༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༨ ནས་ ༢༠ བར་ཌལ་ཧོར་ཕུན་ཚོགས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ཕུར་བུ་ཚེ་རིང་ལགས་དང་། ཚབ་གསར་ས་གནས་འགོ་འཛིན་སྐལ་བཟང་བསྟན་འཛིན་ལགས་རྣམ་གཉིས་བར་རྩིས་སྤྲོད་རྩིས་ལེན་གནང་ཡོད།

དེ་ཡང་རྩིས་སྤྲོད་རྩིས་ལེན་གྱི་ལས་དོན་ལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་ཏུ་སྦིར་བོད་ཚོགས་ས་གནས་འགོ་འཛིན་ཀརྨ་རྣམ་རྒྱལ་ལགས་ཀྱིས་སྤྲོད་དཔང་གནང་ཐོག་ཕྱི་ཚེས་ ༡༨ ཉིན་གྱི་སྔ་དྲོ་ས་གནས་འགོ་འཛིན་ལས་ཁང་དང་། བཟོ་གྲྭ ལས་ཤག་བཅས་ཀྱི་ཡིག་ཕེལ་དང་ཅ་དངོས་རྣམས་རྩིས་སྤྲོད་ཞུས་གྲུབ་མཚམས་ཉིན་རྒྱབ་ལས་འཆར་འགྲོ་བཞིན་པ་རྣམས་ལ་རྟོག་ཞིབ་གནང་ཡོད།

ཕྱི་ཚེས་ ༡༩ ཉིན་ཅམ་པ་རྫོང་དཔོན་མུ་ཀེཤ་ (Mukesh Repaswal ) ལགས་དང་། ཌལ་ཧོར་གྱི་རྫོང་དཔོན་གཞོན་པ་ཨ་ནིལ་ཀུ་མར་བྷར་ཌི་ཝཇ་ (Anil Kumar Bhardwaj) ལགས། ཧིན་བོད་མཛའ་འབྲེལ་ཚོགས་པའི་ཚོགས་གཙོ་ངྷི་ལོན་ (Dr. G.S. Dhillon) ལགས། FRO ལས་བྱེད་མཉམ་ཐུགས་འཕྲད་གནང་ཡོད།

ཕྱི་ཚེས་ ༢༠ ཉིན་ས་གནས་འཐུས་ཚོགས་ཀྱི་སྐུ་ཚབ་དང་། ས་གནས་རང་བདེན་ཚོགས་ཆུང་གི་སྐུ་ཚབ། བཟོ་གྲྭའི་ཚོགས་གཙོ། གཞན་ཡང་ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་ཚོགས་གཙོ། དེ་བཞིན་སྤྱི་མི་བཅས་ཚང་འཛོམས་ཐོག་ས་གནས་འགོ་འཛིན་དང་བཟོ་འགོ་གཅིག་ལྕོགས་ཟུར་པ་དང་ས་གནས་འགོ་འཛིན་དང་བཟོ་འགོ་གཅིག་ལྕོགས་གསར་པ་རྣམ་གཉིས་ལ་རྟེན་འབྲེལ་མཇལ་དར་སྒྲོན་རྗེས་གསོལ་ཇ་འབྲས་སིལ་འདེགས་འབུལ་ཞུས་རྗེས་ཉིན་རྒྱབ་ཚོུད་ ༢།༣༠ ཐོག་མི་མང་ཚོགས་ཆེན་ཚོགས་ཏེ་ས་གནས་འགོ་འཛིན་དང་བཟོ་འགོ་གཅིག་ལྕོགས་ཕུར་བུ་ཚེ་རིང་ལགས་ཀྱིས་ལས་དོན་མཇུག་སྐྱོང་དང་འབྲེལ་གསུང་བཤད་གནང་བ་དང་། ནང་སྲིད་སྐུ་ཚབ་སྦིར་བོད་ཚོགས་ས་གནས་འགོ་འཛིན་ཀརྨ་རྣམ་རྒྱལ་ལགས་ནས་སྤྲོད་དཔང་གི་གཟིགས་ཚུལ་གསུང་བཤད་གནང་། དེ་ནས་ས་གནས་འགོ་འཛིན་དང་བཟོ་འགོ་གསར་པ་སྐལ་བཟང་བསྟན་འཛིན་ལགས་ཀྱི་རང་ཉིད་ངོ་སྤྲོད་དང་འབྲེལ་འཚམས་འདྲིའི་གསུང་བཤད་གནང་ཡོད་པ་བཅས།།