༄༅། །བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གི་གཟའ་འཁོར་གཅིག་རིང་གི་ཉི་འོང་གཞུང་འབྲེལ་ཕྱོགས་ཕེབས་ལེགས་པར་མཇུག་སྒྲིལ་ཡོད་པ་རེད།

དེ་ཡང་ཤེས་རིག་བཀའ་བློན་མཆོག་ཀྲོག་ཡོར་ཕེབས་རྗེས་ཉིན་དང་པོར་མགྲོན་ཁང་ཨོ་ཀུ་ར་རུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༩ ལ་ཕེབས་པའི་༸སྐུའི་འཁྲུངས་སྐར་སྲུང་བརྩིའི་མཛད་སྒོའི་སྐུ་མགྲོན་གཙོ་བོར་ཕེབས་ཞུགས་གནང་ཞིང་། དེར་ཁོང་མོས་ཉི་འོང་གཞུང་དམངས་གཉིས་ནས་བོད་ཀྱི་རང་དབང་འཐབ་རྩོད་ལ་ལྷག་བསམ་རྣམ་དག་གིས་རྒྱབ་སྐྱོར་གནང་བ་དང་། ༸གོང་ས་མཆོག་གི་འཛམ་གླིང་ཞི་བདེ་དང་འཆམ་མཐུན་གྱི་དགོངས་འཆར་ལ་ཡིད་ཆེས་བརྟན་པོ་གནང་བར་ཐུགས་རྗེ་ཆེ་ཞུས། སྐབས་དེར་ཁོང་མོས་གྲོས་ཚོགས་འཐུས་མི་དང་། མཁན་པོ་དང་གྲྭ་པ། ཤེས་ཡོན་པ། བོད་དོན་རྒྱབ་སྐྱོར་བ་སོགས་མཛད་སྒོར་ལྷན་ཞུགས་གནང་མཁན་ཚོགས་བཅར་བ་ཉིས་བརྒྱ་སྐོར་ལྷན་མཇལ་མོལ་གནང་ཡོད།ཉིན་རྗེས་མ་དེར་བཀའ་བློན་མཆོག་གིས་ཉི་འོང་དོན་ཁང་དུ་ཉི་འོང་བོད་དོན་རྒྱབ་སྐྱོར་བ་ལྷན་མཇལ་འཕྲད་གནང་སྟེ། ཁོང་རྣམས་ནས་བོད་ཀྱི་རང་དབང་འཐབ་རྩོད་ལ་རྒྱབ་སྐྱོར་ཕན་གྲོགས་གནང་བར་ཐུགས་རྗེ་ཆེ་ཞུས་ཤིང་། ཚོགས་ཞུགས་བོད་དོན་རྒྱབ་སྐྱོར་བ་རྣམས་ནས་རང་ཉིད་ཀྱི་ངོ་སྤྲོད་དང་སྦྲགས། བོད་དོན་རྒྱབ་སྐྱོར་ལས་དོན་བྱེད་ཕྱོགས་ངོ་སྤྲོད་གནང་། ཚོགས་འདུའི་ཐོག་བོད་དོན་རྒྱབ་སྐྱོར་ཚོགས་པ་བརྒྱད་ཀྱི་སྐུ་ཚབ་བཅོ་ལྔ་ཕེབས་ཡོད་པ་དང་། ཁོང་རྣམས་ལ་བཀའ་བློན་མཆོག་གིས་དཀར་གཙང་མཇལ་དར་ཕུལ་ཡོད།

