༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༡༢ ཉིན་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་འབྲས་སྤུངས་བློ་གསལ་གླིང་གྲྭ་ཚང་གི་དགེ་འདུན་པ་ཁག་ཅིག་ནས་ལྷོ་ཨ་རིའི་ཁུལ་དུ་བོད་ཀྱི་ཐུན་མོང་མ་ཡིན་པའི་སྒྱུ་རྩལ་ (Mystical Arts of Tibet) ཞེས་པའི་རིག་གཞུང་འགྲེམས་སྟོན་གྱི་སྐོར་བསྐྱོད་སའུ་པོ་ལོ་ནས་དབུ་འཛུགས་གནང་ཡོད།

དེ་ཡང་སྐོར་བསྐྱོད་ལས་གཞི་ཐོག་མར་པ་ར་ན་ཁུལ་གྱི་ཀྱུ་རི་ཀྲི་བ་དང་། ཁོ་ཀྲོ་བྷ་ར་སི་རུ་དབུ་འཛུགས་གནང་ཡོད་པ་དང་། དེར་ (CEBB Sukhavati) ཆོས་ཚོགས་ཀྱི་བླ་མ་པདྨ་བསམ་གཏན་ལགས་དང་། ལྷོ་ཨ་རིའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ནས་ཕེབས་བསུ་ཞུས་ཡོད། ཕྱི་ཚེས་ ༡༦ ཉིན་དགེ་འདུན་པ་རྣམས་ནས་འོད་དཔག་མེད་ཀྱི་མཎྚལ་བཞེངས་ཞིང་། སྐབས་དེར་དགེ་བཤེས་ངག་དབང་ཕན་བདེ་ལགས་ཀྱིས་མཎྚལ་གྱི་ཐུན་མོང་མ་ཡིན་པའི་ཁྱད་ཆོས་དང་། ལྷག་པར་མི་རྟག་པའི་གནས་ཚུལ་བསྟན་པའི་དཔེ་མཚོན་ཡིན་སྐོར་སོགས་འགྲེལ་བརྗོད་གནང་། དེ་བཞིན་དགེ་འདུན་པ་རྣམས་ནས་ཆོས་དབྱངས་གསུང་འདོན་སོགས་ཀྱིས་སྒོམ་ཉམས་ལེན་གྱི་ཁོར་ཡུག་སྐྲུན་ཡོད་པ་རེད།

ཕྱི་དྲོ་དགེ་འདུན་པ་རྣམས་ནས་ (Grande Oriente do Paraná) ལ་ཚོགས་བཅར་བ་གྲངས་ ༣༥༠ ལྷག་ལྷན་འཛོམས་ཀྱི་ཐོག་ནང་པའི་ཆོས་དབྱངས་གསུང་འདོན་གནང་ཡོད་ཅིང་། ཀྱུ་རི་ཀྲི་བ་རུ་འདུ་འཛོམས་ཐོག་ས་གནས་ཀྱི་རྒྱ་གར་བ་དང་ནང་པ་ཁག་ཅིག་ལྷན་ཞུགས་གནང་ཡོད། ཕྱི་དྲོ་དགེ་འདུན་པ་རྣམས་ནས་ས་གནས་ཀྱི་གྲོང་སྡེའི་སྤྱི་ཁྱབ་ཀྱི་བཟའ་ཟླ་འདས་གྲོངས་སུ་གྱུར་བར་སྨོན་ལམ་གསུང་འདོན་གནང་ཡོད་པ་རེད།

དེ་རྗེས་དགེ་འདུན་པ་རྣམས་བོད་ཀྱི་ཆོས་དང་རིག་གཞུང་སྐོར་གོ་རྟོགས་སྤེལ་ཆེད་ལྷོ་ཨ་རིའི་ས་ཁུལ་གཞན་ཁག་ཏུ་སྐོར་བསྐྱོད་ལ་ཕེབས་ཡོད་པ་བཅས།།