༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༢༠ ནས་ ༢༢ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག རྒྱ་གར་གྱི་རྒྱལ་ས་ལྡི་ལིར་འཛམ་གླིང་ཁོར་ཡུག་གླེང་མོལ་ནང་བོད་ཀྱི་ཁོར་ཡུག་གནད་དོན་འཚུད་ཐབས་སུ་ཐབས་བྱུས་འཆར་འགོད་དང་ཞུ་གཏུག་བྱེད་ཕྱོགས་ཀྱི་ཟབ་སྦྱོང་བསྐོང་ཚོགས་གནང་ཡོད།
ཟབ་སྦྱོང་ནང་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་སྡེ་ཚན་དང་། ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པ། འཕགས་བོད་འབྲེལ་མཐུད་ལས་ཁང་། རྒྱ་གར་དང་བླངས་བོད་དོན་ཞུ་གཏུག་ལས་འགུལ། བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། རྡ་ས་ས་གནས་འགོ་འཛིན་ལས་ཁུངས་ཀྱི་ཁོར་ཡུག་སྡེ་ཚན་བཅས་ཀྱི་སྐུ་ཚབ་མཉམ་ཞུགས་གནང་ཡོད།
དེ་ཡང་ཟབ་སྦྱོང་གི་ཉིན་དང་པོར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་པ་རྒྱལ་མཚན་ལགས་ཀྱིས་ཕེབས་བསུའི་གསུང་བཤད་དང་། བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་བདེ་ཆེན་དཔལ་མོ་ལགས་ཀྱིས་ཟབ་སྦྱོང་གི་ངོ་སྤྲོད་དང་དམིགས་ཡུལ་འགྲེལ་བརྗོད་གནང་རྗེས་ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་ཀྱིས་སྐུ་མགྲོན་གཙོ་བོའི་གསུང་བཤད་གནང་།
ཉིན་དེར་འབྱུང་འགྱུར་ལོ་ལྔའི་རིང་གི་བོད་ཀྱི་ཁོར་ཡུག་ཛ་དྲག་གནས་སྟངས་སྐོར་ཞུ་གཏུག་བྱེད་ཕྱོགས་ཐབས་བྱུས་ལ་དམིགས་ཏེ། རྒྱ་གར་ནང་གི་ (Let India Breathe) ཞེས་པའི་ཚོགས་པ་གསར་འཛུགས་གནང་མཁན་ཡཤ་མར་བ་ (Yash Marwah) ལགས་དང་། རྒྱལ་སྤྱིའི་གཙང་ཆུ་ཚོགས་པའི་ལྷོ་ཨེ་ཤི་ཡའི་ལས་འཆར་འགན་འཛིན་ཨ་ཡེ་ཤ་སུ་ཛ་ (Ayesha Dsouza) ལགས། (TERI) ཞེས་པའི་ཚོགས་ཉམས་ཞིབ་པ་ཝན་ཀ་ཀྲ་མ་ན་ (K.Venkatramana) ལགས་བཅས་ནས་ཁོར་ཡུག་གི་ལས་འགུལ་ཚགས་འཚུད་སྤེལ་ཐབས་དང་། ནུས་པ་ལྡན་པའི་ཁོར་ཡུག་གི་གནད་དོན་གླེང་སློང་ཡོང་ཐབས། འཛམ་གླིང་གི་སྣེ་གསུམ་པའི་ཁོར་ཡུག་གནད་དོན་ཞུ་གཏུག་སོགས་ཀྱི་སྐོར་གླེང་སློང་གནང་ཡོད།
ཉིན་གཉིས་པར་ཉིན་སྔོན་མའི་གྲོས་དོན་ཁག་ལ་གཞི་བཅོལ་ནས་ཐབས་བྱུས་སྒྲིག་ཐབས་ལ་དམིགས་ཏེ། རྒྱ་གར་གནས་འཁོད་མཉམ་འབྲེལ་རྒྱལ་ཚོགས་ཀྱི་ཡར་རྒྱས་ལས་གཞིའི་འབྲེལ་ལས་ཇེ་མོན་ཨུ་ཐུབ་ (Jaimon Uthup) ལགས་དང་། སོམ་ཡ་གུ་ཧ་ (Soumya Guha) ལགས་གཉིས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྒྱུན་གནས་ཡར་རྒྱས་དམིགས་ཡུལ་ཆེན་པོ་ ༡༦ ངོ་སྤྲོད་དང་། ལྷོ་ཨེ་ཤི་ཡའི་གཙུག་ལག་སློབ་གཉེར་ཁང་གི་སློབ་དཔོན་མེ་ད་བྷི་ཤི་ (Medha Bisht) ལགས་ཀྱིས་ཆུའི་སྟངས་འཛིན་དང་། ཆུ་ལ་བརྟེན་ནས་ཕྱི་འབྲེལ་སྲིད་བྱུས་སྒྲིག་ཐབས་སྐོར་ངོ་སྤྲོད་གནང་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་པ་རྒྱལ་མཚན་ལགས་ཀྱིས་རྒྱལ་སྤྱིའི་སྟེང་བོད་ཀྱི་ཁོར་ཡུག་ཛ་དྲག་གནས་སྟངས་ཞུ་གཏུག་གི་གྲུབ་འབྲས་དང་དཀའ་ངལ་སྐོར་གསུང་བཤད་གནང་ཡོད་པ་རེད།
ཟབ་སྦྱོང་གི་ཉིན་གསུམ་པར་ཀོལ་ཀ་ཏ་གཙུག་ལག་སློབ་གཉེར་ཁང་གི་སློབ་དཔོན་འཇིགས་མེད་ཡེ་ཤེས་ལགས་དང་། རང་དབང་ཅན་གྱི་སློབ་སྟོན་པ་ཇོཊ་ས་ན་ས་ར་གྷོ་ར་ཇ་ (Jyotsna Sara George) ལགས། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་འབྲེལ་མཐུད་པ་བློ་བཟང་དབྱངས་མཚོ་ལགས་བཅས་ནས་བོད་མིའི་ངོ་བོ་དང་། ཕན་ནུས་ལྡན་པའི་ཐབས་བྱུས་སྒྲིག་སྟངས། ཁོར་ཡུག་དང་འགྲོ་བ་མིའི་ཐོབ་ཐང་སོགས་ཀྱི་སྐོར་གྲོས་བསྡུར་གནང་།
མདོར་ན། ཟབ་སྦྱོང་འདིའི་དམིགས་ཡུལ་གཙོ་བོ་ནི་བོད་ནང་གི་ཁོར་ཡུག་དང་གནམ་གཤིས་འགྱུར་ལྡོག་སྐོར་ཞུ་གཏུག་བྱ་ཕྱོགས་ལོ་ལྔའི་དམིགས་ཡུལ་དང་ཐབས་བྱུས་ཀྱི་ལས་དོན་རྣམས་གཏན་འབེབས་བྱ་རྒྱུ་དེ་ཡིན་ཞིང། དེའི་ནང་དམིགས་ཡུལ་གཅིག་གྱུར། མཉམ་ལས་ཀྱི་ཐབས་ལམ། དེ་བཞིན་བོད་མིའི་གཞུང་ཁོངས་མིན་པའི་ཚོགས་པ་ཁག་བར་བོད་ཀྱི་ཁོར་ཡུག་ཐོག་མཉམ་འབྲེལ་ལས་དོན་ནུས་པ་ལྡན་པ་སྤེལ་ཐབས་སྐོར་ནན་བརྗོད་གནང་ཡོད་པ་བཅས།། 
