༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༦ ཉིན་སིམ་ལར་གནས་སྡོད་བོད་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་ལོ་ ༨༩ ཕེབས་པའི་འཁྲུངས་སྐར་གྱི་མཛད་སྒོ་སྲུང་བརྩི་ཞུས་ཡོད།

དེ་ཡང་མཛད་སྒོའི་སྐུ་མགྲོན་གཙོ་བོར་ཧི་མཱ་ཅལ་མངའ་སྡེའི་སྤྱི་ཁྱབ་དྲུང་འཕར་ཨོན་ཀར་ཅནྡ་ཤར་མ་ (Onkar Chand Sharma) ལགས་དང་། དམིགས་བསལ་སྐུ་མགྲོན་དུ་སིམ་ལའི་རྫོང་དཔོན་ཨ་ནོ་པམ་ཀེ་ཤབ་ (Anupam Kashyap) ལགས། དེ་བཞིན་སིམ་ལའི་རྫོང་དཔོན་གཞོན་པ་ལྕམ་ཇྱོ་ཏི་རཱ་ནཱ་ (Jyoti Rana) ལགས་དང་།  ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཝི་ཨེས་ནེ་གི་ལགས། ས་གནས་བོད་མི་སོགས་མཛད་སྒོར་ཚོགས་བཅར་ཡོད།དེ་ཉིན་སྔ་དྲོ་ཆུ་ཚོད་ ༨ པའི་ཐོག་མཛད་སྒོ་དབུ་འཛུགས་གནང་ཞིང་། ཐོག་མར་སྨོན་ལམ་གསུང་འདོན་གནང་རྗེས་སིམ་སྤྱི་ཚེ་དབང་ཕུན་ཚོགས་ལགས་ཀྱིས་ཕེབས་བསུའི་གསུང་བཤད་གནང་རྗེས་དཔལ་ལྡན་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་གྲུབ་མཚམས་སྤྲི་གོར་འདེགས་འབུལ་ཞུས་གྲུབ་མཚམས་སྐུ་མགྲོན་རྣམ་པས་གསུང་བཤད་དང་རིག་གཞུང་འཁྲབ་སྟོན་གཟིགས་འབུལ་ཞུས། 

སྐབས་དེར་སྐུ་མགྲོན་གཙོ་བོ་ཨོན་ཀར་ཅནྡ་ཤར་མ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་འབྲེལ། ཉེ་ཆར་མགོན་པོ་གང་ཉིད་མཆོག་གི་ཞབས་པུས་སྨན་བཅོས་གནང་ཡོད་པས་མྱུར་དུ་དྲག་སྐྱེད་ཡོང་བའི་སྨོན་འདུན་ཞུས་ཡོད། དེ་མཚུངས་རྒྱ་གར་དང་བོད་གཉིས་ཀྱི་ལོ་རྒྱུས་དང་ཆོས་ཕྱོགས་ཀྱི་འབྲེལ་བའི་སྐོར་ནན་བརྗོད་གནང་ཡོད། མཐར་སིམ་ལ་སམ་བྷོ་ཊ་སློབ་གྲྭའི་སློབ་སྤྱི་པདྨ་རྒྱལ་མཚན་ལགས་ཀྱིས་ཐུགས་རྗེ་ལེགས་འབུལ་གྱི་གསུང་བཤད་གནང་སྟེ་མཛད་སྒོ་ལེགས་པར་མཇུག་སྒྲིལ་བ་བཅས།།