༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༧ ཉིན་བསྟན་འཛིན་སྒང་བོད་མིའི་གཞིས་ཆགས་སུ་ཨ་རི་གཞུང་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་བཀའ་དྲིན་རྗེས་དྲན་མཚོན་སླད་མཛད་སྒོ་ཞིག་གོ་སྒྲིག་ཞུས་ཡོད།

དེ་ཡང་མཛད་སྒོའི་ཐོག་ས་གནས་འགོ་འཛིན་རབ་བརྟན་ཚེ་རིང་ལགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་ཨ་རིའི་སྲིད་འཛིན་ཇོ་བྷའི་ཊེན་ (Joe Biden) མཆོག་གིས་ཕྱི་ལོ་ ༢༠༢༤ ཟླ་བ་ ༧ ཚེས་ ༡༢ ཉིན་མཚན་རྟགས་བསྐྱོན་རྗེས་ཨ་རིའི་གཞུང་འབྲེལ་སྲིད་བྱུས་སུ་གྱུར་ཡོད་ཅེས་གསུངས། དེ་བཞིན་ས་གནས་རང་བདེན་ཚོགས་ཆུང་གི་ཚོགས་གཙོ་བློ་གྲོས་ཕུན་ཚོགས་ལགས་ཀྱིས་ཁྲིམས་ཡིག་གི་གལ་གནད་སྐོར་གསུང་བཤད་གནང་ཡོད། གསུང་བཤད་ཀྱི་ལས་རིམ་གྲུབ་མཚམས་བསྟན་འཛིན་སྒང་གཞིས་ཆགས་ཀྱི་མི་མང་དང་། རྒྱུད་སྟོད་དགོན་པའི་དགེ་འདུན་པ། དགེ་རྒན། ལས་བྱེད། སློབ་ཕྲུག་བཅས་ཀྱིས་ཨ་རིའི་གཞུང་དང་མི་མང་གི་བཀའ་དྲིན་མཚོན་ཆེད་ཉིན་གཅིག་རིང་དགའ་སྟོན་གྱི་མཛད་སྒོ་ཚོགས་ཡོད་པ་རེད། །