༄༅། །འདི་གར་ཨོསྟྲེ་ལི་ཡ་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༧ ཚེས་ ༣༡ ཉིན་༸རྒྱལ་བའི་བླ་གཟའ་ལྷག་དཀར་གྱི་ཉིན་མོ་དང་བསྟུན་སིཌ་ཎི་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས་གཙོས་པའི་རྒྱུན་ལས་རྣམས་ཨོ་གླིང་སྐུ་ཚབ་དོན་གཅོད་ལས་ཁུངས་སུ་ཆེད་བཅར་གྱིས་སྐུ་ཚབ་དོན་གཅོད་ཀརྨ་སེང་གེ་ལགས་ངོས་མཇལ་གྱིས་བོད་མིའི་སྒྲིག་འཛུགས་ཀྱི་སྔོན་རྩིས་མ་དངུལ་ལ་ཕན་པར་ཨོ་སྒོར་ ༩༤༢༠ ཞལ་འདེབས་ཕུལ་གནང་ཡོད།
དེ་ཡང་སིཌ་ཎི་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས་ཀྱིས་སྤྱིར་སྤྱི་ནོར་༸གོང་ས་༸སྐྱབས་མགོན་ཆེན་མཆོག་གི་བླ་ན་མེད་པའི་བཀའ་དྲིན་དང་། བོད་མིའི་སྒྲིག་འཛུགས་ཀྱི་བཀའ་དྲིན་ནི་སུས་ཀྱང་གཞལ་ཐབས་བྲལ་ཡང་དྲིན་བྱས་དྲིན་དུ་ཚོར་བ་བྱ་རྒྱུ་དེ་རང་རེས་མེས་པོ་རྣམས་ཀྱི་རླབས་ཆེན་གྱི་སྲོལ་བཟང་ཞིག་ཡིན་པ་མ་ཟད། ཨོ་གླིང་ཁུལ་གནས་སྡོད་བོད་མི་ཕལ་མོ་ཆེ་བོད་མིའི་སྒྲིག་འཛུགས་ཀྱིས་དམིགས་བསལ་མཐུན་སྦྱོར་བཀའ་དྲིན་འོག་འབྱོར་བ་ཤ་སྟག་ཆགས་ཡོད་སྟབས། རླབས་ཆེན་གྱི་བཀའ་དྲིན་དེ་དག་གི་ཆ་ཕྲ་མོ་ཙམ་ཞིག་གསབ་ཐུབ་སླད་སིཌ་ཎི་བོད་རིགས་མཐུན་ཚོགས་སྐབས་བཅོ་བརྒྱད་པའི་རྒྱུན་ལས་ནས་སྤྱི་མོས་ཀྱི་གྲོས་ཆོད་བཞག་སྟེ་ལོ་ལྟར་བོད་མིའི་སྒྲིག་འཛུགས་ཀྱི་སྔོན་རྩིས་མ་དངུལ་ལ་ཕན་པར་དཔལ་འབྱོར་འདུ་འགོད་ཀྱིས་ལས་གཞི་ཞིག་སྤེལ་འཆར་ཡིན་པ་བཅས་སྐུ་ཚབ་དོན་གཅོད་ལ་སྙན་སེང་ཞུས་པར་དོན་གཅོད་ནས་སིཌ་ཎི་བོད་རིགས་མཐུན་ཚོགས་ནས་མ་སྐུལ་དང་བླངས་ཐོག་དམིགས་དཔེ་འོས་པའི་ལས་འགུལ་འདི་འདྲ་ཞིག་སྤེལ་གནང་བར་འབྲེལ་ཡོད་ཚང་མར་བསྔགས་བརྗོད་དང་ཐུགས་རྗེ་ཆེ་ཞུས་གནང་ཡོད། །
