༄༅། །འདི་གར་སྦར་སིལ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༧ ཚེས་ ༥ ནས་ ༧ བར་ཉིན་གྲངས་གསུམ་རིང་ཡོ་རོབ་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ཐེངས་བཞི་པ་དེ་བཞིན་ཡོ་རོབ་དཔལ་ལྡན་ས་སྐྱའི་འཇིག་རྟེན་ཞི་བའི་སྨོན་ལམ་གོ་སྒྲིག་ཚོགས་ཆུང་ནས་སྦེལ་ཇམ་གྱི་རྒྱལ་ས་སྦར་སིལ་དུ་གོ་སྒྲིག་གནང་ཡོད།
ཐེངས་འདིར་ཡོ་རོབ་དཔལ་ས་སྐྱའི་འཇིག་རྟེན་ཞི་བའི་སྨོན་ལམ་ཐོག་དཔལ་ས་སྐྱའི་སྐྱབས་མགོན་༸གོང་མ་ཁྲི་འཛིན་ཞེ་གསུམ་པ་ཛྙ་ན་བཛྲ་རིན་པོ་ཆེ་མཆོག་དང་༸སྐྱབས་རྗེ་བཅོ་བརྒྱད་ཁྲི་པ་ ༢༦ པ་རིན་པོ་ཆེ་མཆོག ༸སྐྱབས་རྗེ་ཁང་གསར་ཞབས་དྲུང་རིན་པོ་ཆེ་མཆོག་བཅས་ཕེབས་ཡོད།
དེ་ཡང་ཕྱི་ཚེས་ ༤ ཉིན་གྱི་ཉིན་རྒྱབ་༸དཔལ་ས་སྐྱའི་སྐྱབས་མགོན་༸གོང་མ་ཁྲི་འཛིན་ཞེ་གསུམ་པ་ཛྙ་ན་བཛྲ་རིན་པོ་མཆོག་པེ་རི་སི་ནས་མེ་འཁོར་བརྒྱུད་སྦར་སིལ་དུ་ཕེབས་འབྱོར་བྱུང་བ་དང་། སྐབས་དེར་སྦར་སིལ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་སྦེལ་ཇམ་བརྩེ་ཆེན་ཚོགས་པའི་ཚོགས་གཙོ་དྲི་མེད་ལགས་རྣམ་གཉིས་ཕེབས་བསུར་བཅར་ཏེ་རིན་པོ་མཆོག་གསོལ་མགྲོན་ཁང་དུ་གདན་འདྲེན་ཞུས་ཡོད།
ཕྱི་ཚེས་ ༥ ནས་ ༧ བར་ཉིན་གྲངས་གསུམ་རིང་༸དཔལ་ས་སྐྱའི་སྐྱབས་མགོན་༸གོང་མ་ཁྲི་འཛིན་ཞེ་གསུམ་པ་ཛྙ་ན་བཛྲ་རིན་པོ་ཆེ་མཆོག་སྨོན་ལམ་གྱི་ཚོགས་མགོན་དུ་ཞབས་སོར་བདེ་བར་འཁོད་པའི་ཐོག་སྨོན་ལམ་གསུང་འདོན་གནང་ཡོད་པ་དང་། ཉིན་རྒྱབ་༸སྐྱབས་རྗེ་བཅོ་བརྒྱད་ཁྲི་པ་ ༢༦ པ་དང་༸སྐྱབས་རྗེ་ཁང་གསར་ཞབས་དྲུང་རིན་པོ་ཆེ་མཆོག་རྣམ་གཉིས་ནས་སེམས་བསྐྱེད་དང་སྨོན་ལམ་གལ་ཆེའི་སྐོར། སྦྱོར་དངོས་རྗེས་གསུམ་གྱི་ཆོས་སྒྲུབ་ཚུལ་བཅས་ཀྱི་སྐོར་གསུང་ཆོས་གནང་ཡོད།
ཕྱི་ཟླ་ ༧ ཚེས་ ༦ ཉིནགྱི་ཞོགས་པ་སྨོན་ལམ་གསུང་འདོན་གྲུབ་མཚམས་ལྷར་བཅས་སྲིད་ཞིའི་གཙུག་རྒྱན་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པ་མཆོག་བོད་ལུགས་དགུང་གྲངས་ ༩༠ ཕེབས་པའི་༸སྐུའི་འཁྲུངས་སྐར་དང་། ༸འཁོན་རིགས་བསྟན་པའི་གཙུག་རྒྱན་༸དཔལ་ས་སྐྱའི་སྐྱབས་མགོན་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་མཆོག་བོད་ལུགས་དགུང་གྲངས་ ༨༠ ཕེབས་པའི་སྐུའི་གྱ་སྟོན་གྱི་སྐལ་བཟང་ཉིན་མོ་མ་སྒྲིག་ལྷུན་འགྲུབ་དུས་མཉམ་སྟབས་འཁེལ་སྟབས། སྨོན་ལམ་ཚོགས་པ་ནས་རྟེན་འབྲེལ་དུས་མཉམ་སྲུང་བརྩི་ཞུས་གནང་ཡོད། འཁྲུངས་སྐར་མཛད་སྒོའི་ཐོག་༸སྐྱབས་མགོན་༸གོང་མ་ཁྲི་འཛིན་རིན་པོ་ཆེ་མཆོག་དང་། ༸སྐྱབས་རྗེ་བཅོ་བརྒྱད་ཁྲི་པ་ ༢༦ རིན་པོ་ཆེ་དང་། ༸ངོར་ཁང་གསར་ཞབས་དྲུང་རིན་པོ་མཆོག་གིས་དབུས་པའི་མཁན་བླ་དགེ་འདུན་རྣམ་པ། གཞན་ཡང་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས། ཡོ་རོབ་བོད་བརྒྱུད་ནང་བསྟན་ཆོས་ཚོགས་ཀྱི་ཚོགས་གཙོ་ཀ་ལོསི་ལགས་ཀྱིས་གཙོས་གསེར་སྐྱ་མང་ཚོགས་གང་མང་ཕེབས་ཡོད།
ཐོག་མར་སྐུ་མགྲོན་རྣམ་པས་མཇལ་དར་དང་སྤོས་སྣེ་ཐོག་ནས་སྐྱབས་མགོན་ཉི་ཟླ་ཟུང་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན། སྐུ་མགྲོན་གཙོ་བོ་རྣམ་པས་མཎྜལ་རྟེན་གསུམ་འདེགས་འབུལ་གྲུབ་རྗེས་ཞལ་འདོན་དང་ཞབས་རྟེན་ཁག་གསུང་གྲུབ་མཚམས་སྐུ་མགྲོན་གཙོ་བོ་རྣམ་པས་འཁྲུངས་སྐར་གྱི་སྤྲི་གོར་བཏུབ་གནང་བ་དང་། གཞན་ཡང་ས་གནས་བརྩེ་ཆེན་ཚོགས་པའི་ངོས་ནས་གླུ་གར་གྱི་མཆོད་པ་ཕུལ་ཏེ་འཁྲུངས་སྐར་སྲུང་བརྩི་གྲུབ་པར་མཛད།
གཞན་ཡང་ཐེངས་འདིའི་ཡོ་རོབ་ས་སྐྱའི་འཇིག་རྟེན་ཞི་བདེའི་སྨོན་ལམ་སྐབས་དང་བསྟུན། ཕྱི་ཚེས་ ༥ དང་ ༦ ཉིན་གྲངས་གཉིས་རིང་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། དྲུང་ལས་བསྟན་འཛིན་ཕུན་ཚོགས་ལགས། དྲུང་ལས་བསྟན་འཛིན་ནོར་ལྡན་ལགས་གསུམ་བར་ལམ་དོན་ཁང་ནས་དང་བླངས་དཔྱ་དངུལ་ལག་དེབ་གསར་བཟོ་དང་ནོར་བཅོས་ཞུས་ཁག་དོ་བདག་རྣམས་ལ་བགོ་སྤྲོད་ཞུ་རྒྱུའི་ལས་རིམ་བང་སྒྲིག་ལྟར་མང་ཚོགས་གང་ཙམ་ནས་ཆ་ཤས་བླངས་ཐུབ་པ་བྱུང་ཡོད།
ཕྱི་ཚེས་ ༧ ཉིན་གྱི་ཉིན་རྒྱབ་དཔལ་ལྡན་ས་སྐྱའི་༸སྐྱབས་མགོན་གོང་མ་ཁྲི་འཛིན་ཞེ་གསུམ་པ་ཛྙ་ན་བཛྲ་རིན་པོ་ཆེ་མཆོག་ནས་སེར་སྐྱ་མི་མང་ཡོངས་ལ་ཚེ་དབང་དང་བླང་དོར་གྱི་བཀའ་སློབ་བཀྲིན་གནང་ཡོད་པ་དང་། ཚེ་དབང་གི་མཛད་རིམ་གྲུབ་འཕྲལ་རིན་པོ་ཆེ་མཆོག་སྦར་སིལ་གནམ་ཐང་བརྒྱུད་སུད་སིར་ཆིབས་ཐོན་མཛད་ཡོད། སྐབས་དེར་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་བརྩེ་ཆེན་ཚོགས་པའི་ཚོགས་གཙོ་དྲི་མེད་ལགས་རྣམ་གཉིས་ནས་རིན་པོ་ཆེ་མཆོག་གནམ་ཐང་དུ་ཕེབས་བསྐྱེལ་ལ་བཅར་ཡོད་པ་དང་། སྦར་སིལ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ལྷན་བཅར་ཞུས་ཡོད། །
