༄༅། །ཕྱི་ལོ་ ༢༠༢༤ ཟླ་བ་ ༨ ཚེས་ ༨ ཉིན་རྒྱ་གར་བྱང་ཕྱོགས་པན་ཇབ་མངའ་སྡེའི་གྲོང་ཁྱེར་ལུ་དྷི་ཡ་ནའི་ (King palace) ཞེས་པའི་ཚོགས་ཁང་དུ་བཙན་བྱོལ་བོད་མིའི་ཚོང་པ་ཚོགས་པའི་ཚོགས་ཆེན་ཐེངས་དྲུག་པ་དབུ་འཛུགས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་དཔལ་འབྱོར་དྲུང་ཆེ་ཚེ་རིང་དོན་གྲུབ་ལགས། གཞན་ཡང་ Indo Tibetan Hosiery Association ཞེས་པའི་ཚོགས་གཙོ་ན་ཝཱིན་སཱུད་ལགས། Delhi Jafrabad Lala Association ཡི་ཚོགས་གཙོ་ཨར་ཤ་རདྷ་ལཱ་ལཱ། Lala Tibetan Hoseiry Association ཡི་ཚོགས་གཙོ་ཀེ་ཨེན་ཀ་པཱུར་ལགས། བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཙོ་དང་ཚོགས་གཞོན་གྱིས་གཙོས་ཚོགས་མི་རྣམ་པ་བཅས་ཆེད་ཕེབས་གནང་ཡོད། ཐོག་མར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་པ་དང་ཆབས་ཅིག་སྣང་སལ་མར་མེ་ཞལ་ཕྱེ་གནང་གྲུབ་མཚམས་ཚོགས་བཅར་བ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་བླངས་རྗེས་རྒྱལ་གཅེས་པ་རྣམས་ཀྱི་ཆེད་མྱ་ངན་གུས་འདུད་སྐར་མ་གཅིག་རིང་ཞུས།

དེ་མཚུངས་ཚོང་པ་རྣམས་ས་ཁུལ་གང་དུ་ཡིན་རུང་དེའི་ཡུལ་ཁྲིམས་ཁག་འཁུར་དགོས་གལ་དང་། ཚོགས་ཆེན་སྐབས་དྲུག་པའི་སྐབས་འོས་འདེམས་བྱུང་བའི་ཚོགས་མི་རྣམ་པར་རྒྱབ་སྐྱོར་དང་ནུས་པ་མཉམ་སྤུངས་དགོས་གལ་ཡིན་པ་མ་ཟད། བཙན་བྱོལ་བོད་མིའི་ཚོང་པ་ཚོགས་པའི་ངོས་ནས་ཀྱང་བོད་མིའི་ཚོང་པ་རྣམས་ཀྱི་དཀའ་སྡུག་སེལ་ཆེད་སྒྲིག་གཞི་བཟོ་དགོས་གལ་དང་། དེ་བཞིན་བོད་མིའི་ཚོང་ལས་རྒྱུན་གནས་ཐུབ་པར་འཕྲལ་སེལ་གྱི་ཁེ་ཕན་ལ་མི་བལྟས་པར་ཕུགས་རྒྱང་རིང་པོའི་བསམ་བློ་དགོས་གལ་ཡིན་སོགས་གསུངས་རྗེས་མཐར་བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཞོན་བསྟན་འཛིན་མཁྱེན་བརྩེ་ལགས་ཀྱི་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་མཇུག་སྒྲིལ་ཡོད།