༄༅། །ཉེ་ཆར་ཨ་རིའི་སྲིད་འཛིན་ཇོ་བྷའི་ཌེན་མཆོག་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་ཁྲིམས་ཡིག་དེ་ཉིད་ཨ་རིའི་གཞུང་འབྲེལ་སྲིད་བྱུས་སུ་གཏན་ལ་ཕབ་སྟེ་ལོ་རྒྱུས་རང་བཞིན་ལྡན་པ་ཞིག་ཆགས་ཡོད་པར། བོད་མི་ཡོངས་དགའ་སྤོབས་བྱ་འོས་པ་དང་འབྲེལ་ཡོད་རྣམས་ལ་ཐུགས་རྗེ་ཆེ་མཚོད་སླད་མོན་གྷོ་འདོད་རྒུ་གླིང་ས་གནས་སུ་མི་མང་རྣམས་ནས་དང་བླངས་དང་། གཞིས་གྲོང་སོ་སོའི་སྤྱི་མི་ནས་རྐང་འགན་འོག་སྲུང་བརྩི་མི་དམན་པར་ཞུས་ཡོད།

དེ་བཞིན་མོན་གྷོ་འདོད་རྒུ་གླིང་ས་གནས་སུ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གཞུང་འབྲེལ་འཚམས་གཟིགས་སུ་ཕེབས་པ་དང་སྟབས་བསྟུན་ཕྱི་ལོ་ ༢༠༢༤ ཟླ་བ་ ༧ ཚེས་ ༡༨ ཉིན་ས་གནས་འགོ་འཛིན་ལས་ཁུངས་ནས་ཤེས་རིག་བཀའ་བློན་མཆོག་དབུ་བཞུགས་ཀྱིས་མི་མང་ཕོན་ཆེན་འཛོམས་ཐོག་ཨ་རི་གཞུང་དམངས་གཉིས་ལ་ཐུགས་རྗེ་ཆེ་ཞུའི་མཛད་སྒོ་གང་ལེགས་ཚོགས་གནང་ཡོད། །