༄༅། །འདི་གར་ཨོསྟྲེ་ལི་ཡཱ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨ་རིའི་གྲོས་ཚོགས་གོང་འོག་གཉིས་ནས་གཏན་འབེབས་གནང་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་ཨ་རིའི་སྲིད་འཛིན་ཇོ་བྷའི་ཊེན་ (Joe Biden) མཆོག་གིས་ཕྱི་ལོ་ ༢༠༢༤ ཟླ་བ་ ༧ ཚེས་ ༡༢ ཉིན་མཚན་རྟགས་བསྐྱོན་པའི་རྗེས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་གཙོས་ཚོགས་སྡེ་ཁག་དང་། མི་སྒེར་བཅས་གང་ས་ནས་དགའ་བསུ་ཞུས་དང་ཞུ་བཞིན་ཡོད་པ་བཞིན། ཕྱི་ཟླ་ ༧ ཚེས་ ༡༣ ཉིན་ཨོ་གླིང་སིཌ་ཎི་ས་གནས་བོད་རིགས་མཐུན་ཚོགས་ནས་དགའ་སྤྲོའི་འདུ་འཛོམས་ཤིག་གོ་སྒྲིག་གནང་ཡོད།
སྐབས་དེར་སིཌ་ཎི་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས་ཀྱིས་ད་རེས་ཨ་རི་གཞུང་ནས་ལོ་རྒྱུས་རང་བཞིན་ལྡན་པའི་བོད་དོན་ཁྲིམས་ཡིག་ཞིག་གཏན་འབེབས་གནང་ཐུབ་པར་དགའ་སྟོན་རྟེན་འབྲེལ་གྱི་ཚུལ་དུ་དགའ་སྤྲོའི་འདུ་འཛོམས་འདི་གོ་སྒྲིག་ཞུས་ཡིན་པ་དང་། དེ་ཡང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་བྱུང་བ་ཞིག་ཡིན་པའི་ཐོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གཙོ་བོར་གྱུར་བའི་ལས་ཀྱི་སྣེ་མོ་བ་དང་། བོད་དོན་རྒྱབ་སྐྱོར་བ་སོགས་མང་པོས་ནུས་པ་མཉམ་སྤུངས་གི་ཐོག་ནས་ལས་འགུལ་སྤེལ་བར་བརྟེན་ནས་བོད་དོན་ཁྲིམས་ཡིག་འདི་ལ་རྒྱབ་སྐྱོར་ཤུགས་ཆེ་ཐོབ་པ་ཞིག་ཆགས་ཡོད་པས་འབྲེལ་ཡོད་ཚང་མར་ཐུགས་རྗེ་ཆེ་ཞུ་རྒྱུ་ཡིན་གསུངས་གནང་རྗེས་ས་གནས་མང་ཚོགས་ནས་དགའ་སྤྲོའི་གླུ་གར་ཁྲབ་སྟོན་གནང་བ་དང་གསོལ་ཇ་ཞལ་ཏོག་འདེགས་འབུལ་བཅས་གནང་ཡོད་པ་བཅས།། 