ཕྱི་དྲོ་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཀྲོག་ཡོ་མཐོ་སློབ་ཏུ་བོད་དང་། ཡུ་གུར། ལྷོ་སོག་བཅས་ཀྱི་གྲངས་ཉུང་མི་རིགས་ཀྱི་ངོ་བོ་རྩ་མེད་བཟོ་ཐབས་སུ་རྒྱ་ནག་གི་མི་སེར་སྤེལ་ཡུལ་གཏན་སློབ་ཟེར་བའི་འཆར་གཞི་ངན་པའི་སྐོར་གྱི་བགྲོ་གླེང་ལ་ལྷན་ཞུགས་གནང་། སྐབས་དེར་ཁོང་མོས་རྒྱ་ནག་གཞུང་གི་འགོ་ཁྲིད་ཚོས་མི་སེར་སྤེལ་ཡུལ་གྱི་གཏན་སློབ་འཛུགས་སྐྲུན་གྱིས་བོད་པའི་སྐད་ཡིག་དང་། ངོ་བོ་རིག་གཞུང་། ཆོས་ལུགས་བཅས་ཕྲུ་གུ་ཚོའི་ལག་ནས་འཕྲོག་ཐབས་བྱེད་བཞིན་ཡོད་སྐོར་གསུངས། གསུང་བཤད་གནང་མཁན་དང་བགྲོ་གླེང་ཚོགས་འདུར་ཞུགས་མཁན་གྱི་ཁྲོད་དུ་ཉི་འོང་གི་ཁྲིམས་བཟོ་བ་ཨི་ཤེ་མི་ཙུ་ཁོ་ (Ishii Mitsuko) ལགས་དང་། ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས། བོད་སྐྱོབ་འབྲེལ་མཐུད་ལས་ཁང་གི་མ་ཁི་ནི་སེ་སུ་ཨེ་ (Makino Seishu) ལགས། ཉི་འོང་ཡུ་གུར་མཐུན་ཚོགས་ཀྱི་རས་ཐབ་ཨ་ཕུ་མེད་ (Retep Afumet) ལགས། ལྷོ་སོག་ལྷན་ཚོགས་ཀྱི་ཨོལ་ཧུ་ནོ་ཌེ་ཆིན་ (Olhunud Daichin) ལགས། ཉི་འོང་དགེ་འདུན་ལྷན་ཚོགས་ཀྱི་དགེ་འདུན་པ་ཀོ་བྷ་ཡ་ཤེ་ཨེ་ (Kobayashi Shuei) ལགས་སོགས་ཕེབས་ཞུགས་གནང་ཡོད།ཉིན་གསུམ་པར་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་ཉི་འོང་གྲོས་ཚོགས་སུ་ཕེབས་སྐབས་ཉི་འོང་གྲོས་ཚོགས་འཐུས་མིའི་བོད་རྒྱབ་སྐྱོར་ཚོགས་པའི་ཚོགས་གཙོ་ཤི་མོ་མུ་ར་ཧ་ཀུ་བུན་ལགས་ཀྱིས་དགའ་བསུ་ཞུས། སྐབས་དེར་བཀའ་བློན་མཆོག་གིས་བོད་ལ་དཀའ་ངལ་འཕྲད་པའི་དུས་འདིར་བོད་དོན་ལ་རྒྱབ་སྐྱོར་གནང་བ་མ་ཟད། ཁོང་མོ་གྲོས་ཚོགས་སུ་གདན་ཞུ་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་གྲོས་ཚོགས་འཐུས་མི་ཚོར་༸གོང་ས་མཆོག་གིས་བོད་ལ་རྒྱབ་སྐྱོར་བྱེད་པ་ནི་དྲང་བདེན་ལ་རྒྱབ་སྐྱོར་བྱེད་པ་དང་མཚུངས་ཞེས་གསུངས་མྱོང་བ་དང་། དེ་ནི་བོད་ལ་རྒྱབ་སྐྱོར་བྱེད་པ་མིན་པར་དྲང་བདེན་ལ་རྒྱབ་སྐྱོར་བྱེད་པ་རེད་ཅེས་གསུངས། ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཤི་མོ་མུ་ར་ཧུ་བུན་ལགས་ཀྱིས་བཀའ་བློན་མཆོག་གྲོས་ཚོགས་ཁང་དུ་ཕེབས་ནས་ཁྲིམས་བཟོ་བ་ཚོ་དང་ལྷན་དུ་དགོངས་ཚུལ་བརྗེ་ལེན་གནང་བ་དང་ཆབས་ཅིག བོད་ནང་གི་བོད་མིའི་རང་དབང་ཆེད་དུ་འཚེ་མེད་ཞི་བའི་སྒོ་ནས་དྲང་བདེན་འཐབ་རྩོད་བྱེད་བཞིན་པ་དེར་ཉི་འོང་གི་གྲོས་ཚོགས་འཐུས་མི་ཚོས་རྒྱབ་སྐྱོར་གཡོ་མེད་གནང་རྒྱུ་ཡིན་པ་གསུངས། གཞན་ཡང་བཀའ་བློན་མཆོག་གིས་རེས་ཏ་ཀུ་གཙུག་ལག་སློབ་གཉེར་ཁང་དང་། ཆི་བ་བཟོ་རིག་སློབ་གཉེར་ཁང་དུ་སོ་སོར་གསུང་བཤད་གནང་སྐབས་བོད་མིའི་ཤེས་ཡོན་སྲིད་བྱུས་དང་། ཆོས་ལུགས་ལ་མ་བརྟེན་པའི་བཟང་སྤྱོད་བསླབ་གཞིའི་སྐོར་ངོ་སྤྲོད་གནང་ཡོད་ཅིང་། སྐབས་དེར་དགེ་རྒན་དང་སློབ་ཕྲུག་ཚོས་བཀའ་བློན་མཆོག་གི་གསུང་བཤད་ལ་དོ་སྣང་ཆེན་པོ་གནང་ཡོད་པ་མ་ཟད། ཤེས་རིག་བཀའ་བློན་མཆོག་ནས་ཁོང་རྣམས་ལ་ཨེ་མོ་རི་མཐོ་སློབ་ནས་པར་སྐྲུན་བྱས་པའི་སཱི་ཤེས་ཡོན་སློབ་གསོའི་རྒྱུ་ཆ་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ནས་གཏན་འབེབས་ཞུས་པའི་ཤེས་ཡོན་སྲིད་བྱུས་ཀྱི་ཡིག་ཆ་མཁོ་སྤྲོད་གནང་ཡོད།

བཀའ་བློན་མཆོག་གིས་ཉིན་མཐའ་མར་བོད་མིར་ཤེས་ཡོན་དང་རིག་གཞུང་ཐོག་ནས་རྒྱབ་སྐྱོར་གནང་མཁན་ཁག་ཅིག་དང་མཇལ་འཕྲད་གནང་སྟེ། ཆོས་ལུགས་ལ་མ་བརྟེན་པའི་བཟང་སྤྱོད་སྐོར་བཀའ་མོལ་གནང་བ་མ་ཟད། ཁོང་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་མིའི་སྒྲིག་འཛུགས་ངོས་ནས་བྱམས་བརྩེ་དང་སྙིང་རྗེའི་གཞི་རྩ་ཅན་གྱི་འཛམ་གླིང་ཞིག་བསྐྲུན་ཆེད། སློབ་ཕྲུག་ཚོའི་སེམས་ཁམས་ལ་ལྟ་རྟོག་དང་གསོ་སྐྱོང་ཚད་ལྡན་གནང་ཐུབ་པའི་ཤེས་ཡོན་སློབ་གསོའི་ལམ་ལུགས་ཤིག་སྤེལ་ཐབས་ཀྱི་ལས་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་བཅས།།