༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༧ ཚེས་ ༢༩ ཉིན་གྱི་སྔ་དྲོ་བོད་མི་མང་སྤྱི་འཐུས་ལྷན་ཚོགས་ཀྱིས་གོ་སྒྲིག་འོག རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་གཞིས་ཆགས་སུ་ས་གནས་འཐུས་ཚོགས་ཚགས་ཚུད་དང་སྲ་བརྟན་སླད་ལས་དོན་བྱེད་ཕྱོགས་ཀྱི་ཟབ་སྦྱོང་དངོས་སུ་དབུ་འཛུགས་གནང་ཡོད།

ཐེངས་འདིའི་ཟབ་སྦྱོང་དབུ་འབྱེད་མཛད་སྒོར་ཧོན་སུར་རབ་རྒྱས་གླིང་གི་ས་འཐུས་ ༣ དང་། རང་བདེན་ཚོགས་མི་ ༤  ཀོ་ལི་གྷལ་དོན་ལྡན་གླིང་གི་ས་གནས་འཐུས་མི་ ༨ དང་། སྦེལ་ཀོབ་ལུགས་ཟུང་བསམ་གྲུབ་གླིང་གི་རང་བདེན་ཚོགས་མི་ ༦ བདེ་སྐྱིད་སླར་གསོའི་རང་བདེན་ཚོགས་མི་ ༢  ཧོན་སུར་ནས་དོ་དབྱིངས་ཅན་ ༡ དེ་བཞིན་གོང་གསལ་ས་ཁག་བཞི་ཡི་ས་འགོ་དང་ལས་ཚབ་བཅས་མཉམ་ཞུགས་གནང་ཡོད་འདུགདེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པའི་ཐོག་ཟབ་ཁྲིད་གནང་མཁན་བོད་མི་མང་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་རྣམ་གཉིས་དང་། དེ་བཞིན་ཚོགས་བཅར་བ་རྣམས་བྱེས་ཀྱི་དཔལ་ལྡན་རྒྱུད་སྨད་གྲྭ་ཚང་གི་གསོལ་མགྲོན་ཁང་གི་ཚོམས་ཁང་ནང་ལྷན་འཛོམས་ཐོག་ཟབ་སྦྱོང་དབུ་འཛུགས་ཀྱི་མཛད་རིམ་ཧོན་སུར་ས་འགོའི་རྩིས་པ་ནོར་བུ་སྒྲོལ་མ་ལགས་ནས་གཙོ་སྐྱོང་ཐོག་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱལ་གཅེས་པ་རྣམས་ཀྱི་ཆེད་མྱ་ངན་གུས་འདུད་ཞུས་རྗེས། ཧོན་སུར་རབ་རྒྱས་གླིང་གི་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་འཚམས་འདྲིའི་གསུང་བཤད་དང་། ས་འཐུས་ཚོགས་གཙོ་ཟླ་བ་བསྟན་འཛིན་ལགས་ནས་གསུང་བཤད་གནང་ཡོད།

དེ་རྗེས་ཟབ་ཁྲིད་གནང་མཁན་བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ནས་ཟབ་སྦྱོང་དང་འབྲེལ་བའི་གསུང་བཤད་གནང་དོན། ས་གནས་འཐུས་ཚོགས་ཁག་ནི་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་འོག་གི་ས་གནས་ཀྱི་སྒྲིག་འཛུགས་གལ་ཆེ་ཞིག་ཡིན་པ་དང་། ས་གནས་གང་འདྲ་ཞིག་ཡིན་རུང་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་ཁ་ཕྱོགས་གཅིག་དང་ལམ་ཕྱོགས་གཅིག་པ་ཞིག་ལ་འགྲོ་དགོས་པ་དེ་གལ་ཆེན་པོ་ཡིན་པ་དང་། རང་བཙན་ཡོད་པའི་རྒྱལ་ཁབ་ལྟ་བུ་ཞིག་ཡིན་ན་ས་གནས་འཐུས་ཚོགས་ནི་ས་གནས་གཞུང་ལ་སྟངས་འཛིན་བྱེད་མཁན་གལ་ཆེ་ཞིག་ཡིན། ས་གནས་སོ་སོའི་འཐུས་མི་རྣམས་ནས་སྟངས་འཛིན་ཡག་པོ་བྱེད་ཐུབ་པར་བརྟེན་ལྐོག་ཟ་རུལ་སུངས་སོགས་ཀྱི་གནས་སྟངས་མེད་པ་ཆགས་ཡོད། དཔེར་ན་ད་ལྟ་བོད་ནང་ས་གནས་གཞུང་ལ་སྟངས་འཛིན་བྱེད་པའི་ཁོར་ཡུག་མེད་སྟབས་ལྐོག་ཟའི་གནས་ཚུལ་གཅིག་མིན་གཉིས་མིན་མང་པོ་ཡོང་གི་ཡོད་པ་རེད།

