༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་འགྲེམས་སྟོན་ཁང་ནས་བདུན་ཕྲག་གཅིག་རིང་གོ་པལ་པུར་བོད་ཁྱིམ་དང་། ཅོན་ཏ་ར་བོད་ཁྱིམ། སུ་ཇ་བོད་ཁྱིམ་བཅས་སུ་བོད་ཀྱི་ས་ཁྲའི་སྐོར་སྐོར་བསྐྱོད་འགྲེམས་སྟོན་གནང་ཡོད།
དེ་ཡང་ཕྱི་དྲིལ་བོད་ཀྱི་འགྲེམས་སྟོན་ཁང་ནས་ཕྱི་ཟླ་ ༨ ཚེས་ ༣ དང་ ༤ ཉིན་གོ་པལ་པུར་བོད་ཁྱིམ་སློབ་གྲྭའི་དགེ་ལས་སློབ་ཕྲུག་རྣམས་ལ་བོད་ཀྱི་ས་ཁྲའི་སྐོར་འགྲེམས་སྟོན་གནང་ཡོད་པ་དང་། ཕྱི་ཚེས་ ༥ དང་ ༦ ཉིན་ཅོན་ཏ་ར་བོད་ཁྱིམ། དེ་བཞིན་ཕྱི་ཚེས་ ༧ ནས་ ༩ བར་སུ་ཇ་བོད་ཁྱིམ་བཅས་སུ་འགྲེམས་སྟོན་གནང་ཡོད།
བདུན་ཕྲག་གཅིག་རིང་གི་འགྲེམས་སྟོན་ལེགས་གྲུབ་བྱུང་བ་ནི་གཙོ་བོ་སློབ་གྲྭའི་དགེ་ལས་དང་། རྒན་བདག་རྣམ་པའི་མཉམ་རུབ་དང་ལྷག་བསམ་ལ་བརྟེན་ནས་བྱུང་བ་ཞིག་ཡིན། དེ་བཞིན་སློབ་ཕྲུག་ངོས་ནས་བོད་ཀྱི་ས་ཁྲ་དང་འབྲེལ་བོད་ཀྱི་ལོ་རྒྱུས། བོད་དུ་ཕྱིར་ལོག་མ་ཐུབ་པའི་རྒྱུ་མཚན་ཐད་དྲི་བ་སོགས་ཀྱི་སྒོ་ནས་དོ་སྣང་ཆེན་པོས་མཉམ་ཞུགས་གནང་ཡོད།
ཐེངས་འདིའི་གྲུབ་འབྲས་ལེགས་གྲུབ་སོན་པར་བརྟེན་ཕྱི་དྲིལ་བོད་ཀྱི་འགྲེམས་སྟོན་ཁང་ངོས་ནས་མ་འོངས་པར་ལས་གཞི་འདི་ལྟ་བུ་རྒྱ་ཆེར་སྤེལ་འཆར་ཡོད་པ་བཅས།།
