༄༅། །འདི་གར་སུད་སི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཨ་རིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཞུང་ཚབ་པ་ལྕམ་མི་ཤེལ་ཊའི་ལོར་ (Michele Taylor) མཆོག་དང་མཇལ་འཕྲད་གནང་སྟེ་ཨ་རི་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་ཐུགས་རྗེ་ཆེ་ཞུས་པ་མ་ཟད། གཞུང་ཚབ་པར་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ངོ་སྤྲོད་གནང་ཡོད།
དེ་ཡང་ཕྱི་ལོ་ ༢༠༢༤ ཟླ་བ་ ༧ ཚེས་ ༢༤ ཉིན་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སུད་སི་སྐུ་ཚབ་དོན་ཁང་གི་ལས་བྱེད་དང་ལྷན་ཨ་རིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཞུང་ཚབ་པ་ལྕམ་མི་ཤེལ་ཊའི་ལོར་མཆོག་དང་མཇལ་འཕྲད་གནང་ཡོད། སྐབས་དེར་ཨ་རི་གཞུང་དང་། གྲོས་ཚོགས། མི་མང་བཅས་ནས་བོད་རྒྱའི་རྩོད་རྙོག་སེལ་བ་སྔར་མེད་ཀྱི་རྒྱབ་སྐྱོབ་གནང་བ་དང་། དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་གིས་བོད་སྐོར་གནས་ཚུལ་རྫུན་མ་སྤེལ་བར་ཕྱོགས་ཡོངས་ནས་གདོང་ལེན་བྱ་བར་རྒྱབ་སྐྱོབ་གནང་བར་ཐུགས་རྗེ་ཆེ་ཞུས།
སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སུད་སི་དང་། ལིག་ཏེན་སིཊ་ཡན། འཇར་མ་ནི། ཨོསྟྲེ་ལི་ཡ། ཨི་ཊ་ལི། ཅེག་སྤྱི་མཐུན་རྒྱལ་ཁབ། ཧངྒ་རི་རྒྱལ་ཁབ་སོགས་སུ་གནས་སྡོད་བོད་མིའི་ཚབ་བྱས་ནས་ཨ་རིར་ཐུགས་རྗེ་ཆེ་ཞུས་པ་མ་ཟད། སྐུ་ཚབ་དོན་གཅོད་ཀྱིས་གསུངས་དོན། དབུས་ཤར་ཡུ་རོབ་ནང་གནས་སྡོད་བོད་པ་ཚོས་ཨ་རི་དུས་ཡུན་རིང་པོའི་ནང་བོད་དོན་ལ་རྒྱབ་སྐྱོབ་གནང་བར་བཀའ་དྲིན་རྗེས་དྲན་གྱི་ལས་འགུལ་སྤེལ་བཞིན་ཡོད། བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་ནི་བོད་རང་དབང་ལས་འགུལ་ལོ་རྒྱུས་ནང་གི་དབྱེ་མཚམས་ཤིག་ཡིན། ཁྲིམས་ཡིག་དེས་བོད་པས་མུ་མཐུད་བདེན་པའི་འཐབ་རྩོད་དང་། ནམ་ཡང་འཐབ་རྩོད་མཚམས་འཇོགས་མི་བྱ་བར་གསོན་ཤུགས་སྦྱིན་ཡོད་ཅེས་གསུངས།
ཨ་རིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཞུང་ཚབ་ལྕམ་མི་ཤེལ་ཊའི་ལོར་མཆོག་གིས་བཞུགས་ཤག་ཏུ་སྐུ་ཚབ་དོན་གཅོད་གཙོ་བོར་གྱུར་པའི་ལས་བྱེད་རྣམ་པར་ཕེབས་བསུ་གནང་སོང་བ་མ་ཟད། སྲིད་འཛིན་མཆོག་ལ་བོད་མི་རྣམས་ནས་ཐུགས་རྗེ་ལེགས་འབུལ་ཞུས་པ་བརྡ་ལན་གནང་རྒྱུ་ཡིན་སྐོར་གསུངས། དེ་མ་ཟད་ཁོང་གི་གསུངས་དོན་ལ། ཁྲིམས་ཡིག་འདི་ནི་བོད་མི་མང་གི་ཐོབ་ཐང་རྩོད་ལེན་བྱེད་པར་མ་ལག་ལྡན་པའི་སྒྲོམ་གཞི་ཞིག་སྐྲུན་པ་ཞིག་རེད་ཅེས་གསུངས། གཞན་ཡང་གཞུང་ཚབ་ཆེན་མོས་༸གོང་ས་མཆོག་གི་འཕྲོད་བཞེས་སྐོར་ལ་བཀའ་དྲིས་གནང་སོང་བ་མ་ཟད། ༸གོང་ས་མཆོག་མྱུར་དུ་དྭངས་སྐྱེད་ཡོང་བར་སྨོན་ལམ་ཡོད་ཅེས་གསུངས། སྐུ་ཚབ་དོན་གཅོད་ཀྱིས་གཞུང་ཚབ་མཆོག་ལ་བོད་ནང་གི་ད་ལྟ་གནས་ཚུལ་ངོ་སྤྲོད་གནང་བ་མ་ཟད། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་མ་འོངས་པའི་ལས་དོན་སྐོར་ལ་གྲོས་མོལ་གནང་ཡོད།
སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་ལྷན་དོན་གཅོད་ཁང་གི་མཉམ་འབྲེལ་རྒྱལ་ཚོགས་ཞུ་གཏུག་ལས་དོན་ལས་བྱེད་ཕུན་ཚོགས་སྟོབས་རྒྱལ་ལགས་དང་། རྩིས་པ་བསྟན་འཛིན་ཆོས་བཟང་ལགས། ཡུ་རོབ་རྒྱ་རིགས་འབྲེལ་མཐུད་པ་སངས་རྒྱས་སྐྱབས་ལགས་བཅས་ཡོད། །