དེ་ཡང་ཁྲིམས་སྒྲིག་དང་། ལམ་སྲོལ་གྱི་ཐོག་ནས་ཡོང་དགོས་པ་དེ་གལ་ཆེན་པོ་ཡིན་ལ། མི་རབས་རྒན་པས་གཞོན་པར་དེ་བརྒྱུད་སྤྲོད་བྱེད་དགོས་པ་མ་ཟད། མ་འོངས་གཞིས་བྱེས་མཉམ་འཛོམས་ཉི་མ་འཆར་སྐབས་ང་ཚོས་གཞིས་བཞུགས་བོད་མི་རྣམས་ལ་འབུལ་ཆེད་ཀྱི་ལག་རྟགས་ཡག་ཤོས་ནི་མང་གཙོའི་ལམ་ལུགས་དེ་རེད། དེ་བཞིན་རྒྱ་གཞུང་གི་དམ་དྲག་འོག་བོད་ནང་གི་ན་གཞོན་བོད་རིགས་ཚོས་རང་མི་རིགས་ཀྱི་ཆས་གོས་གྱོན་པ་སོགས་ལས་འགུལ་སྤེལ་བཞིན་ཡོད་ལ། མི་རིགས་ཀྱི་རྟགས་མཚན་ལྟ་བུ་ཆས་གོས་ཡིན་པས་བཙན་བྱོལ་བོད་མི་ཚོས་ཀྱང་བོད་མི་རིགས་ཀྱི་ཆས་གོས་གྱོན་དགོས་པ་གལ་ཆེ་ཡིན་སྐོར་དང་། རོགས་ཚོགས་ཀྱི་མཐུན་འགྱུར་དང་། སྤྱི་འཐུས་ལྷན་ཚོགས་ཀྱི་དམིགས་ཡུལ་ལྟར་ཚང་མས་ཟབ་སྦྱོང་རིང་དོ་སྣང་གནང་དགོས་པ་ཧ་ཅང་གིས་གལ་ཆེན་པོ་ཡིན་པ་སོགས་ཀྱི་སྐོར་གསུང་བཤད་གནང་ཡོད།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་སྦྲགས། རང་མི་རིགས་ཀྱི་རིག་གཞུང་དང་ངོ་བོ་མ་བརླག་པའི་ཐོག་ནས་བཟང་སྤྱོད་ཀྱི་ཐོག་གོམ་པ་སྤོ་དགོས་པ་དང་། ༸སྐྱབས་མགོན་རིན་པོ་ཆེའི་དགོངས་གཞི་ལྟར་མང་གཙོ་སྲ་བརྟན་ཆེད་ཟབ་སྦྱོང་འབུལ་གྱི་ཡོད་ལ། མང་གཙོར་ལམ་ལུགས་དང་། སྒྲིག་གཞི། སྒྲོམ་གཞི་ཡོད་པའི་ཐོག་སྣེ་ཁྲིད་མི་སྣས་འགན་འཁུར་བླངས་ནས་རང་དབང་དང་འདྲ་མཉམ་གྱི་ཐོག་ནས་ཆ་ཤས་ལེན་དགོས། མང་གཙོར་བགྲོ་གླེང་དང་གྲོས་བསྡུར་བྱེད་པའི་གོ་སྐབས་གཅིག་མཚུངས་ཀྱི་ཐོག་ནས་མང་མོས་ཀྱི་ཐག་གཅོད་བྱེད་དབང་ཡོད་ལ། མང་གཙོ་ཡང་དག་པའི་ཡར་རྒྱས་ལ་མཐའ་མེད་ཀྱང་ང་ཚོས་ཡག་ཤོས་ཕྱོགས་ལ་གོམ་པ་སྤོ་ཐུབ་པ་དགོས་རྒྱུར་འབད་བརྩོན་གནང་དགོས་པ་སོགས་ཀྱི་གསུང་བཤད་གནང་གྲུབ་མཚམས། ཚོགས་མི་རྣམ་པས་སོ་སོའི་ངོ་སྤྲོད་དང་བཅས་ཟབ་སྦྱོང་དངོས་གཞི་དབུ་འཛུགས་གནང་ཡོད་འདུག

ཟབ་ཁྲིད་གནང་མཁན་བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དང་། སྤྱི་འཐུས་དབུ་དཀར་ཚང་གཡུ་སྒྲོན་ལགས་ནས་བཙན་བྱོལ་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུས་རྩིས་བཏང་འཛིན་བཅས་ཀྱི་སྒྲིག་གཞི་དང་། སྔོན་རྩིས་ཀྱི་རྩིས་འགོ་ཁག་གི་ཐོག་ཟབ་ཁྲིད་གནང་རྒྱུ་ཡིན་པ་བཅས། །