༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་འཕར་བསྟན་འཛིན་ནོར་བུ་ལགས་ནས་ཕྱི་ལོ་ ༢༠༢༤ ཟླ་བ་ ༨ ཚེས་ ༧ ནས་ཕྱོགས་བསྐྱོད་ཀྱིས་རྒྱ་གར་དབུས་ཕྱོགས་གཞིས་ཆགས་ཨོ་ཌི་ཤ་ཕུན་ཚོགས་གླིང་ས་གནས་སུ་ཟླ་བ་ ༨ ཚེས་ ༩ ནས་ ༡༡ བར་ཉིན་གྲངས་གསུམ་རིང་གཞུང་འབྲེལ་ཕྱོགས་བསྐྱོད་གནང་ཡོད།
དེ་ཡང་ད་ལན་གྱི་གཞུང་འབྲེལ་ཕྱོགས་བསྐྱོད་དེ་བཞིན་བཀའ་ཤག་སྐབས་ ༡༦ པའི་ཕུག་དམིགས་ཡིག་ཆའི་ནང་གསལ་གྱི་སྲིད་བྱུས་དགོངས་དོན་ཨོ་ཌི་ཤ་ཕུན་ཚོགས་གླིང་ས་གནས་སུ་གཞིས་སྤོས་ལས་གཞིའི་ལས་དོན་ཁོངས་འཛུགས་སྐྲུན་གྱི་ལས་གཞི་འགོ་འཛུགས་གང་མྱུར་ཞུ་རྒྱུ་དང་འབྲེལ་ཕྱོགས་བསྐྱོད་གནང་བ་ཞིག་ཡིན་ཞིང་། ཨོ་ཌི་ཤ་ཕུན་ཚོགས་གླིང་ས་གནས་སུ་གཞིས་སྤོས་ལས་གཞིའི་ནང་ཁྱོན་ཁྱིམ་ཚང་ ༢༠ ནས་གཞིས་སྤོ་གནང་གཏན་འཁེལ་ཡོད་བའི་ཁོངས་ཕྱི་ལོ་ ༢༠༢༤་་་༢༥ ལོའི་ནང་གཞིས་སྤོའི་གཞིས་ཁང་འཛུགས་སྐྲུན་ཞུ་མཁན་ཁྱིམ་ཚང་ ༡༡ ཡོད་པར་དེ་དག་གི་གཞིས་ཁང་འཛུགས་སྐྲུན་ལག་བསྟར་མཇུག་སྐྱོང་སླད་སྒྲིག་མཐུན་བོགས་ལེན་པར་རིན་ཚད་འགྲན་ཤོག་རིམ་བསྡུར་ཞུ་ཕྱོགས་དང་། འཛུགས་སྐྲུན་གང་མྱུར་འགོ་འཛུགས་ཞུ་ཕྱོགས་དང་འབྲེལ་ཛ་དྲག་ཕྱོགས་བསྐྱོད་ཞུས་པ་ཞིག་ཆགས་ཡོད། 
དེ་བཞིན་ད་ལན་གྱི་གཞིས་སྤོས་ལས་གཞིའི་འཛུགས་སྐྲུན་མཇུག་སྐྱོང་ལག་བསྟར་ཞུ་རྒྱུའི་ལས་དོན་དང་ལྷན་ཨོ་ཌི་ཤ་ཕུན་ཚོགས་གླིང་ས་གནས་འགོ་འཛིན་ཁྱབ་ཁོངས་འདས་ད་མ་འོངས་གསུམ་གྱི་ལས་འཆར་ཁག་ལ་རྟོག་ཞིབ་གཙོ་བོ་ཐོག དགོན་སྡེ་ཁག་ལ་གནས་མཇལ། ཁྱབ་ཁོངས་སྒྲིག་འཛུག་ཁག་གི་ཁོངས་རྒས་གསོ་ཁང་དང་། འགྲོ་ཕན་བོད་ཀྱི་སྨན་རྩིས་ཁང་ཡན་ལག སྨན་ལྷ་སྨན་ཁང་། དེ་བཞིན་ཅན་དར་གྷི་རི་འབྲིང་རིམ་སློབ་གྲྭ་དང་། ལོ་བྷར་སིངྒ་གཞི་རིམ་སློབ་གྲྭ། མཉམ་འབྲེལ་ཁྱབ་ཁོངས་བཟོ་གྲྭ། སུད་སི་མངའ་རིས་སྐོར་གསུམ་སློབ་ཕྲུག་ཉལ་ཁང་བཅས་ཀྱི་བདེ་སྡུག་སྙན་གསན་ལ་རྟོག་ཞིབ་སྐྱོར་བསྐྱོད་འཐུས་ཚང་ཞུས་ཡོད། དྲུང་འཕར་བསྟན་འཛིན་ནོར་བུ་ལགས་དང་ལྷན་ནང་སྲིད་ལས་ཁུངས་ཀྱི་ཨར་ལས་འཆར་འགོད་ཁྱད་ལས་པ་བསྟན་འཛིན་བསྟན་པ་ལགས་ནས་ལྷན་བཅར་ཞུས་ཡོད། །
