༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༧ ཉིན་སྡེ་ར་ལྡུན་དང་། ཧར་པར་སྤུར་ས་གནས་འགོ་འཛིན་གཉིས་ཀྱིས་སྣེ་ཁྲིད་འོག་རྒྱ་གར་མངའ་སྡེ་ཨུ་ཏར་ཁནྜ་དུ་གནས་སྡོད་བོད་མི་རྣམས་ཀྱིས་རྒྱ་གར་ཉམ་ཐག་ནང་མི་ ༡༡༣ ལ་བཟའ་ཆས་བགོས་འགྲེམས་གནང་ཡོད།
དེ་ཡང་ནང་མི་དེ་ག་ནི་མན་ཌུ་ཝ་ལའི་ཟམ་པའི་འོག་སྡོད་ཀྱི་ཡོད་པ་གང་ཞིག གཞི་རྩའི་གཙང་སྦྲ་དང་འཕྲོད་བསྟེན་གྱི་མཐུན་རྐྱེན་གང་ཡང་མེད་པ་མ་ཟད། ལས་ཀའི་རང་བཞིན་དེ་ཕལ་ཆེར་ཉིན་གླ་དང་། གཞན་གྱི་ཁྱིམ་ཚང་དུ་ནང་ལས་བཅས་ངེས་མེད་ཀྱི་ལས་ཀ་བྱེད་བཞིན་ཡོད་པ་རེད། ཧར་པར་སྤུར་དང་། ལ་ཁན་ཝ་ལ། ཁེ་ར། སྦ་ལུ་ཝ་ལ་བཅས་སུ་གནས་སྡོད་བོད་མི་རྣམས་ཀྱིས་གྲོ་ཞིབ་དང་། འབྲས། སྲན་མ། བྱེ་མ་ཀ་ར། ཚ་བཅས་ཀི་ལོ་ལྔ་རེ་དང་། ཇ་གྷ་རམ་ ༢༥༠ བཅས་བགོ་འགྲེམས་གནང་ཡོད།
ལས་གཞི་དེ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལུགས་ལྟར་དགུང་གྲངས་ ༩༠ ཕེབས་པའི་འཁྲུངས་སྐར་སྲུང་བརྩི་དང་སྟབས་བསྟུན་ཁོང་ལ་བཀའ་དྲིན་རྗེས་དྲན་དང་། ཁོང་མྱུར་དུ་དྲག་བསྐྱེད་ཡོང་ཕྱིར་ཡིན་པ་དང་སྦྲགས། ཨ་ཏར་ཁནྜ་མངའ་སྡེའི་གཞུང་མང་གཉིས་ཀྱིས་ལོ་ངོ་མང་པོའི་རིང་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུ་ཕྱིར་ཡིན་པ་བཅས།།
