༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  བྱང་ཨ་རིའི་གཞོན་སྐྱེས་རྣམས་ལ་དམིགས་པའི་སྤྱི་སེམས་བཟང་གསུམ་གྱི་ཤེས་ཡོན་སློབ་གསོའི་ཟབ་སྦྱོང་དེ་ཕྱི་ལོ་ ༢༠༢༤ ཟླ་བ་ ༨ ཚེས་ ༤ ཉིན་མཇུག་སྒྲིལ།  སྤྱི་ཚོགས་དང་།  སེམས་མྱོང་།  བཟང་སྤྱོད་ (སྤྱི་སེམས་བཟང་གསུམ།) བཅས་ཀྱི་ཤེས་ཡོན་སློབ་གསོ་ནི་ཨིན་སྐད་ནང་ SEE Learning (སཱི་ཤེས་ཡོན་སློབ་གསོ།) ཞེས་པ་དེ་ཡིན།  ཐེངས་འདིའི་ཟབ་སྦྱོང་དེ་བཞིན་བྱང་ཨ་རི་སྐུ་ཚབ་དོན་གཅོད་ཁང་དང་།  ཨེ་མོ་རི་གཙུག་ལག་སློབ་གཉེར་ཁང་།  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་བཅས་ཚན་པ་གསུམ་ཐུན་མོང་གིས་གྲ་སྒྲིག་བྱས་ཤིང་།  ཕྱི་ལོ་ ༢༠༢༤ ཟླ་བ་ ༨ ཚེས་ ༢ ནས་ ༤ བར་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཕུན་ཚོགས་སྡེ་བཞི་ཚོགས་ཁང་དུ་ཚོགས།   དམིགས་ཡུལ་གཙོ་བོ་ནི་མ་འོངས་བོད་ཀྱི་བདག་པོ་ཡིན་པའི་གཞོན་སྐྱེས་རྣམས་ལ་བོད་ཀྱི་རིག་གཞུང་ནང་གི་ཡ་རབས་སྤྱོད་བཟང་དང་།  བྱམས་སྙིང་རྗེ་གཞན་ཕན་གྱི་བསླབ་བྱ་རྣམས་སེམས་རྒྱུད་ལ་འཇགས་ཐབས་བྱེད་རྒྱུ་དེ་ཡིན། ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གི་ལགས་དང་།  སཱི་ཤེས་ཡོན་སློབ་གསོའི་འགན་འཛིན་ལས་རོགས་བརྩོན་འགྲུས་བསམ་འཕེལ་ལགས། ཚན་རིག་ཉམས་ཞིབ་པ་བསྟན་འཛིན་བསོད་ནམས་ལགས་དང་། ཁེ་ན་ཊའི་ཀྲོ་ཊོན་ཊོ་གྲོང་ཁྱེར་ནས་ཕེབས་པའི་གཞོན་སྐྱེས་མཐུན་སྦྱོར་བ་བསྟན་འཛིན་གཡུ་སྒྲོན་ལགས་ནི་ཟབ་སྦྱོང་སྐབས་སློབ་ཁྲིད་གནང་མཁན་གཙོ་བོ་ཡིན་པ་དང་།  ཁོང་བཞི་པོ་ནི་སཱི་ཤེས་ཡོན་སློབ་གསོའི་ཆེད་ལས་པ་རེད།  

ཚེས་ ༢ ཉིན་དབུ་འབྱེད་མཛད་སྒོའི་ཐོག་བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་དང་།  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གི་ལགས་ནས་ཁག་སོ་སོར་དབུ་འབྱེད་གསུང་བཤད་དང་།  དགའ་བསུའི་གསུང་བཤད།  སཱི་ཤེས་ཡོན་སློབ་གསོའི་གལ་གནད་བཅས་ཀྱི་སྐོར་གསུང་བཤད་མདོར་བསྡུས་རེ་གནང་རྗེས་ཟབ་སྦྱོང་དངོས་གཞི་དབུ་འཛུགས་གནང་།  