ་ལགས་ཀྱིས་གསུང་བཤད་གནང་ཡོད། སྐབས་དེར་ཚོགས་བཅར་བ་རྣམས་ནས་རྒྱ་གར་བོད་དོན་རྒྱབ་སྐྱོར་ཚོགས་པ་ཁག་གིས་དགོངས་ཚུལ་གནང་བ་ཁག་གི་ཐོག་གྲོས་བསྡུར་ལྷུག་པོ་གནང་ཡོད།
སྤྱིར་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མ་ནི་རྒྱ་གར་ནང་གི་བོད་དོན་རྒྱབ་སྐྱོར་ཚོགས་པ་ཁག་གི་སྒྲིག་འཛུགས་མཐོ་ཤོས་ཡིན་པ་དང་། སྒྲིག་འཛུགས་ངོས་ནས་བོད་མིའི་རང་དབང་འཐབ་རྩོད་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་ཞུ་གཏུག་གནང་གི་ཡོད། ཐེངས་འདིའི་ཚོགས་འདུ་དེ་བཞིན་འཕགས་བོད་འབྲེལ་མཐུད་ལས་ཁང་ནས་གོ་སྒྲིག་ཞུས་ཡོད་པ་བཅས།།
