༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༧ རེས་གཟའ་ལྷག་པ་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་ཉེ་ལམ་ཟླ་བ་ ༠༧ ཚེས་ ༡༢ ཉིན་ཨ་རིའི་སྲིད་འཛིན་ཇོ་བྷའི་ཊེན་མཆོག་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་ཨ་རིའི་གཞུང་འབྲེལ་སྲིད་བྱུས་སུ་གཏན་འབེབས་གནང་བར་བོད་མིའི་སྒྲིག་འཛུགས་ངོས་ནས་བཀའ་དྲིན་རྗེས་དྲན་མཚོན་བྱེད་དགའ་སྟོན་གྱི་མཛད་སྒོ་ཚོགས་ཡོད།

དེ་ཡང་ཉིན་རྒྱབ་ཆུ་ཚོད་ ༣།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག བོད་མི་མང་སྤྱི་འཐུས་རྒྱུན་ལས། ལྷན་ཁང་ཁག་གི་དྲུང་ཆེ་རྣམ་པ། སྲི་ཞུ་བ་བཅས་ཚང་འཛོམས་ཀྱིས་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བླངས་གྲུབ་མཚམས་རྒྱལ་གཅེས་པ་རྣམས་ཀྱི་ཆེད་མྱ་ངན་གུས་འདུད་སྐར་མ་གཅིག་རིང་ཞུས།དེ་ནས་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་ཞིང་། འདི་ལྟ་བུའི་དུས་ཚོད་གལ་ཆེ་སྐབས་དགའ་བ་སྒོམ་དགོས་པ་ཞིག་དང་། ཁྲིམས་ཡིག་འདི་གཏན་ལ་ཕབ་ཕྱིར་སྐུ་ལས་བསྐྱོན་མཁན་ཡོངས་བཀའ་དྲིན་ཆེན་པོ་ཡིན་པ་གསུངས་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བའི་ནང་དོན་བོད་ཡིག་ཐོག་ལྗགས་ཀློག་གནང་བ་དང་ཆབས་ཅིག ཁྲིམས་ཡིག་འདིས་གཙོ་བོ་རྒྱ་ནག་གཞུང་གིས་བོད་ཀྱི་ལོ་རྒྱུས་ཐད་འཁྱོག་བཤད་བྱེད་པ་ལ་ཁ་བཏད་དང་། ཨ་རིའི་གཞུང་གིས་ངོས་ནས་ངོས་ལེན་མེད་པ་གསལ་པོར་མཚོན་ཐུབ་ཀྱི་ཡོད་ཅེས་གསུངས།དེ་རྗེས་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ཁྲིམས་ཡིག་འདི་གཏན་འབེབས་བྱུང་བར་བོད་རིགས་ཚོར་དགའ་ཚོར་ཆེན་པོ་བྱུང་ཡོད་སྐོར་དང་འབྲེལ་ཨ་རི་ནི་བོད་ཀྱི་གནས་བབ་ལ་དུས་རྟག་ཏུ་དོ་སྣང་ཡོད་མཁན་ཞིག་ཆགས་ཀྱི་ཡོད་པ་གསུངས། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིར་ཆིབས་བསྒྱུར་བསྐྱངས་སྐབས་ཨ་རིའི་སྲིད་འཛིན་རྣམས་ནས་ཕོ་བྲང་དཀར་པོར་གདན་འདྲེན་ཞུས་པ་མ་ཟད། བོད་ནང་གི་ཛ་དྲག་གནས་སྟངས་ཐོག་གྲོས་ཚོགས་ནང་དུས་དང་འཚམ་པའི་གྲོས་ཆོད་མང་དག་ཅིག་བཞག་གནང་ཡོད་པ། ཨ་རི་གཞིས་སྤོས་ལས་གཞི་འོག་བོད་མི་སྐྱབས་བཅོལ་བ་མང་དག་ཅིག་ལ་ཨ་རིའི་མི་སེར་བཞིན་ཐོབ་ཐང་ལོངས་སུ་སྤྱོད་བཞིན་ཡོད་པ་སོགས་ཀྱི་སྐོར་ནན་བརྗོད་གནང་ཡོད།

དེ་བཞིན་ཕྱི་ལོ་ ༢༠༠༢ ལོར་ཐོག་མར་ཨ་རིའི་བོད་དོན་སྲིད་བྱུས་ (Tibet Policy Act) ཞེས་ཁྲིམས་སུ་བཅའ་བ་དེ་བོད་དོན་ཐོག་ཨ་རིའི་གཞུང་གིས་སྲིད་བྱུས་གཏན་འབེབས་གནང་བ་སོགས་རླབས་ཆེན་གྱི་རྒྱབ་སྐྱོར་གནང་བ་གསལ་པོར་མཚོན་ཐུབ་ཀྱི་ཡོད། ཐེངས་འདིར་གྲོས་ཚོགས་འཐུས་མི་རྣམ་པས་ཐུགས་འགན་གཙོ་བོ་བཞེས་ཏེ་ཨ་རིའི་གཞུང་མང་གཉིས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།

དེ་ནས་སྲིད་ཚབ་བདེ་སྲུང་བཀའ་བློན་མཆོག་གིས་ད་ལྟའི་བོད་ནང་སློབ་གྲྭ་སྒོ་རྒྱག་དགོས་པའི་ཡིད་སྐྱོའི་གནས་ཚུལ་ཐོན་ཡོད་སྐོར་འགྲེལ་བརྗོད་གནང་བ་དང་འབྲེལ། རྒྱ་ནག་གཞུང་གི་བྱ་སྤྱོད་དེ་དག་འཛམ་གླིང་གི་མི་མང་དང་། འགྲོ་བ་མིའི་ཐོབ་ཐང་ཚོགས་པས་དོ་སྣང་བྱེད་བཞིན་ཡོད་ཅེས་གསུངས།

མཐར་སླར་ཡང་ཨ་རིའི་གཞུང་མང་གཉིས་ནས་དྲང་བདེན་ལ་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུས་པ་དང་འབྲེལ་དེར་སྐུ་ལས་བསྐྱོན་མཁན་གྲོས་ཚོགས་འཐུས་མི་དང་། བྱང་ཨ་རི་སྐུ་ཚབ་དོན་གཅོད། རྒྱལ་སྤྱིའི་བོད་དོན་ལས་འགུལ་ཁང་། བོད་རིགས་ཚོགས་པ། སྤྱི་མཐུན་ཚོགས་པ། དེ་བཞིན་གཞུང་དང་གཞུང་ཁོངས་མ་ཡིན་པའི་ཚོགས་པ་དང་མི་སྒེར། ལྷག་པར་རྒྱ་གར་གཞུང་མང་བཅས་ལ་ཐུགས་རྗེ་ཆེ་ཞུས་ཡོད་པ་བཅས།།