༄༅། །འདི་གར་སུད་སི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༧ ཚེས་ ༢༨ རེས་གཟའ་ཉི་མ་ཉིན་རི་ཀོན་ཆོས་འཁོར་དགོན་དུ་སུད་སི་ས་གནས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་དབུ་བརྙེས་པའི་མཛད་སྒོ་སྲུང་བརྩི་སྐབས་སྐུ་མགྲོན་གཙོ་བོ་རི་ཀོན་ཆོས་འཁོར་དགོན་གྱི་མཁན་པོ་མཆོག་དང་། དམིགས་བསལ་སྐུ་མགྲོན་སུད་སི་སྐུ་ཚབ་དོན་གཅོད་ལས་ཚབ་ལས་བྱེད་ཕུན་ཚོགས་སྟོབས་རྒྱལ་ལགས། གཞན་ཡང་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་ལས་ཚབ་ཀརྨ་ཆོས་སྐྱིད་ལགས། སུད་བོད་མཐུན་ཚོགས་ཀྱི་ཚོགས་གཙོ་བྱམས་པ་ལགས། དོན་ཟུར་དང་སྤྱི་ཟུར། གཞུང་ཁོངས་མིན་པའི་ཚོགས་པ་ཁག་གི་འཐུས་མི། སེར་སྐྱ་མི་མང་ ༥༠ ལྷག་ལྷན་འཛོམས་གནང་ཡོད།
ཐོག་མར་རི་ཀོན་ཆོས་འཁོར་དགོན་པའི་མཁན་རིན་པོ་ཆེ་དབུ་བཞུགས་ཐོག་དགེ་འདུན་པ་རྣམས་ནས་༸རྒྱལ་བའི་གསོལ་འདེབས་དང་། ཞབས་བརྟན། བདེན་ཚིག་སྨོན་ལམ་སོགས་གསུང་འདོན་དང་མཉམ་༸རྒྱལ་བའི་སྐུ་པར་མཐོང་སྒྲོལ་རིན་པོ་ཆེ་མཆོག་ལ་མཇལ་དར་འདེགས་འབུལ་གནང་རྗེས་གསོལ་ཇ་དང་འབྲས་སིལ་འདེགས་ཕུལ་གནང་ཡོད། མཛད་རིམ་དངོས་སུ་འགོ་ཚུགས་སྐབས་ས་གནས་དབུ་མའི་ལམ་ཚོགས་གཙོ་ནས་འཚམས་འདྲིའི་གཏམ་བཤད་གནང་པ་མ་ཟད། དབུ་མའི་ལམ་གྱི་བྱུང་རིམ་ངོ་སྤྲོད་དང་། གྲུབ་འབྲས་སྐོར་གཏམ་བཤད་གནང་ཡོད།
སྐུ་མགྲོན་རྣམས་ནས་རིམ་པས་གཏམ་བཤད་གནང་པ་མ་ཟད་སྐུ་ཚབ་དོན་གཅོད་ལས་ཚབ་ལས་བྱེད་ཕུན་ཚོགས་སྟོབས་རྒྱལ་ལགས་ཀྱིས་དབུ་མའི་ལམ་སྐོར་ལ་ངོ་སྤྲོད་མདོར་བསྡུས་དང་། ལས་འགུལ་ཁང་དེའི་བརྒྱུད་སྒྲིག་འཛུགས་དང་ཚོགས་པ་ཁག་ནས་སྐད་འབོད་སྐབས་འབོད་སྒྲ་གཏན་འབེབས་དང་། རྒྱལ་སྤྱིའི་སྡིངས་ཆ་སྟེང་བོད་དོན་དཀའ་རྙོག་སེལ་ཐབས་ཀྱིས་ཞུ་གཏུག་པ་དང་གཏམ་བཤད་གནང་མཁན་རྣམས་ལ་དབུ་མའི་ལམ་གྱི་དམིགས་ཡུལ་དང་མཐུན་པའི་གཏམ་བཤད་གནང་གི་ཡོད་མེད་དོ་སྣང་དང་ཞིབ་འཇུག་གནང་སྟེ། གལ་ཏེ་མ་གནང་ཚེ་དེ་ལ་སྨན་པའི་སྐྱོན་འཛུགས་ཀྱི་སྒོ་ནས་མིན་པ་བཟང་སྤྱོད་ཐོག་ལམ་སྟོན་དང་། གཟབ་འཁྲིད། ངོ་ཐུག་རེ་སྐུལ་ཞུས་ཏེ་ཁ་ཕྱོགས་སུ་འཁྲིད་ཐུབ་ན་ཏན་ཏན་ཕན་ཐོགས་ཡོད་པ་མངོན། དེ་མིན་ལྟ་གྲུབ་ཁ་ལ་འཁྱེར་ནས་ལྟ་གྲུབ་མ་མཐུན་པ་རྣམས་ལ་འགྲེལ་བཤད་གཞན་ཞིག་བརྒྱབ་ནས་བཞུགས་པ་ཡིན་ན་དགྲ་རྒྱལ་རང་ཕམ་དང་། དེ་ནི་དབུ་མའི་ལམ་ལས་འགུལ་ཁང་ཚུགས་དགོས་པའི་དམིགས་ཡུལ་ཞིག་མིན་པ་སོགས་ཀྱི་གཏམ་བཤད་གནང་། མཐར་ས་གནས་དབུ་མའི་ལམ་གྱི་དྲུང་ཆེས་ཐུགས་རྗེ་ཆེ་ཞུས་ཏེ་མཛད་སྒོ་མཇུག་སྒྲིག་གནང་ཡོད། །
