༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༠༨ ཉིན་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་ཚོགས་མི་རྒན་པ་སྐུ་ཞབས་ཨིནྡྲེཤ་ཀུ་མཱར་ལགས་རྡ་རམ་ས་ལར་ཕེབས་འབྱོར་སྐབས་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས་ནས་བཞུགས་སྒར་ཉེ་ཁུལ་གྷ་གལ་གནམ་ཐང་དུ་ཕེབས་བསུ་གནང་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཧི་མ་ཅལ་མངའ་སྡེའི་དབུས་གཙུག་ལག་སློབ་གཉེར་ཁང་གི་དགེ་རྒན་ཚོགས་ཆུང་ངོས་ནས་སྐུ་ཞབས་ཨིནྡྲེཤ་ཀུ་མཱར་ལགས་སུ་ (Brahmarishi Vashishtha Award) ཞེས་པའི་གཟེངས་རྟགས་ཕུལ་ཡོད་པ་དང་། གཟེངས་བསྟོད་མཛད་སྒོར་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་ཀྱང་ཕེབས་ཡོད།
སྐུ་ཞབས་ཨིནྡྲེཤ་ཀུ་མཱར་ལགས་རྡ་རམ་ས་ལར་ཕེབས་པའི་སྐབས་མཁའ་གྲུ་བདེ་སྲུང་གི་རིག་གཞུང་དུས་སྟོན་གྱི་གཟའ་འཁོར་འཁེལ་སྟབས། གྷ་གལ་གནམ་ཐང་དུ་གནམ་ཐང་གི་བདེ་སྲུང་སྤྱི་ཁྱབ་ཤ་ནི་ཨན་ཅལ་ལགས་ཀྱིས་སྐུ་མགྲོན་རྣམས་ལ་དྲན་རྟེན་ཕེབས་བསུ་ཞུས་ཡོད་པ་བཅས།། 
