༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༠༣ ཉིན་ཉི་འོང་སྐུ་ཚབ་དོན་ཁང་གི་གོ་སྒྲིག་འོག་ཟླ་གྲངས་གསུམ་རིང་གི་བོད་ཡིག་ཟབ་སྦྱོང་འགོ་འཛུགས་གནང་ཡོད།

དེ་ཡང་བོད་ཡིག་ཟབ་སྦྱོང་དབུ་འབྱེད་མཛད་སྒོའི་ཐོག་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་སྦྲགས། བོད་ཀྱི་སྐད་ཡིག་ལ་དོ་སྣང་གནང་བར་ཐུགས་རྗེ་ཆེ་ཞུས་པའི་ཐོག ཟབ་སྦྱོང་གི་བསླབ་གཞི་དང་སློབ་ཁྲིད་པ་ངོ་སྤྲོད་གནང་། དེ་བཞིན་ཁོང་གིས་ཟབ་སྦྱོང་སྐབས་བོད་ཀྱི་སྐད་ཡིག་དང་ཆབས་ཅིག བོད་ཀྱི་ཆོས་དང་རིག་གཞུང་སྐོར་ཡང་སློབ་ཁྲིད་གནང་གི་ཡོད་པ་གསུངས།

ཟབ་སྦྱོང་ནང་དུ་ཀྲོག་ཡོ་གྲོང་ཁྱེར་དང་ཉེ་ཁུལ་ས་གནས་ཁག་གི་ཚོགས་བཅར་བ་རྣམས་ཉི་འོང་སྐུ་ཚབ་དོན་ཁང་དུ་འཛིན་གྲྭར་དངོས་སུ་བཅར་རྒྱུ་དང་། ས་ཐག་རིང་བའི་ཚོགས་བཅར་བ་རྣམས་དྲྭ་ཐོག་ནས་མཉམ་ཞུགས་གནང་གི་ཡོད། ཚོགས་བཅར་བའི་ཁོངས་སུ་སློབ་གཉེར་བ་གསར་རྙིང་གཉིས་ཀ་ཡོད་པ་དང་། ཁོང་རྣམས་ནས་བོད་ཀྱི་སྐད་ཡིག་སྦྱང་རྒྱུ་དེ་གཙོ་བོ་བོད་ཀྱི་ཆོས་དང་རིག་གཞུང་སྐོར་རྒྱུས་ལོན་ཞུ་རྒྱུ་ཡིན་པ་གསུངས་ཡོད་པ་བཅས།།