༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༧ ཉིན་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་ལེ་མོན་ཊི་རི་ ( Lemon Tree) མགྲོན་ཁང་དུ་སློབ་ཚན་འཆར་འགོད་དང་ཡར་རྒྱས་གཏོང་ཕྱོགས་དང་འབྲེལ་ཏེ། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ཟབ་ཁྲིད་ལས་དོན་དང་འབྲེལ་བའི་ལས་བྱེད་རྣམས་ལ་ཟབ་ཁྲིད་གནང་ཕྱོགས་གྱི་སྦྱོང་བརྡར་དབུ་འཛུགས་གནང་ཡོད།
དེ་ཡང་ཟབ་སྦྱོང་གི་དབུ་འབྱེད་མཛད་སྒོའི་ཐོག་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་ཕེབས་བསུ་དང་སྦྲགས། སྦྱོང་བརྡར་འདིའི་དམིགས་ཡུལ་ནི་བོད་མིའི་སྒྲིག་འཛུགས་ནང་རང་རྐྱ་འཕེར་བའི་ཟབ་ཁྲིད་པ་གསོ་སྐྱོང་གནང་ཐབས་ཡིན་སྐོར་གསུངས། དེ་ནས་རྒྱལ་ཡོངས་མང་གཙོ་བསྟི་གནས་ཁང་གི་རྒྱ་གར་ཡན་ལག་འགན་འཛིན་ལྕམ་སྐུ་ལི་ལ་མུ་ལུ་ཁུ་ཊི་ལ་ལགས་ཀྱིས། ལེགས་པར་བཀོད་སྒྲིག་བྱས་པའི་སྦྱོང་བརྡར་ལས་རིམ་བརྒྱུད་ནས་བཟང་ཕྱོགས་ཀྱི་འགྱུར་བ་སྐྲུན་ཐུབ་པའི་ཟབ་ཁྲིད་པ་གསོ་སྐྱོང་བྱ་རྒྱུའི་གོམ་པ་ཆེན་པོ་ཞིག་ཡིན་པ་གསུངས་ཡོད།
ཉིན་གཉིས་རིང་གི་ཟབ་ཁྲིད་ནང་སློབ་ཁྲིད་གནང་མཁན་བི་བེཀ་ཤར་མ་ལགས་དང་། རྒྱལ་སྤྱིའི་གྲོང་ཁྱེར་དང་རྫོང་གི་འཛིན་སྐྱོང་མཐུན་ཚོགས་ (ICMA) ཀྱི་ལས་རིམ་འགན་འཛིན་པདྨ་དབང་མོ་ལགས་གཉིས་ཡིན་པ་དང་། དེ་ཉིད་ཨ་རིའི་རོགས་ཚོགས་ནས་རྒྱབ་སྐྱོར་གནང་བའི་བཙན་བྱོལ་བོད་མིའི་སྒྲིག་འཛུགས་ཀྱི་ནུས་ཤུགས་གོང་སྤེལ་ལས་གཞིའི་འོག་རྒྱལ་ཡོངས་མང་གཙོ་ཚོགས་པས་ལག་བསྟར་གནང་བཞིན་ཡོད་པ་རེད།
ཟབ་ཁྲིད་འདི་བརྒྱུད་ཕན་ནུས་ལྡན་པའི་སྦྱོང་བརྡར་ལས་གཞི་ལག་བསྟར་བྱ་རྒྱུ་དང་། ཟབ་ཁྲིད་ཐབས་ལམ་ངོ་སྤྲོད་ཞུ་རྒྱུའི་དམིགས་ཡུལ་བཟུང་ཡོད་པ་ལྟར། སྦྱོང་བརྡར་གྱི་རིམ་པ་བཞི་དང་། ལོ་ན་རྒན་པར་སློབ་གསོ་སྤྲོད་ཕྱོགས། ཟབ་སྦྱོང་བའི་དགོས་མཁོ་སྐོང་ཐབས་སོགས་ཀྱི་སྐོར་སློབ་སྟོན་ཞུས་ཡོད། ཐེངས་འདིའི་ཟབ་སྦྱོང་ནང་ཟབ་སྦྱོང་བ་རྣམས་ནས་དགོས་མཁོ་ངོས་འཛིན་དང་། འཆར་འགོད། འཕེལ་རིམ། ལག་བསྟར། བསྐྱར་ཞིབ་ལས་དོན་སོགས་ཀྱི་སྐོར་རྒྱུས་ལོན་ཞུས་ཡོད་པ་བཅས།།
