༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༨ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བྱང་ཨ་རིའི་དད་ལྡན་ཡོངས་ནས་བརྟན་བཞུགས་བསྟར་འབུལ་ཞུས་པའི་མཛད་སྒོར་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་སྤེལ་བའི་ཡིག་ཐོག་གཏམ་བཤད།  

ལྷར་བཅས་སྲི་ཞིའི་གཙུག་རྒྱན། འཛམ་གླིང་ཞི་བདེའི་དེད་དཔོན།  བོད་མི་ཡོངས་ཀྱི་བླ་ན་མེད་པའི་དབུ་ཁྲིད།  རང་ཅག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བར་ལམ་ཨ་རིར་སྐུའི་ཞབས་པུས་འཕྲོད་བཞེས་སླད་ཆིབས་བསྒྱུར་བསྐྱངས་དོན་ལྟར།  མགོན་པོ་གང་གི་ཐུགས་བསྐྱེད་སྨོན་ལམ་དང་།  མཆོག་གསུམ་ཐུགས་རྗེས་འཕྲོད་བཞེས་ལམ་ལྷོངས་ཐོག སྐུ་ཁམས་དྭངས་སྐྱེད་མྱུར་དུ་འབྱུང་བཞིན་པར། གུས་འབངས་ཕྱི་ནང་དད་ལྡན་ཡོངས་ཀྱི་སེམས་ནང་ཚིག་གིས་མཚོན་ཐབས་མེད་པའི་དགའ་ཚོར་ཆེན་པོ་བྱུང་།

ད་ཆ་འཕྲོད་བཞེས་རྗེས་འབྲེལ་སྐུ་ལུས་སྦྱོང་བརྡར་མཛད་མུས་ཐོག སྐུ་ཁམས་དྭངས་སྐྱེད་ཡོང་དང་ཡོང་མུས་ཡིན་ཡང་།  ས་ཕྱོགས་གང་ས་ནས་རེ་སྐུལ་ཤུགས་ཆེ་བྱུང་དོན་གཞིར་བཟུང་གསོལ་འདེབས་ཇི་ལྟར་ཞུས་པ་བཞིན།  བྱང་ཨ་རིའི་བོད་མི་དང་།  སོག་རིགས། ཧི་མ་ལ་ཡའི་རི་རྒྱུད་མི་མང་བཅས་དད་ལྡན་སེར་སྐྱ་ཡོངས་ལ་དེ་རིང་ཨ་རིའི་གྲོང་ཁྱེར་ནིའུ་ཡོག་གི་ (UBS Arena) ཚོགས་ཁང་ཆེན་མོའི་ནང་། དངོས་སུ་ཞལ་མཇལ་གསུང་ཐོས་ཀྱི་གོ་སྐབས་དང་། སེམས་བསྐྱེད་ཀྱི་ཆོས་འབྲེལ།  བརྟན་བཞུགས་བསྟར་འབུལ་ཞུ་རྒྱུ་བཅས་ཀྱི་སྐལ་བཟང་གོ་སྐབས་གསོལ་སྩལ་བྱུང་བར། གུས་ནས་དད་ལྡན་སེར་སྐྱ་ཡོངས་ཀྱི་ཚབ་ཞུས་ཏེ་ཐུགས་རྗེ་བཀའ་དྲིན་བླ་མེད་དུ་ཆེ་ཆེ་ཆེ་ཞུ་རྒྱུ་དང་ཆབས་ཅིག  མགོན་པོ་གང་གི་བཀའ་སློབ་ལམ་སྟོན་སྤྱི་དང་།  ལྷག་པར་འཛམ་གླིང་ཡོངས་དང་བོད་མིའི་ཕན་བདེའི་ཆེད་གནང་བའི་ཐུགས་སྐྱེད་དམ་བཅའ་བཞི། ཡང་སྒོས་ད་ལྟ་དང་འབྱུང་འགྱུར་གྱི་མིའི་རིགས་ཀྱི་དཀའ་ངལ་རྣམས་མཉམ་རུབ་ཀྱི་སྒོ་ནས་སེལ་ཐབས་སུ་སྩལ་བའི་ལེགས་བཤད་གསར་པ་ཆོས་ལུགས་ལ་མ་བརྟེན་པའི་བཟང་སྤྱོད་སློབ་གསོའམ། སཱི་ཤེས་ཡོན་སྐོར་འདི་ཁུལ་ཕྱི་ནང་སྤྱི་ཚོགས་ནང་ཁྱབ་སྤེལ་དང་ལག་ལེན་གང་ཐུབ་ཞུ་རྒྱུའི་དམ་བཅའ་ཞུ་རྒྱུ་ཡིན།  

བརྟན་བཞུགས་ཀྱི་སྔོན་འགྲོའི་ཚེ་སྒྲུབ་ཞབས་རིམ་གསོག་སྒྲུབ་ཀྱི་ཐུགས་འགན་རྣམས་ཨ་རི་ཆོ་འཕྲུལ་སྨོན་ལམ་ཚོགས་པར་བཞེས་གནང་ཡོང་བའི་རེ་སྐུལ་ཞུས་པ་ལྟར།  མཉམ་ཞུགས་གནང་མཁན་སེར་སྐྱ་ཡོངས་ལ་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།

མཐའ་དོན།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བདག་ཅག་དད་དམ་གཡོ་བ་མེད་པའི་འདུལ་བྱའི་མགོན་དུ། སྐུ་ཁམས་སྔར་ལྷག་དྭངས་སྐྱེད་ཐོག  དེ་སྔ་ཡང་ཡང་ཞལ་བཞེས་བཟང་པོ་ཡོད་པ་བཞིན། སྐུ་ཚེ་ཞབས་པད་ཡུན་དུ་བརྟན་ཅིང་། བོད་དོན་བདེན་མཐའ་གསལ་ནས་རང་ཡུལ་གངས་ཅན་ལྗོངས་སུ་ཞབས་སོར་བཀྲ་ཤིས་ཀྱི་རེ་ཁཱ་གང་མྱུར་འཁོད་པའི་གསོལ་བ་ཕུར་ཚུགས་སུ་འདེབས་རྒྱུ་ཡིན། ཐུགས་རྗེ་ཆེ།  བོད་རྒྱལ་ལོ་ ༢༡༥༡ རབ་བྱུང་བཅུ་བདུན་པའི་ཤིང་འབྲུག་ཟླ་བ་ ༦ ཚེས་ ༡༨ ཕྱི་ལོ་ ༢༠༢༤ ཕྱི་ཟླ་ ༨ ཚེས་ ༢༢ ལ།།