༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༡༧ ནས་ ༢༣ བར་ཉིན་གྲངས་ ༧ རིང་སྦེལ་ཇམ་ཆོས་རིག་འཛིན་སྐྱོང་ཁང་གི་འཇམ་དབྱངས་བློ་འཕེལ་གཟའ་མཇུག་སློབ་གྲྭ་ནས་དབྱར་གསེང་རིག་གཞུང་ཟབ་སྦྱོང་ཐེངས་ ༡༣ དེ་བཞིན་སྦེལ་ཇམ་གྱི་ས་གནས་ཧྥོ་ལོ་རེན་ནི་སི་ (Florennes) ཞེས་པར་རྟེན་གཞི་བྱས་པའི་རྫོགས་ཆེན་ར་ཉག་དཔལ་སྤྲུལ་རིན་པོ་ཆེ་མཆོག་གི་ཆོས་ཚོགས་འོག་མིན་ཆོས་ཀྱི་གྲོང་ཁྱེར་ (Dharma City) ཞེས་པའི་ནང་བསྐོང་ཚོགས་གནང་ཡོད།
དེ་ཡང་ཐེངས་འདིའི་དབྱར་གསེང་ཟབ་སྦྱོང་ནང་ཕ་རན་སི་ཁུལ་གྱི་བོད་ཀྱི་སྐད་ཡིག་དང་ཡིག་གཞུང་སློབ་གྲྭ་ཁག་ལྔ་ནས་སློབ་མ་གྲངས་ ༣༡ དང་། སྭི་ཌན་ནས་སློབ་མ་ ༢ ནི་དར་ལེནྜ་ནས་སློབ་མ་ ༢ བཅས་ཕྱི་ནས་ཁྱོན་སློབ་མ་གྲངས་ ༣༥ དང་། སྦེལ་ཇམ་ཆོས་རིག་འཛིན་སྐྱོང་ཁང་གི་ཁྱབ་ཁོངས་སློབ་ཁག་དྲུག་ནས་སློབ་མ་གྲངས་ ༡༠༠ བཅས་ཁྱོན་སློབ་ཕྲུག་གྲངས་ ༡༣༥ ཐེངས་འདིའི་དབྱར་གསེང་ཟབ་སྦྱོང་ནང་མཉམ་ཞུགས་གནང་འདུག
ཕྱི་དྲོ་ཕ་མའི་ཉིན་མོའི་མཛད་རིམ་འགོ་འཛུགས་མ་ཞུས་གོང་ཉིན་གུང་ཆུ་ཚོད་ ༡༢།༠༠ ནས་དང་པོ་བར་ཆུ་ཚོད་གཅིག་རིང་དབྱར་གསེང་སློབ་མ་རྣམས་ལ་སྦེལ་ཇམ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་བོད་མིའི་སྒྲིག་འཛུགས་ཀྱི་ངོ་སྤྲོད་སྙིང་བསྡུས་ཤིག་སྤྱན་བསྟར་ཞུས་རྗེས་སློབ་མ་རྣམས་དང་ལྷན་དྲི་བ་དྲི་ལན་གནང་།
ཉིན་རྒྱབ་ཆུ་ཚོད་བཞི་པའི་ཐོག་ 《 ཕ་མའི་ཉིན་མོའི།》 མཛད་རིམ་འགོ་འཛུགས་གནང་སོང་བ་དང་། ཐོག་མར་སྐུ་མགྲོན་གཙོ་བོ་སྦེལ་ཇམ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། དམིགས་བསལ་སྐུ་མགྲོན་རྫོགས་ཆེན་ར་ཉག་དཔལ་སྤྲུལ་རིན་པོ་མཆོག མེ་ཏོག་རིན་པོ་ཆེ་མཆོག སློབ་གྲྭའི་འགན་འཛིན་འཇིགས་མེད་ལགས་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་སྣང་གསལ་མར་མེ་ཞལ་ཕྱེ་གནང་། དེ་རྗེས་བོད་རྒྱལ་ཁབ་ཆེན་པོའི་རྒྱལ་གླུ་བཏང་གྲུབ་མཚམས་རྒྱལ་གཅེས་པ་རྣམས་ལ་གུས་འདུད་མཚོན་ཕྱིར་ངག་བཅད་སྐར་མ་གཅིག་རིང་ཞུས།
