༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཀྲོག་ཀྱོའི་ཅི་བཱ་ཁྱབ་ཁོངས་མཐོ་སློབ་གཉིས་སུ་བོད་མིའི་ཤེས་ཡོན་སྲིད་བྱུས་དང་། དམིགས་བསལ་སཱི་ཤེས་ཡོན་ཐོག་གསུང་བཤད་གནང་ཡོད།
དེ་ཡང་རེ་ཊཱ་ཀུ་མཐོ་སློབ་ཀྱི་ཚོགས་གཙོ་སྐུ་ཞབས་མོ་ཊོ་ཊཱ་ཀ་ཧི་རོ་ཀེ་ (Mototaka Hiroike) ལགས་དང་། དགེ་ལས་རྣམས་ཀྱིས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས། དྲུང་ཆེ་བཀྲ་ཤིས་དབྱངས་འཛོམས་བཅས་ལ་ཕེབས་བསུ་སྣེ་ལེན་ཞུས་རྗེས། ཤེས་རིག་བཀའ་བློན་མཆོག་གིས་མཐོ་སློབ་ཀྱི་ཚོགས་གཙོ་ལ་མཇལ་དར་ཕུལ་བ་དང་འབྲེལ། ཁོང་མོར་སློབ་ཕྲུག་རྣམས་ལ་གསུང་བཤད་གནང་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུས་གནང་ཡོད།
ཉིན་རྒྱབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཅི་བཱ་བཟོ་རིག་སློབ་གཉེར་ཁང་དུ་ཕེབས་སྐབས་མཐོ་སློབ་ཀྱི་ཚོགས་གཙོ་སྐུ་ཞབས་སེ་ཏོ་ཀུ་མ་ཨོ་སཱ་མུ་ (Setokuma Osamu) ལགས་དང་། དགེ་ལས་བཅས་ཀྱིས་ཕེབས་བསུ་ཞུས་རྗེས་ཤེས་རིག་བཀའ་བློན་མཆོག་གིས་མཇལ་དར་ཕུལ་བ་དང་ཆབས་ཅིག་བོད་པའི་སློབ་ཕྲུག་རྣམས་ཀྱི་ཤེས་ཡོན་སླད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།
ཁོང་མོས་མཐོ་སློབ་གཉིས་ཀྱི་སློབ་ཕྲུག་དང་དགེ་རྒན་རྣམས་ལ་གསུང་བཤད་གནང་སྐབས་བོད་མིའི་ཤེས་ཡོན་སྲིད་བྱུས་ཀྱི་ལམ་ལུགས་སྐོར་དང་། སཱི་ཤེས་ཡོན་སློབ་གསོའི་གལ་གནད་བཅས་ཀྱི་སྐོར་གསུང་བཤད་གནང་ཡོད། ཤེས་རིག་བཀའ་བློན་མཆོག་གིས་གནའ་དེང་གཉིས་ཀྱི་ཤེས་ཡོན་གྱི་དམིགས་ཡུལ་དབར་འགྱུར་བ་ཆེན་པོ་ཕྱིན་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྟག་ཏུ་སྙིང་རྗེ་དང་། ཞི་བདེ། བཟོད་པ། བྱམས་བརྩེ་ལྟ་བུའི་འགྲོ་བ་མིའི་རིན་ཐང་རྣམས་དར་སྤེལ་གཏོང་སླད་སློབ་གསོ་རྒྱ་ཆེར་སྤེལ་དགོས་པའི་དགོངས་འཆར་བརྟན་པོ་གནང་གི་ཡོད་ཅེས་གསུངས།
ཕྱི་ལོ་ ༡༩༥༩ ལོར་རྒྱ་ནག་གིས་བོད་ལ་བཙན་བཟུང་བྱས་པ་ནས་བཟུང་༸གོང་ས་མཆོག་རྒྱ་གར་དུ་སྐྱབས་བཅོལ་དུ་ཕེབས་ནས་བོད་མི་རྣམས་ལ་དེང་རབས་དང་སྲོལ་རྒྱུན་གྱི་ཤེས་ཡོན་ཕུན་སུམ་ཚོགས་པ་བསྐྲུན་ཏེ་འགྲོ་བ་མིའི་རིན་ཐང་རྣམས་རྒྱུད་ལ་འཇགས་པར་བྱ་རྒྱུ་དང་། བོད་ཀྱི་ཆོས་དང་། རིག་གཞུང་། སྐད་ཡིག གོམས་གཤིས་བཅས་རྒྱུན་འཛིན་བྱ་རྒྱུའི་དགོངས་པ་བཞེས་ཡོད་པའི་སྐོར་འགྲེལ་བརྗོད་གནང་ཡོད།
