༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ཉིན་སའོ་པོ་ལོ་རུ་ལྷོ་ཨ་རི་སྐུ་ཚབ་དོན་ཁང་གི་གོ་སྒྲིག་འོག་དུས་ཆེན་སྲུང་བརྩི་ཞུས་ཡོད། དེ་ཡང་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་༸གོང་ས་མཆོག་གི་སྐུ་ཕྱྭ་དང་འབྲེལ་བའི་སྐོར་དང་། བྱམས་སྙིང་རྗེའི་བསླབ་བྱ་སྐོར་གསུང་བཤད་གནང་ཡོད།
དེ་ནས་རིམ་བཞིན་གསུང་བཤད་གནང་མཁན་མི་སྣ་གྲགས་ཅན་ཁག་ཅིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། ཁོང་གི་སྐུ་ཚེའི་ལོ་རྒྱུས་ཀྱིས་གོ་ལའི་ཐོག་ཤུགས་རྐྱེན་ཐེབས་ཚུལ་བཅས་ཀྱི་སྐོར་སོ་སོའི་དགོངས་ཚུལ་དང་འབྲེལ་བའི་ཐོག་གསུང་བཤད་གནང་། སློབ་དཔོན་ལི་ཡ་ཌི་སི་ཀིན་ལགས་དང་། ཤོ་བྷན་སག་སེ་ན་ལགས། ཝལ་ཊར་ཕེལ་ཌི་མེན་ལགས། ཨི་དུ་ཝར་དོ་ཧོར་གེ་ལགས། འབུམ་རམས་པ་པི་ལི་ནི་ཡོ་ཙའི་ལགས་བཅས་ཀྱིས་༸གོང་ས་མཆོག་གིས་ཞི་བདེ་དང་། སྙིང་རྗེ། ཆོས་ལུགས་དང་རྒྱལ་ཁབ་དབར་གྱི་མཐུན་སྒྲིལ་ཐོག་སྐུ་ལས་ཚད་མེད་བསྐྱོན་གྱི་ཡོད་པ་དང་། ཁོང་གི་མཛད་རྗེས་མུ་མཐུད་གནས་དགོས་པའི་གལ་གནད། ལྷག་པར་སྦར་ཛིལ་དུ་ཐེངས་བཞི་ཆིབས་བསྒྱུར་བསྐྱངས་པའི་རྗེས་སྦར་ཛིལ་མི་མང་ལ་ཤུགས་རྐྱེན་གང་འདྲ་ཐེབས་ཡོད་པའི་སྐོར་འགྲེལ་བརྗོད་གནང་ཡོད།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པའི་ཚིག་འབྲུ་དང་ལྡན་པའི་སྤྲི་གོར་ཞིག་རྟེན་འབྲེལ་མཚོན་བྱེད་འདེགས་འབུལ་ཞུས་རྗེས་རྒྱ་གར་གྱི་ཞལ་ཏོག་དང་ཇ། དེ་མིན་བོད་ཀྱི་སྲོལ་རྒྱུན་གྱི་བོད་ཇ་བཅས་འདེགས་འབུལ་ཞུས།
མཛད་སྒོའི་ཐོག་སྐུ་ཞབས་ཌེ་ནི་ཡལ་སར་མེན་ཊོ་ལགས་ཀྱིས་གསུང་བཤད་གནང་མཁན་དང་མི་མང་རྣམས་མཉམ་ཞུགས་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་མཛད་སྒོའི་གོ་སྒྲིག་པ་ཚོ་ལ་བསྔགས་བརྗོད་ཞུས་གནང་ཡོད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༩ ཕེབས་པའི་༸སྐུའི་འཁྲུངས་སྐར་དུས་ཆེན་དེ་བཞིན་ཁོང་གི་མཛད་རྗེས་ལ་རྗེས་དྲན་དང་། ཁོང་གི་དགོངས་པ་རྣམས་བསྐྱར་ནན་ཞུ་བའི་དུས་སྟོན་ཞིག་ཡིན། སྐབས་དེར་རྒྱལ་ཁབ་དང་མི་རིགས་འདྲ་མིན་གྱི་མི་སྣ་རྣམས་ལྷན་འཛོམས་ཐོག་༸གོང་ས་མཆོག་ཞབས་པུས་གཤག་བཅོས་ལས་མྱུར་དུ་དྲག་བསྐྱེད་དང་། སྐུ་ཚེ་བརྟན་ཞིང་བདེ་ཐང་དུ་གནས་པའི་སྨོན་ལམ་འདེབས་ཡོད་པ་བཅས།།
