༄༅། །ཨོ་གླིང་བོད་རིགས་སྤྱི་ཚོགས་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༩ ཕེབས་པའི་༸སྐུའི་འཁྲུངས་སྐར་གཟབ་རྒྱས་ངང་སྲུང་བརྩི་ཞུས་ཡོད་པ་རེད།
དེ་ཡང་བོད་དོན་རྒྱབ་སྐྱོར་བ་ཨོ་གླིང་གྲོས་ཚོགས་འཐུས་མི་ལྕམ་སུ་སན་ཊེམ་པལ་མན་ལགས་དང་། གྲོས་ཚོགས་འཐུས་མི་སྐུ་ཞབས་མའི་ཀལ་མེག་ཀོར་མེག་ལགས། གྲོས་ཚོགས་འཐུས་མི་སྐུ་ཞབས་ཌེ་བིཌ་སི་མིཊ་ལགས། གྲོས་ཚོགས་འཐུས་མི་ལྕམ་སོ་ཕི་སི་ཀེམ་སིཌ་ལགས། གྲོས་ཚོགས་འཐུས་མི་ལྕམ་ཕི་ཡོ་ན་ཕི་ལིབ་སི་ལགས། གྲོས་ཚོགས་གོང་མའི་འཐུས་མི་ཟུར་པ་ལྕམ་ཇེ་ནིཊ་རའི་སི་ལགས་བཅས་སོ་སོའི་མངའ་ཁུལ་གྱི་བོད་རིགས་ལྷན་ཚོགས་དང་ལྷན་དུ་འཁྲུངས་སྐར་སྲུང་བརྩིའི་མཛད་སྒོར་བཅར་གནང་ཡོད།
ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་ཝིག་ཊོ་རི་ཡ་དང་ཁེན་བྷེ་ར་བོད་རིགས་ཚོགས་པས་གོ་སྒྲིག་ཞུས་པའི་༸སྐུའི་འཁྲུངས་སྐར་གྱི་མཛད་སྒོར་གཞུང་འབྲེལ་ཕེབས་གནང་སྟེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་སྲུང་བརྩི་ཞུ་སྟངས་ཡག་ཤོས་དེ་ཁོང་གི་བཀའ་དགོངས་སྒྲུབ་རྒྱུ་དང་། རང་གི་རྒྱུད་ལ་སེམས་པ་བཟང་པོ་གོང་མཐོར་གཏོང་རྒྱུ་དེ་ཡིན་ཞེས་ནན་བརྗོད་གནང་། དེ་བཞིན་བཀའ་ཤག་སྐབས་ ༡༦ པའི་ངོས་ནས་ཕྱི་ལོ་ ༢༠༢༥ ཟླ་ ༠༧ ནས་འགོ་འཛུགས་ཀྱིས་ལོ་གཅིག་རིང་སྙིང་རྗེའི་ལོ་ཞེས་སྲུང་བརྩི་ཞུ་རྒྱུའི་འཆར་གཞི་སྐོར་སོགས་གསུངས།
༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་ཉིན་ཨོ་གླིང་གྲོས་ཚོགས་འཐུས་མི་ལྷན་ཚོགས་ཀྱིས་གཞུང་འབྲེལ་གསལ་བསྒྲགས་ཤིག་སྤེལ་ཏེ། གང་ཉུད་མཆོག་གི་སྐུ་ཁམས་གསལ་ཐང་དང་། སྐུ་ཚེ་ཡུན་རིང་བརྟན་པའི་སྨོན་འདུན་ཞུས་པ་དང་ཆབས་ཅིག ཉེ་ཆར་ཨ་རིའི་གྲོས་ཚོགས་ཀྱིས་བོད་རྒྱའིོ་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་བྱས་པ་དེར་དགའ་བསུ་ཞུས་ཡོད། ཁྲིམས་ཡིག་དེས་བོད་མིའི་རང་ཐག་རང་གཅོད་ཀྱི་ཐོབ་ཐང་ངོས་འཛིན་བྱེད་པ་དང་། རྒྱ་ནག་གཞུང་གིས་༸གོང་ས་མཆོག་གམ་ཁོང་གི་སྐུ་ཚབ་དང་ལྷན་དུ་སྔོན་འགྲོའི་ཆ་རྐྱེན་གང་ཡང་མེད་པར་བོད་རྒྱའི་དཀའ་རྙོག་དེ་ཞི་བའི་ལམ་ནས་སེལ་ཐབས་ཀྱི་གྲོས་མོལ་བྱེད་དགོས་ཅེས་གསུངས་ཡོད་པ་བཅས།།