དེ་ནས་ཁོང་མོས་མུ་མཐུད་ཆོས་ལུགས་ལ་མ་བརྟེན་པའི་བཟང་སྤྱོད་དང་སཱི་ཤེས་ཡོན་གཉིས་གཙོ་བོ་མིའི་བསམ་བློ་དང་། སེམས། ལག་ལེན་བཅས་ལ་དམིགས་ཀྱི་ཡོད་པ་མ་ཟད། སློབ་ཕྲུག་ཁག་ཅིག་དེ་དག་ལ་བརྟེན་ནས་ཁོང་ཚོའི་བྱ་སྤྱོད་ལ་འགྱུར་བ་ཆེན་པོ་བྱུང་ཡོད་པའི་སྐོར་གསུངས་ཡོད།
མཐོ་སློབ་ཀྱི་དགེ་ལས་སློབ་ཕྲུག་ཡོངས་ནས་ཤེས་རིག་བཀའ་བློན་མཆོག་གི་གསུང་བཤད་ལ་བསྔགས་བརྗོད་དང་། སཱི་ཤེས་ཡོན་སྐོར་སློབ་སྦྱོང་བྱ་རྒྱུའི་འདུན་པ་བསྟན་ཡོད། དེ་ནས་སློབ་ཕྲུག་ཚོས་སཱི་ཤེས་ཡོན་དེ་དེང་སྐབས་སྤྱི་ཚོགས་ནང་ལག་བསྟར་བྱེད་ཕྱོགས་དང་། སཱི་ཤེས་ཡོན་བརྒྱུད་རྒྱལ་གཅེས་ཀྱི་བསམ་བློའི་བྱེད་ལས་གང་ཡོད་སྐོར་དོགས་དྲི་ཞུ་བར་ལན་འདེབས་གནང་རྗེས། བོད་མིའི་སྒྲིག་འཛུགས་ཀྱི་ཤེས་ཡོན་སྲིད་བྱུས་དང་། ཨེ་མོ་རི་གཙུག་ལག་ཁང་གིས་པར་འགྲེམས་གནང་བའི་སཱི་ཤེས་ཡོན་གྱི་ཡིག་ཆ་འགྲེམས་སྤེལ་གནང་ཡོད།
དེ་ནས་རེ་ཏཱ་ཀུ་མཐོ་སློབ་ཀྱི་སློབ་དཔོན་ཧི་རོ་ཅི་ (Hirouchi) ལགས་ཀྱིས་ཤེས་རིག་བཀའ་བློན་མཆོག་གིས་གསུང་བཤད་གནང་བར་ཐུགས་རྗེ་ཆེ་ཞུས་ཤིང་། སཱི་ཤེས་ཡོན་དང་ཉི་འོང་གི་མཁས་དབང་ཅི་ཀུ་རོ་ཧི་རོ་ཀེ་ (Chikuro Hiroike) ལགས་ཀྱི་ཕུང་གྲུབ་རིག་པའི་སློབ་སྟོན་གཉིས་ཀྱི་མཚུངས་ཆོས་རྣམས་འགྲེལ་བརྗོད་གནང་།
སྐུ་ཞབས་སེ་ཏོ་ཀུ་མ་ལགས་དང་སྐུ་ཞབས་མོ་ཊོ་ཏཱ་ཀ་ལགས་རྣམ་གཉིས་ཀྱིས་སཱི་ཤེས་ཡོན་ལ་བསྔགས་བརྗོད་གནང་བ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བྱམས་དང་སྙིང་རྗེ་ལྡན་པའི་འཛམ་གླིང་ཞིག་བསྐྲུན་པར་སྐུ་ལས་བསྐྱོན་པ་དེར་ཡི་རང་གནང་སྟེ། མ་འོངས་༸གོང་ས་མཆོག་དང་བོད་མིའི་སྒྲིག་འཛུགས་ཀྱི་རྒྱབ་སྐྱོར་ལ་བརྟེན་ནས་འཚེ་བ་དང་སྡང་འཛིན་མེད་པའི་འཛམ་གླིང་ཞིག་བསྐྲུན་ཐབས་བྱ་རྒྱུ་དམ་བཅས་ཡོད།
མཐོ་སློབ་དེར་སློབ་གཉེར་གནང་བཞིན་པའི་བོད་པའི་སློབ་ཕྲུག་རྣམས་ནས་ཤེས་རིག་བཀའ་བློན་མཆོག་དང་ལྷན་དུ་མཇལ་འཕྲད་ཀྱིས་སོ་སོའི་མ་འོངས་མདུན་ལམ་སྐོར་སྙན་སེང་ཞུས་ཡོད། ཤེས་རིག་བཀའ་བློན་མཆོག་གིས་བོད་དོན་ལ་དམིགས་ནས་སློབ་གཉེར་ཧུར་ཐག་གནང་དགོས་པ་དང་། མ་འོངས་བོད་པའི་སྤྱི་ཚོགས་ནང་ཞབས་འདེགས་ཞུ་དགོས་པའི་ལམ་སྟོན་གནང་ཡོད་པ་བཅས།།
