༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༡༤ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག རྒྱ་གར་གྱི་ཕྱི་འབྲེལ་གཞུང་ཚབ་ཟུར་པ་དང་འཛམ་གླིང་མཉམ་འབྲེལ་རྒྱལ་ཚོགས་ནང་གི་རྒྱ་གར་གྱི་གཏན་འཇགས་སྐུ་ཚབ་ཟུར་པ་སྐུ་ཞབས་དི་ལཱིཔ་སིནྷ་ལགས་ཀྱིས་འབྲི་རྩོམ་གནང་བའི། བོད་ནང་བཙན་རྒྱལ་རིང་ལུགས་པའི་རྩེད་འགྲན་དང་། འཚོ་གནས་དང་མངའ་དབང་ཆེད་འཐབ་རྩོད། (IMPERIAL GAMES IN TIBET: The Battle for Survival and Sovereignty)ཅེས་པའི་དཔེ་དེབ་སྐོར་རྩོམ་པ་པོ་ལྷན་བགྲོ་གླེང་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་གོང་ཚེས་ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ་དཔེ་དེབ་རྩོམ་པ་པོ་སྐུ་ཞབས་དི་ལཱིཔ་སིནྷ་ལགས་དང་། བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས། བོད་མི་མང་སྤྱི་འཐུས་བསྟན་འཛིན་ཆོས་འཛིན་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། དཔལ་འབྱོར་དྲུང་ཆེ་ཚེ་རིང་དོན་གྲུབ་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། དགའ་ལྡན་ཕོ་བྲང་གི་དྲུང་ཆེ་འཆི་མེད་རིག་འཛིན་ལགས། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམ་པ། གསར་འགོད་པ། དོན་གཉེར་ཅན་ཁག་ཅིག་བཅས་ལྷན་ཞུགས་ཀྱི་ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་རྩོམ་པ་པོ་ངོ་སྤྲོད་དང་སྦྲགས། ཁོང་གིས་ཆེད་རྩོམ་གནང་བའི་དཔེ་དེབ་ཀྱི་བརྗོད་གཞི་དང་འབྲེལ་ཏེ། ཨུ་རུ་སུ་དང་ཨིན་ཡུལ་བར་གྱི་རྩེད་འགྲན་ཆེན་མོའི་ཁྲོད་བོད་འཚུད་པའི་བརྒྱུད་རིམ་དང་། ཕྱི་འབྲེལ་མི་སྣ་ཞིག་གིས་བོད་ཀྱི་གནད་དོན་ལ་དོ་སྣང་གནང་བ་དེས་བོད་དོན་དོན་དེ་བཞིན་རྒྱལ་སྤྱིའི་གནད་དོན་ཞིག་ཡིན་པ་མཚོན་གྱི་ཡོད་སྐོར་སོགས་གསུངས།
དེ་རྗེས་རྒྱ་གར་གྱི་ཕྱི་འབྲེལ་གཞུང་ཚབ་ཟུར་པ་དང་དཔེ་དེབ་རྩོམ་པ་པོ་དི་ལཱིཔ་སིནྷ་ལགས་ཀྱིས་བོད་དོན་དང་འབྲེལ་བའི་དཔེ་དེབ་དེ་ཉིད་རྩོམ་དགོས་པའི་དམིགས་ཡུལ་དང་འབྲེལ་ཏེ། རྒྱ་གར་ནང་རྒྱ་དཀར་ནག་གི་འབྲེལ་བའི་ཁྲོད་ས་མཚམས་དཀའ་རྙོག་ཙམ་ལས་རྒྱ་ཆེ་ས་ནས་རྒྱ་དཀར་ནག་གི་སྤྱི་ཡོངས་ཀྱི་འབྲེལ་བ་དང་། དམིགས་བསལ་བོད་དང་འབྲེལ་བའི་གནད་དོན་སྐོར་ཤེས་རྟོགས་ཧ་ཅང་ཞན་པོ་ཡོད་པས། སྟོང་ཆ་དེ་ཉིད་སྐོང་ཆེད་ཁོང་ཉིད་ནས་བོད་དང་རྒྱ་ནག་གི་ལོ་རྒྱུས་ཀྱི་ཡིག་ཆར་ཐུགས་ཞིབ་ཀྱིས་རྒྱ་གར་མང་ཚོགས་ལ་ལོ་རྒྱུས་ཀྱི་གོ་རྟོགས་སླད་ཆེད་དེབ་དེ་བརྩམས་པ་ཡིན་སྐོར་འགྲེལ་བརྗོད་གནང་།
དེ་ལས་འཕྲོས་ཏེ་ཁོང་གིས་ཕྱི་ལོའི་དུས་རབས་བཅུ་དགུ་པ་དང་ཉི་ཤུ་པའི་ནང་དུ་བོད་ཀྱི་མཐའ་འཁོར་ཁྱིམ་མཚེས་རྒྱ་གར་ཨིན་གཞུང་དང་། ཨུ་རུ་སུ་གཉིས་ནས་མངའ་དབང་རྒྱ་སྐྱེད་ཀྱི་འཐབ་རྩོད་ཁྲོད་བོད་ནང་ཆབ་སྲིད་ཀྱི་ཤུགས་རྐྱེན་ཇི་སྤྲད་དང་། འཐབ་རྩོད་དེའི་ཁྲོད་རྒྱ་ནག་ལ་ཁེ་ཕན་ཇི་ཐོབ་སོགས་ཀྱི་སྐོར་ངོ་སྤྲོད་ཞིབ་ཕྲ་གནང་བ་མ་ཟད། ལྷག་པར་རྒྱ་གར་རང་བཙན་ཐོབ་པའི་རྗེས་སུ་རྒྱ་གར་གཞུང་གིས་བོད་ཐོག་སྲིད་བྱུས་བཟུང་སྟངས་དང་། དེའི་འཕེལ་རིམ་སོགས་ཀྱི་སྐོར་འགྲེལ་བརྗོད་ལྷུག་པོ་གནང་རྗེས་ཚོགས་བཅར་བ་ཁག་ཅིག་གི་དོགས་དྲི་ཁག་ལ་ལན་འདེབས་གསལ་བཤད་གནང་ཡོད་པ་བཅས།། 
