༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༤ ཉིན་བདེ་སྐྱིད་གླིང་བོད་མིའི་གཞིས་ཆགས་སུ་ཉེ་ལམ་ཨ་རི་གཞུང་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་ཐུགས་རྗེ་ལེགས་འབུལ་ཞུ་རྒྱུའི་འདུ་འཛོམས་མཛད་སྒོ་ཚོགས་ཡོད།

དེ་ཡང་བོད་ཆོལ་གསུམ་ཚོགས་པས་གོ་སྒྲིག་ཞུས་པའི་མཛད་སྒོའི་ཐོག་ས་གནས་འགོ་འཛིན་དང་། ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་བདེན་ཚོགས་ཆུང་གི་ཚོགས་གཙོ་སོགས་ཕེབས་ཞུགས་གནང་ཡོད། མཛད་སྒོའི་ཐོག་ས་གནས་འགོ་འཛིན་དོན་གྲུབ་རྒྱལ་པོ་ལགས་ཀྱིས་ཨ་རི་གཞུང་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་དགའ་བསུ་ཞུས་པ་དང་འབྲེལ། ཨ་རི་གཞུང་ནས་བོད་མིའི་རང་དབང་འཐབ་རྩོད་ལ་ཆབ་སྲིད་ཀྱི་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་ཡོད།

དེ་བཞིན་ཕྱི་ཚེས་ ༡༦ ཉིན་དགེ་འཕེལ་གླིང་བོད་མིའི་གཞིས་ཆགས་སུའང་དེ་མཚུངས་ཀྱི་དགའ་སྟོན་མཛད་སྒོ་གོ་སྒྲིག་གནང་ཡོད་པ་བཅས།།