༄༅། །ལྷོ་ཕྱོགས་ས་གནས་ཁྲིམས་ཞིབ་པ་ཕུན་ཚོགས་དཔལ་ལྡན་མཆོག་ཟླ་ ༨ ཚེས་ ༢ ཉིན་སྦེལ་ཀོབ་ས་གནས་ནས་མོན་གྷོ་ས་འཐུས་དམ་འབུལ་ཆེད་ཕྱིར་ཐོན་གྱིས། ཕྱི་ཚེས་ ༣ ཉིན་མོན་གྷོ་ས་གནས་སུ་འབྱོར་ཡོད་པ་དང་། དེ་ཉིན་གྱི་སྔ་དྲོའི་ཚོུད་ ༡༠།༠༠ ཐོག་ས་གནས་མི་མང་ཚོགས་ཁང་དུ་ས་གནས་འགོ་འཛིན་གཙོས་པའི་མི་མང་གྲངས་ ༢༥༠ ལྷག་ཕེབས་པ་རྣམས་ལ་བོད་རང་བཙན་ཡིན་པའི་སྐབས་ཀྱི་གཞུང་དང་ཁྲིམས་ཀྱི་འཛིན་སྐྱོང་སྐོར་དང་། བཙན་བྱོལ་མང་གཙོའི་ངོ་སྤྲོད་དང་འཕེལ་རིམ། བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་རྩ་འཛིན་ཁྲིམས་ཡིག་གི་ངོ་སྤྲོད། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ནང་གསལ་ཁ་མཆུ་ཞུ་གཏུག་གིས་ཞུ་སྙན་འབུལ་སྟངས་དང་། གྱོད་ཡ་ཉམ་ཐག་ལ་མཐུན་རྐྱེན། ཐོག་མའི་ཉན་ཞིབ། ཞིབ་གཅོད། བཅད་ཁྲ། འཇུག་གནོན་དང་གོང་ཞུའི་བྱ་རིམ་བཅས་ཀྱི་ཐོག་གོ་རྟོགས་སྤེལ་འདུག དེའི་རྗེས་ས་གནས་སུ་ཡོད་པའི་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པ་ ༥ ལྷན་ནང་མོལ་ཚོགས་འདུ་ཞིག་ཀྱང་ཚོགས་གནང་འདུག
གོང་ཚེས་ཉིན་གྱི་ཕྱི་དྲོའི་ཚོུད་ ༢ པ་ཐོག་སཾ་བྷོ་ཊ་སློབ་གྲྭའི་སློབ་སྤྱི་གཙོས་པའི་དགེ་སློབ་གྲངས་ ༣༥༠ ཙམ་ལའང་གོང་གི་བརྗོད་གཞི་ཐོག་གོ་རྟོགས་སྤེལ་ཐུབ་པ་བྱུང་ཡོད་པ་དང་། སྐབས་མཚམས་སོ་སོའི་དྲི་བ་ཁག་ལའང་ལན་འདེབས་ཞུས་འདུག
ཕྱི་ཚེས་ ༤ སྔ་དྲོའི་ཚོུད་ ༩༌༣༠ ཐོག་ས་འཐུས་ཚོགས་ཁང་ནང་ས་གནས་འཐུས་ཚོགས་སྐབས་ ༡༢ པའི་འདེམས་ཐོན་ས་འཐུས་ཚོགས་མི་ ༣༣ ནས་ཚོགས་མི་ ༣༡ ངོ་བཅར་གྱིས་ས་གནས་ཁྲིམས་ཞིབ་པའི་མདུན་ནས་ས་འཐུས་ཀྱི་ལས་འཁུར་དམ་འབུལ་ཞུས་པ་དང་། དེ་དག་གི་ཁོངས་ནས་ཚོགས་གཙོར་པདྨ་རྡོ་རྗེ་ལགས་དང་ཚོགས་གཞོན་དུ་དགེ་བཤེས་ཤེས་རབ་རྒྱ་མཚོ་ལགས་བཅས་བདམས་ཐོན་གྱིས་ཚོགས་གཙོ་ཚོགས་གཞོན་གྱི་ལས་འཁུར་དམ་བཅའ་འབུལ་བཞེས་བཅས་ལེགས་གྲུབ་བྱུང་འདུག་པའི་གནས་ཚུལ་སྙིང་བསྡུས་སུ། ། 