ཟབ་སྦྱོང་ལ་ཨ་རི་དང་ཁེ་ན་ཊའི་ས་གནས་མི་འདྲ་བ་ཁག་དགུ་ནས་གཞོན་སྐྱེས་ ༧༠ ལྷག་ཙམ་གྱིས་ཐོ་འགོད་མཉམ་ཞུགས་གནང་ཡོད།  སྤྱི་སེམས་བཟང་གསུམ་གྱི་ཤེས་ཡོན་སློབ་གསོ་ནི་འཛམ་གླིང་སྐྱེ་འགྲོ་ཀུན་ལ་སྨན་པའི་༸གོང་ས་མཆོག་གི་རླབས་ཆེན་དགོངས་པ་ཡིན་སྟབས།  ཉིན་གསུམ་གྱི་ཟབ་སྦྱོང་ལ་མཉམ་ཞུགས་གནང་འདོད་ཡོད་ཀྱང་།  དུས་ཚོད་དང་ས་ཐག་རིང་བས་མཉམ་ཞུགས་མ་ཐུབ་པའི་གཞོན་སྐྱེས་དང་།  དེ་མིན་དོ་སྣང་ཡོད་མཁན་ཚང་མས་ཟབ་སྦྱོང་གི་ནང་དོན་ཤེས་རྟོགས་ཐུབ་པའི་ཆེད།  ཉིན་གསུམ་གྱི་ཟབ་སྦྱོང་ཆ་ཚང་བྱང་ཨ་རི་སྐུ་ཚབ་དོན་གཅོད་ཁང་གི་ངོ་དེབ་དང་།  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ངོ་དེབ་བརྒྱུད་ཐད་ཀར་རྒྱང་བསྲིངས་བྱས་ཡོད་སྟབས་ག་དུས་གཟིགས་ཀྱང་ངོ་དེབ་ཐོག་ནས་གཟིགས་རྒྱུ་ཡོད།    གཞོན་སྐྱེས་ཚང་མས་ཐེངས་འདིའི་ཟབ་སྦྱོང་ལ་དོ་སྣང་ཆེན་པོས་མཉམ་ཞུགས་གནང་བ་དང་།  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པས་ཚོགས་ཁང་གི་མཐུན་རྐྱེན་དང་།  བོད་ཀྱི་ཐེབས་རྩས་དཔལ་འབྱོར་གྱི་མཐུན་རྐྱེན་སྦྱོར་བ།  དེ་མིན་ཕྱག་རོགས་གནང་མཁན་ཚང་མར་སྐུ་ཚབ་དོན་གཅོད་ལས་ཁུངས་ནས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན། སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ནས་ཉིན་མཐའ་མའི་ཟབ་སྦྱོང་གི་མཇུག་སྡོམ་མཛད་སྒོ་གཙོ་སྐྱོང་གནང་ཞིང་།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གི་ལགས་དང་།  བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ནས་མཇུག་སྡོམ་གསུང་བཤད་གནང་རྗེས།  ཟབ་སྦྱོང་ཁྲིད་མཁན་དགེ་རྒན་བཞི་དང་།  ཕྱག་རོགས་གནང་མཁན་རྣམས་ལ་སྐུ་ཚབ་དོན་གཅོད་ནས་ཐུགས་རྗེ་ཆེ་ཞུའི་ཕྱག་རྟགས་དང་མཇལ་དར་ཕུལ།  ཨེ་མོ་རི་གཙུག་ལག་སློབ་གཉེར་ཁང་ནས་ཟབ་སྦྱོང་ལ་མཉམ་ཞུགས་གནང་མཁན་ཚང་མར་ཕྱག་ཁྱེར་གནང་སྟེ། ཐེངས་འདིའི་ཟབ་སྦྱོང་མཇུག་སྒྲིལ་གནང་བ་བཅས་ཀྱི་གནས་ཚུལ་མདོར་བསྡུས་སུ། །