དེ་རྗེས་སྦེལ་ཇམ་ཆོས་རིག་འཛིན་སྐྱོང་ཁང་གི་འགན་འཛིན་འཇིགས་མེད་ལགས་ནས་ད་བར་དབྱར་གསེང་རིག་གཞུང་ཟབ་སྦྱོང་ཐེངས་ ༡༣ ཙམ་གོ་སྒྲིག་ཞུ་དགོས་པའི་དམིགས་ཡུལ་དང་རྒྱབ་ལྗོངས་སོགས་འགྲེལ་བརྗོད་གནང་སོང་བ་དང་། ལྷག་པར་ཟབ་སྦྱོང་ཚོགས་ཡུལ་རྫོགས་ཆེན་དགེ་ལེགས་དཔལ་འབར་གླིང་གི་འགན་འཛིན་རྫོགས་ཆེན་ར་ཉག་དཔལ་སྤྲུལ་རིན་པོ་ཆེ་མཆོག་ནས་ལོ་ལྟར་སློབ་ཕྲུག་ཚོའི་བཞུགས་གནས་དང་ཞལ་ལག ཚོགས་ཁང་ལ་སོགས་ཆོས་ཚོགས་ཀྱི་མཐུན་རྐྱེན་ཇི་ཡོད་རིན་མེད་སྦྱོར་སྤྲོད་གནང་བར་ཐུགས་རྗེ་ཆེ་ཞུས་གནང་སོང་།
དམིགས་བསལ་སྐུ་མགྲོན་རྫོགས་ཆེན་ར་ཉག་དཔལ་སྤྲུལ་རིན་པོ་ཆེ་མཆོག་ནས་བོད་ཀྱི་ཆོས་དང་རིག་གཞུང་སྤྱིའི་གལ་གནད་དང་། མི་རབས་གཞོན་པ་རྣམས་ལ་བདག་སྤྲོད་ཇི་ལྟར་གནང་དགོས་མིན། གཞན་ཡང་ཁོང་ནས་ཐུགས་བསམ་རྒྱ་ཆེ་བཞེས་ཏེ་དབྱར་གསེང་ཟབ་སྦྱོང་ལ་རམ་འདེགས་མུ་མཐུད་གནང་རྒྱུའི་ཞལ་བཞེས་གནང་སོང་།
མཛད་སྒོའི་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ནས་གསུང་དོན། ང་ཚོ་བོད་མི་རིགས་ཀྱི་ཆོས་དང་རིག་གཞུང་། སྐད་ཡིག ཡ་རབས་སྤྱོད་བཟང་གི་གོམས་གཤིས་རྣམས་མི་རབས་གཞོན་པ་རྣམས་ལ་བརྒྱུད་སྤྲོད་བྱ་རྒྱུའི་ཆེད་དབྱར་གསེང་གི་ཟབ་སྦྱོང་འདི་ལྟ་བུ་བརྒྱུད་སློབ་མ་རྣམས་ལ་ངོ་སྤྲོད་ཞིབ་རྒྱས་ཐུབ་ངེས་དང་། ལྷག་པར་ཕ་མ་རྣམས་པས་སློབ་གྲྭའི་འཛིན་སྐྱོང་དང་ཆོས་ཚོགས་བཅས་པར་ཡིད་ཆེས་ཀྱིས་སོ་སོའི་ཕྲུ་གུ་རྣམས་དབྱར་གསེང་ལ་གཏོང་གནང་བར་རྗེས་སུ་ཡི་རངས་དང་། དགེ་ལས་ཕ་མ་ཚང་མར་ཐུགས་རྗེ་གནང་ཞུས་གནང་སོང་།
མཇུག་ཏུ་སྐུ་མགྲོན་གཙོ་བོས་དབྱར་གསེང་སྐབས་སློབ་མ་རྒན་པ་ཁག་གཅིག་ནས་དང་བླངས་ཐོག་ཟབ་སྦྱོང་དང་འབྲེལ་བྱེད་སྒོ་རྣམས་གྲ་སྒྲིག་གི་འགན་ལེན་གནང་བར་ཐུགས་རྗེ་ཆེ་ཞུ་མཚོན་ཕྱིར་སློབ་གྲྭའི་འཛིན་སྐྱོང་ནས་མཇལ་དར་དང་ཕྱག་རྟགས་བཅས་གནང་རྗེས་སློབ་ཕྲུག་ཆེ་འབྲིང་ཆུང་གསུམ་བཅས་ནས་གཞས་སྣ་ཁྲབ་སྟོན་དང་སྙན་ངག་གྱེར་འདོན། སྒོར་གཞས་བཅས་ཁྲབ་སྟེ་རེ་ཞིག་མཛད་སྒྲོ་གྲོལ་ཡོད་པ་བཅས།། 
