༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༦ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ཉིན་ལྡི་ལི་སྐུ་ཚབ་དོན་ཁང་གི་གོ་སྒྲིག་འོག་(India Habitat Centre)ཚོགས་ཁང་དུ་གནད་ཡོད་སྐུ་མགྲོན་ ༡༣༠ ལྷག་ལ་ཆེ་བསྟོད་སྣེ་ལེན་དང་འབྲེལ་དགོང་ཚིགས་འདེགས་འབུལ་ཞུས་ཡོད་པ་རེད།

སྐབས་དེར་སྐུ་མགྲོན་གཙོ་བོར་འབྲས་ལྗོངས་མངའ་སྡེའི་སྲིད་སྐྱོང་ཟུར་པ་སྐུ་ཞབས་བི་པི་སིངྷ་(BP Singh)ལགས་གཙོས་པའི་གནད་ཡོད་དཔོན་རིགས་དང་། རྒྱལ་ཁབ་ཉི་ཤུ་ལྷག་གི་གཞུང་ཚབ་ཆེན་མོ་དང་། གཞུང་ཚབ་གཞོན་པ་ཐེ་བའི་ཕྱི་འབྲེལ་མི་སྣ་ལྔ་བཅུ་ལྷག་ལྷན་ཞུགས་གནང་ཡོད།

མཛད་སྒོའི་ཐོག་ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྐྱེད་དམ་བཅའ་བཞི་ངོ་སྤྲོད་དང་སྦྲགས། རྒྱ་གར་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཆོག་ཏུ་བཀུར་འོས་པའི་སྐུ་མགྲོན་དུ་བརྩི་བཀུར་གནང་བར་ཐུགས་རྗེ་ཆེ་ཞུས་པའི་ཐོག རྒྱ་གར་གཞུང་དམངས་གཉིས་ནས་བོད་མིར་ཡུན་རིང་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུས་པ་དང་། རྒྱ་གར་གྱི་བཀའ་དྲིན་ལ་བརྟེན་ནས་བོད་མི་རྣམས་ནས་མི་ཡུལ་དུ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་ཐུབ་པ་བྱུང་ཡོད་ཅེས་གསུངས། དེ་མཚུངས་སྐུ་ཚབ་དོན་གཅོད་ནས་རྒྱལ་སྤྱིའི་མི་མང་ནས་བོད་དང་བོད་མིའི་རང་དབང་འཐབ་རྩོད་ལ་ཐུགས་ཁུར་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུས་ཡོད་པ་བཅས།།