༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༨ པའི་ཚེས་ ༡༦ ཉིན་བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་དང་། སྤྱི་འཐུས་ཚེ་རིང་སྒྲོལ་མ་ལགས། སྤྱི་འཐུས་ཆོས་གྲགས་རྒྱ་མཚོ་ལགས། ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཨོསྟྲེ་ལི་ཡའི་ཝིག་ཊོ་རི་ཡའི་མངའ་སྡེའི་གྲོས་ཚོགས་ནང་བོད་དོན་སྐོར་བགྲོ་གླེང་གནང་སྟེ། ཐེངས་འདིའི་ཨོསྟྲེ་ལི་ཡཱའི་རྒྱལ་ཁབ་ནང་གི་བོད་དོན་ཞུ་སྐུལ་གྱི་ལས་རིམ་དབུ་འཛུགས་གནང་ཡོད་པ་རེད།

དེ་རྗེས། ཝིག་ཊོ་རི་ཡ་མངའ་སྡེའི་གྲོས་ཚོགས་འཐུས་མི་སྐུ་ཞབས་སེམ་ ཧི་སྦིན་ (Mr Sam Hibbins MP) མཆོག་དང་། མངའ་སྡེའི་གྲོས་ཚོགས་འཐུས་མི་ལྕམ་སྐུ་ཀཱེ་ཊི་ ཧོལ་ (Ms Katie Hall MP) མཆོག་གི་དྲུང་ཡིག་སྐུ་ཞབས་ལུཀ་ (Mr. Luke) ལགས་རྣམ་པ་གཉིས་ཀྱི་གཙོ་སྐྱོང་འོག གོང་གསལ་བརྗོད་གཞིའི་ཐོག་སྤྱི་འཐུས་རྣམས་དང་ལྷན་ཆུ་ཚོད་གཉིས་ལྷག་རིང་དྲི་བ་དྲིས་ལན་གྱི་ལས་རིམ་བསྐྱངས་ཡོད་འདུག

ཕྱི་དྲོ་ཆུ་ཚོད་ ༣།༠༠ ནས་ ༤།༣༠ བར་བོད་མི་མང་སྤྱི་འཐུས་རྣམ་པ་མངའ་སྡེའི་གྲོས་ཚོགས་གོང་འོག་གཉིས་དང་། དེ་བཞིན་གྲོས་ཚོགས་ཀྱི་དཔེ་མཛོད་ཁང་སོགས་སུ་གཟིགས་སྐོར་ཕེབས་གནང་འདུག དེ་ཉིན་ལས་རིམ་སྐབས་ཨོ་གླིང་སྐུ་ཚབ་དོན་གཅོད་ཀརྨ་སེངྒེ་མཆོག་མཉམ་བཅར་ཞུས་གནང་འདུག་པ་བཅས། །