༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསར་དུ་འོས་འདེམས་བྱུང་བའི་ཡུ་རོབ་གྲོས་ཚོགས་ཀྱི་ཚོགས་གཙོ་ལྕམ་སྐུ་རོ་བྷེ་ཊོ་མེཊ་སོ་ལ་ (Roberta Metsola) མཆོག་དང་། ཡུ་རོབ་ལྷན་ཚོགས་ (European Commission) ཀྱི་ཚོགས་གཙོ་ལྕམ་སྐུ་ཨུར་སུ་ལ་ཝོན་ཊེར་ལེ་ཊོན་ (Ursula von der Leye) མཆོག་གཉིས་ལ་འཚམས་འདྲི་མཛད་འདུག

དེ་ཡང་འཚམས་འཕྲིན་ནང་མགོན་པོ་མཆོག་གིས་ཡུ་རོབ་མཐུན་ཚོགས་ཀྱིས་འདས་པའི་ལོ་དྲུག་ཅུ་ལྷག་རིང་ཚོགས་མི་རྒྱལ་ཁབ་ནང་ཁུལ་དང་ས་ཁུལ་དེ་དག་ནང་ཞི་བདེ་རྒྱུན་སྐྱོང་བྱས་པའི་མཚོན་ཡུ་རོབ་མཐུན་ཚོགས་ཀྱི་ལམ་སྲོལ་ལ་བསྔགས་བརྗོད་གནང་བ་མ་ཟད། འཛམ་གླིང་དམག་ཆེན་གཉིས་པའི་རྗེས་སུ་ཕན་ཚུན་འཆམ་མཐུན་དང་ཞི་བདེ་མཉམ་གནས་ཡོང་བའི་དགོངས་གཞིའི་འོག ཡུ་རོབ་མཐུན་ཚོགས་ཀྱིས་རྒྱལ་ཁབ་སོ་སོའི་ས་གནས་ཀྱི་ཁེ་ཕན་ལས་སྤྱི་ཚོགས་ཀྱི་ཁེ་ཕན་གལ་ཆེ་བར་བརྩིས་ཡོད་པ་དང་། དེས་ཕན་ཚུན་གཅིག་ལ་གཅིག་རྟེན་དང་དཀའ་ངལ་ཆེ་བའི་འཛམ་བུ་གླིང་ནང་ཤེས་རབ་ལྡན་ཞིང་། བསམ་བློ་སྨིན་པའི་རྟགས་མཚན་བསྟན་ཡོད་པ་གསུངས་ཡོད།

མཐར་མགོན་པོ་མཆོག་ནས་ཁོང་རྣམ་པ་གཉིས་ལ་ཡུ་རོབ་མཐུན་ཚོགས་དེ་བཞིན་གཞན་གྱི་མིག་དཔེར་མུ་མཐུད་གནས་ཆེད་ཡོང་འགྱུར་གྱི་བྱ་བ་མཐའ་དག་ལམ་འགྲོ་ཡོང་བའི་ཐུགས་སྨོན་མཛད་ཡོད་པ་བཅས།།