༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༣༡ ཉིན་བོད་ཀྱི་ཟློས་གར་ཚོགས་པའི་གར་གླུའི་རིག་རྩལ་ཁང་དུ་དབྱར་དུས་བོད་ཀྱི་ཟློས་གར་སྒྱུ་རྩལ་སྦྱོང་བརྡར་ལེགས་གྲུབ་ཟིན་པའི་མཇུག་བསྡོམས་མཛད་སྒོ་ཚོགས་ཡོད།
དེ་ཡང་སྐུ་མགྲོན་གཙོ་བོ་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། དམིགས་བསལ་སྐུ་མགྲོན་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས། ཆོས་རིག་ལས་ཁུངས་ཀྱི་དྲུང་ཆེ་བདུད་འདུལ་རྡོ་རྗེ་ལགས་ཕེབས་གནང་ཡོད་པ་དང་། དབྱར་དུས་བོད་ཀྱི་ཟློས་གར་སྒྱུ་རྩལ་སྦྱོར་བརྡར་འདི་ཁ་སྔོན་ཕྱི་ཟླ་ ༧ ཚེས་ ༡ ནས་ ༣༡ བར་ཉིན་གྲངས་སོ་གཅིག་རིང་བྱང་ཨ་རི་དང་སུད་སི་བཅས་ནས་སློབ་ཕྲུག་ཁྱོན་སུམ་ཅུ་མཉམ་ཞུགས་གནང་ཡོད།
མཛད་སྒོའི་ཐོག་མར་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ནས་ཟབ་སྦྱོང་གི་བརྒྱུད་རིམ་ནང་ཁྱིམ་བདག་དང་དགེ་རྒན་ཚོས་ཐུགས་ཁུར་ཆེ་བསྐྱེད་ཀྱིས་དོན་སྨིན་ལྡན་པའི་གྲུབ་འབྲས་བཟང་པོ་བྱུང་བར་འཚམས་འདྲི་དང་ཐུགས་རྗེ་ཆེ་ཞུས་རྗེས་སྦྱོང་བརྡར་ནང་མཉམ་ཞུགས་གནང་མཁན་སློབ་མ་ཚོས་ལྷ་མོའི་རྣམ་ཐར་དང་ནང་མ་སྟོད་གཞས། རོལ་ཆ་དཀྲོལ་སྟངས་དང་ཞབས་གཞས་འཁྲབ་སྟོན་སོགས་ལེ་ཚན་བཅུ་གཉིས་ཙམ་རྒྱ་ཆེའི་སྐུ་མགྲོན་ལྷན་རྒྱས་དང་། ཁྱིམ་བདག་ཚོར་གཟིགས་འབུལ་གཟབ་རྒྱས་ཞུས་པར་ཀུན་གྱིས་བསྔགས་བརྗོད་ཆེན་པོ་གནང་སོང་།
དེ་རྗེས་སྐུ་མགྲོན་གཙོ་བོ་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ད་ལྟའི་དུས་སུ་བོད་ནང་རྒྱ་ནག་གཞུང་གིས་རིག་གཞུང་བཙན་ཤེད་ཀྱིས་རྒྱ་བསྒྱུར་གྱི་སྲིད་བྱུས་ལ་མཐའ་གཅིག་ཏུ་ངོ་རྒོལ་ཡོད་པ་དང་། བཙན་བྱོལ་དུ་བཞུགས་པའི་བོད་རིགས་སྤུན་ཟླ་ཡོངས་ནས་༸རྒྱལ་བའི་བཀའ་དགོངས་བཞིན་རིག་གཞུང་སྲུང་སྐྱོབ་གནང་དགོས་སྐོར་དང་། བོད་ཀྱི་ཟློས་གར་ཚོགས་པ་དེའང་༸གོང་ས་མཆོག་གིས་ཐུགས་རྗེ་བཀའ་དྲིན་དང་ཐུགས་བཞེད་ཟབ་མོས་ཐོག་བཙན་བྱོལ་དུ་འབྱོར་མ་ཐག་ཏུ་གསར་འཛུགས་གནང་པ་ཞིག་ཡིན་པར་སོང་། ཕྱི་རྒྱལ་དུ་སྐྱེས་འཚར་བྱུང་བའི་སློབ་མ་རྣམས་ལ་རིག་གཞུང་བརྒྱུད་སྤྲོད་ཞུ་རྒྱུའི་གོ་སྐབས་བཟང་པོ་བྱུང་བར་བསྔགས་བརྗོད་ཆེན་པོ་གནང་བ་དང་། ཁྱིམ་བདག་ཚོའི་ངོས་ནས་སློབ་ཕྲུག་ཚོར་བློས་གཏོང་ཆེན་པོས་རྒྱབ་སྐྱོར་གནང་བར་བཀའ་དྲིན་ཆེ་ཞེས་གསུང་བཤད་སྟེ་མཛད་སྒོ་རྒྱལ་ཁའི་ངང་གྲུབ་ཡོད་པ་བཅས། །
